Nɔɔneŋ Man Nɔɔneŋ 7

1O gyoorobu,

n nawɔɔ kekulu nkyokotase man dana kyeo.

N yiineŋ yɛɛ ŋgba kegyaŋase kpaakpaanyiŋan,

ŋan adao abɔɔyɛɛre ŋolo be yɛɛ nɛ.

2N wulu yɛɛ ŋgba keebia,

keŋ waen akyakalesa bɛɛ taŋ ke man ya.

N teŋa yɛɛ ŋgba aboŋ wuubii,

keŋ kyeŋkyeŋkɔɔse be kilisi ke.

3Nya ade yɛɛ ŋgba awɔkatese ala nɛ,

ŋgba ŋaa bia bala awɔkatese nɛ.

4N wɔŋe yɛɛ ŋgba tuukela dekagya nɛ,

n siabia yɛɛ ŋgba Hɛsebɔn depaa,

keŋ doo Bɛte Rabin denaanɔɔ man nɛ.

N memɔɔ yɛɛ ŋgba Lebanɔn dekagya,

keŋ ke teena Damasekuse nɛ.

5N nyee gyakaa n wɔŋe dɔɔ ŋgba Kamɛle bula nɛ,

n nyeenyɔɔse ne ŋalakee ŋgba gyooro kanyaŋ aloosa nɛ,

ka kyeo gyae ke tale milii gyoo.

6N lee alebiri te n dana kyeo,

me delebu, me loo gyakaa n dɔɔ nideli.

7N yɛɛ walaŋ geram ŋgba baa nɛ,

nya ade yɛɛ ŋgba daasebia te be yilaawɔ.

8Me kpa, <<Maa gyeŋ baa ŋon,

maa kyaŋ bei keŋ.>>

Nya ade dɛɛ yɛɛ ŋgba gerepo bia wuluŋula waen daŋ dɔɔ nɛ,

n weesɛɛ ofoŋ yɛɛ ŋgba atɔ ofoŋ nɛ.

9N nɔɔ yɛɛ ŋgba waen kpaakpaa nɛ,

Alo ŋon

waen keŋ dee tisi teeŋ gyu me diidɔɔ gyaagyi gyaŋ,

ke dɛɛ mo nɔɔsebia na kela man dɛɛdɛɛ gyu.

10Me yɛɛ me diidɔɔ gyaagyi wui,

ɔ ne gyae maŋ nideli.

11Me diidɔɔ gyaagyi, kɔŋ, yela dee gyu ŋale man,

yela de kaa doo akuraa man.

12Yela dɛɛ koro bileŋ gyu gerepo wɔɔse ŋan man,

de kaa kɛɛ nyi waen daase ŋan ta potee.

dɛɛ kɛɛ nyi kyeŋkyeŋkɔɔse ŋan te gyuusu,

nyi oboroni akotaa ŋan te yɛɛ kyeŋkyeŋkɔɔse,

botɔɔ te maa lese ma kegyae wola neŋ.

13Kyeŋkyeŋkɔɔse ŋan na lee ofoŋ,

te lɛɛ da denaanɔɔ man,

wɔlɛɛ na benɛɛ pou,

ŋan mɔɔ yilaa see nyaŋ me diidɔɔ gyaagyi.