Nɔɔneŋ Man Nɔɔneŋ 6

Gyoona

1Alebia man alebu,

aleŋ yaa n diidɔɔ gyaagyi laŋawɔ?

Yenaŋ woŋti yaa n diidɔɔ gyaagyi moowɔ,

na de kaa kɛo e kyɔ neŋ?

Alo

2Me diidɔɔ gyaagyi te lam ɔ wɔɔbii man,

botɔɔ keŋ teeneŋ ofoŋnyiŋan wuubia doo nɛ,

ɔ kaa fa ɔ wonembia weenɛɛ,

na waa kɔ kyeŋkyeŋkɔɔse.

3Me yɛɛ me diidɔɔ gyaagyi wui, te me diidɔɔ gyaagyi yɛɛ me wui,

ɔ ne kɛɛle ɔ wonembia kyeŋkyeŋkɔɔse man.

Baale ŋon

4Me diidɔɔ gyaagyi, n dana kyeo ŋgba Tiresa nɛ,

n dei ŋgba Yerusalɛm nɛ,

n wose dana gyakoloŋ ŋgba yoonɔɔtena baŋ be dana felagese nɛ.

5Lese n sia lee me dɔɔ,

ŋɛɛ ŋmaase maŋ.

N nyeenyɔɔse yɛɛ ŋgba asoose dikpii,

tisila lee Gileade otisi dɔɔ nɛ.

6N kela yɛɛ ŋgba namense dikpii,

baŋ bɔɔ lee desɔe gyeŋ bɛɛ kɔŋ nɛ.

Be man kamasɛ dana ɔ balate,

be man dokoloŋ gba ta yoo ya.

7N lakaase doo kanyaŋ keŋ n ba mo wuu n siagbɛɛ nɛ wɔle,

ŋgba oboroni akotaa yaaleŋ nɛ.

8Gyoo waa tale mo ala gyooneŋ sɔŋotooro (60),

diidɔɔna sɔŋonaara (80)

te alebia keteŋse dɔɔ ŋolo be tale kala wɔ ya.

9Mɔna me duwuluŋ yɛɛ dibiliŋ, ɔ kela be popou,

ɔ naa lola e bo alebu dokoloŋ kooŋ,

ŋon yɛna ɔ lolare sibii.

Alebia naa e te be baake e nyi nyeebam,

ala gyooneŋ na diidɔɔna koraŋ kɛlɛɛ e.

Gyoona

10Amɔte yɛna alo kei ŋon ɔ be bɛɛ lee ŋgba tɛɛkena nɛ,

ɔ dana kyeo ŋgba gyaalaŋ nɛ, ɔ ne ŋalakee ŋgba weese nɛ,

te ɔ ne gaŋtee ŋgba kyolobiise ŋan ŋe dana felagese nɛ?

Baale

11Me tisiwɔ gyu kateenaa wɔɔbii man,

me kaa kɛɛ nyi abɔɔ ŋan na potee detaŋgya keŋ man,

ke kɛɛ nyi gerepo daase ta potee,

yaa oboroni akotaa ta lese kyeŋkyeŋkɔɔse.

12Pɛ me kaa naa na,

me doo anebiliŋiŋ man me gyoorobu gyaŋ.

Gyoona

13Bese kɔŋ, bese kɔŋ, O Sulami alo,

bese kɔŋ, bese kɔŋ na dɛɛ kɛɛ neŋ nideli,

Baale

Weera ɛ ne kɛɛ Sulami alo ŋon,

ŋgba yoonɔɔtena akpiise ala siaman sɔɔre nɛ?