Nɔɔneŋ Man Nɔɔneŋ 5

Baale

1Me deesi, ma alowɔle, ma te kɔŋ me wɔɔbii man,

me te yilaa ma adudo na ma abɔɔ ofoŋnyiŋan,

me te di ma teebɔɔ defaŋalaŋ na ma teebɔɔ,

ma te nyɔɔ me waen na ma miliki.

Gyoona

Gyoona, ɛ di na ɛ ke nyɔɔ,

ɛ nyɔɔ ɛ kegyaebii.

Alo

2Me doowɔ, mɔna me sibii te wuu ya.

Tei, me diidɔɔ ne gyɔ disim nyiaa,

<<Me deesi na me diidɔɔ,

me duwuluŋ, me walaŋ debiliŋ, toro maŋ.

Obosuo te fɔ ma nyee,

nelim obosuo te bara ma nyeenyɔɔse.

3Me ta kpee ma kegba wurikyim,

maa yɛɛ sena maa do ke bela?

Ma te faafo me nawɔɔ,

maa yɛɛ ŋa ayimɛɛ bela?

4Me diidɔɔ gyaagyi ta mo ɔ nyiŋmaa do waa toro,

te me nyaŋeewɔ me konɔɔ man.

5Ma korowɔ me kaa toro me diidɔɔ gyaagyi,

te me nyiŋmaase ke tinaa adudo,

me nyimbiise tinaa adudo,

keŋ be tiu nyeele anatoroŋ keŋ nɛ.

6Ma torowɔ fa me diidɔɔ gyaagyi,

mɔna me diidɔɔ gyaagyi ta bese laŋ, ɔ te lam.

Takaa maŋ lee ɔ kelaŋ dɔɔ,

Me kɛo e mɔna ma te naa e ya,

me baake e mɔna ɔ te kpaa ya.

7Gyeera baŋ naa maŋ,

debaŋ keŋ bee kila donɔɔ dinaa keŋ nɛ.

Be tuku maŋ do maŋ gyamɛɛ,

Gyeera baŋ bee gyee dekyaŋ keŋ,

lɛo me baameŋ dɔɔ kanyaŋ keŋ.

8Yerusalɛm alebia, ma te kɛɛ fa ŋon nyi,

akpaa ɛ naa me diidɔɔ gyaagyi na,

woŋ te ɛ ke yako e?

Ɛ yako e nyi ɔ kegyae ta do maŋ kawee.

Gyoona

9Alebia man alebu,

woŋ te n diidɔɔ gyaagyi moowɔ kela akaŋ baŋ?

Woŋ te ɔ moowɔ kela akaŋ baŋ,

te n ne kaŋ ntam fa daa?

Alo

10Me diidɔɔ yɛɛ ŋmalaa te ɔ seŋɛɛ ɔ naawɔɔ dɔɔ,

baala kakpoŋ man ŋolo be maana e ya.

11Ɔ nyee yɛɛ kɔba yayam kpaakpaate ke,

ɔ nyeenyɔɔse te bara kyeo kyeo,

te ŋe birɛɛ ŋgba kwaakwaadabi nɛ.

12Ɔ sia yɛɛ ŋgba awuluŋna,

seŋɛɛla boo nɔɔman,

keŋ bɔɔ mo miliki sɔ wɔ,

te bɔɔ mo kɔba yayam abɔɔ mia wɔ nɛ.

13Ɔ lakaase yɛɛ ŋgba teeneŋ ofoŋnyiŋan wuubii,

keŋ na lee ofoŋ nideli nɛ.

Ɔ nɔɔsebia yɛɛ ŋgba kyeŋkyeŋkɔɔse,

ŋan ne kyɔsee adudo nɛ.

14Ɔ baameŋse yɛɛ kɔba yayam gbutuse,

ŋan bɔɔ mo boya kpaakpaa nyiŋan bɛɛ baake nyi topase nɛ kilisi ŋa.

Ɔ wose yɛɛ ŋgba tuukela keŋ bɔɔ kyalase ke,

te bɔɔ mo safire boe mia ke nɛ.

15Ɔ nawɔɔ yɛɛ ŋgba boe piilase,

seŋɛɛla kɔba yayam kpaakpaate mokɔɔ kasee dɔɔ.

Ɔ dinɔɔ yɛɛ ŋgba Lebanɔn,

na ke daase kpaakpaanyiŋan.

16Ɔ nɔɔwoya dana gyoŋ gbagba,

ɔ kpene kamasɛ na gyoo me sia nideli.

Yerusalɛm alebia,

me diidɔɔ gyaagyi yaa, me gyoo yaa.