Nɔɔneŋ Man Nɔɔneŋ 4

Baale ŋon

1Ma delebu, n lee alebiri gbagba,

Ampaŋ n dana kyeo,

n siabia ne naa kanyaŋ keŋ n ba mo wuu n siagbɛɛ nɛ wɔle ŋgba duwuluŋ nɛ,

n nyeenyɔɔse yɛɛ ŋgba asoose dikpii,

tisila lee Gileade bulabii dɔɔ nɛ.

2N kela yɛɛ ŋgba namense dikpii baŋ bɔɔ kɛrɛɛ ba wona deboman,

te bɔɔ lee ba desɔe man kɔŋ nɛ,

ɔkamasɛ dana ɔ balate,

be maŋ ŋolo be dɔŋ waageŋ ya.

3N nɔɔsebia yɛɛ ŋgba ŋmeleŋ yayam nɛ,

n nɔɔwoya dana gyoŋ,

n lakaase yɛɛ ŋgba,

oboroni akotaa yaaleŋ nɛ.

4N wɔŋe yɛɛ ŋgba Dawide dekagya,

keŋ bɔɔ mo boya kpookpoo baŋ nɛ,

yoo nyeela pampasaŋse kakpoŋ wuluŋɛɛ ke dɔɔ,

ŋe popou yɛɛ yoonɔɔtena nyeela pampasaŋse.

5Nya ade yɛɛ ŋgba awɔkatese ala nɛ,

ŋgba ŋaa bia bala,

baŋ bee dii kyeŋkyeŋkɔɔse man nɛ.

6Maa gyu adudo bula,

na oliifi bulabii dɔɔ,

pɛna tɛɛ kena,

na wɔŋtaase ke ŋaalaa.

7Me delebu gyaagyi, n lee alebiri,

kadeŋ be doo n man ya.

8Ma alowɔle, sila maŋ lee Lebanɔn,

sila maŋ lee Lebanɔn.

Tisi lee Amana bula nyeedɔɔ,

lee Senire bula nyeeman na Hɛremon bula adido,

lee dinaatese bɔɔneŋ,

na laamantese bulase dɔɔ.

9Me deesi, ma alowɔle, n te di ma nyee,

n ta mo n sibii keŋ n ba mo kɛɛ maŋ,

na kegyaŋa kpaakpaa keŋ doo n wɔŋe man,

di ma nyee.

10Me deesi, ma alowɔle, n kegyae keŋ na gyoo me sia.

N kegyae dana gyoŋ kela waen,

n lafenta keŋ ofoŋ,

kela kolo ofoŋte kamasɛ.

11Ma alowɔle, n nɔɔwoya dana gyoŋ ŋgba teebɔɔ nɛ,

miliki na teebɔɔ doo n laakem man,

n kegbase ofoŋ,

yɛɛ ŋgba Lebanɔn ofoŋ nɛ.

12Me deesi, ma alowɔle, n yɛɛ wɔɔbii keŋ bɔɔ tɔ ka denaanɔɔ,

n yɛɛ boŋobiinyee keŋ bɔɔ tɔ ke, detiribuŋ keŋ bɔɔ tɔ ke nɔɔ.

13N fara oboroni akotaa wɔɔ,

keŋ ba se bia kpaakpaa,

kpuna kyeŋkyeŋkɔɔse na daase ofoŋnyiŋan.

14Ŋalese ofoŋnyiŋan na gyae na pɛperɛ,

kɔŋtaase na aseŋgbebia,

oliifi daase kpookpoo,

adudo na gyaburabu

na abɔɔ ofoŋnyiŋan akaŋ kyaa botɔɔ.

15N yɛɛ wɔɔbii keŋ loŋ ne puu lee ke man,

detiribuŋ keŋ loŋ na lee,

kɛɛ lam lee Lebanɔn tisi.

Alo

16Adoyenaŋ feliŋ koro,

atayenaŋ feliŋ kɔŋ.

Gyɔ me wɔɔbii man,

na kɔ ofoŋ ke lɛɛ yenaŋ kamasɛ.

Yela me diidɔɔ kekɔŋ ɔ wɔɔbii man,

na ɔ kaa di ke bia kpaakpaa ŋan.