Nɔɔneŋ Man Nɔɔneŋ 3

1Me kɛo ŋon me konɔɔ ne gyae e,

nelim pou ma dofoŋoŋ dɔɔ,

me kɛo e mɔna ma te naa e ya.

2Maa koro ke kila donɔɔ dinaa keŋ,

abɔnterese na kebuse pou man,

maa kɛo ŋon me konɔɔ ne gyae e.

Me kɛo e mɔna ma te naa e ya.

3Gyeera baŋ naa maŋ,

debaŋ keŋ bee kili donɔɔ dinaa keŋ man.

Me bɔɔse wɔ nyiaa, <<Ɛ naa ŋon me konɔɔ ne gyae e nɛ?>>

4Ma ke gbaa wɔ pɛ,

te me naa ŋon me konɔɔ ne gyae e.

Me lɔɔwɔ kyaŋ e keŋ me te tina e yela ya,

kaboena ma moo e kɔŋ me naa dekpaŋalaŋ man,

gyoo ŋon mɔɔ doo ɔ tɔɔman nɛ deni tɔɔman.

5Yerusalɛm alebia, ma te kɛɛ,

ŋale man ŋaase na kpeleese ntam fa ŋon nyiaa,

ɛ na gyuusu yaa ɛ ke wosi kegyae ya,

kelii debaŋ keŋ kɛɛ gyae.

6Woŋ yɛna kei keŋ ba lee kefula man ne kɔŋ,

ŋgba nyɔɔse tuum nɛ?

kɛɛ lee ofoŋ ŋgba adudo na oliifi,

keŋ kebudiira ba mo ba teeneŋ kpookpoo yɛɛ nɛ.

7Kɛɛ, Solomɔn anebiliŋiŋ yaa,

Iserae yoonɔɔtena sɔŋotooro ne gyee ke,

ba lee Iserae yoonɔɔtena doŋtena man.

8Be popou baana yoosilase,

be popou gyeŋ yoo nideli,

ɔkamasɛ baana yoosila ɔ yenaŋ,

ba te desina ba wose fa nelim keyee keŋ.

9Gyoo Solomɔn moo Lebanɔn daase,

yɛɛ wa apakan.

10Kɔba wolom te ba moowɔ yɛɛ ke daase,

ke wɔle yɛɛ kɔba yayam,

ke gbelɛɛ yɛɛ kanyaŋ amɔlaloŋ,

te Yerusalɛm alebia moo,

kegyae desina ke tɔɔman.

11Siyɔn alebia,

ɛ lee kaa kɛɛ gyoo Solomɔn,

ɔ wuuna gyooro kotɔtɔɔ keŋ ɔ naa ba mo wuu e,

wee keŋ ɔ ba kpeo alo,

wee keŋ ɔ be nyaŋee ɔ konɔɔ man nɛ.