Nɔɔneŋ Man Nɔɔneŋ 2

Alo

1Me yɛɛ Saarɔn kyeŋkyeŋkɔɔ ke,

ŋgba detaŋgya man kyeŋkyeŋkɔɔ nɛ.

Baale

2Mena keŋ kyeŋkyeŋkɔɔ doo sɔɔse man nɛ,

mena te me diidɔɔ doo alebia man.

Alo

3Mena keŋ oboroni ntoŋkum seŋɛɛ daase nsana laa man nɛ,

mena te me diidɔɔ doo tewulɛɛ man.

Ɔ wuluŋ man kekyaa dana maŋ gyoŋ,

te ɔ bia ŋan dana maŋ gyoŋ nideli.

4Ɔ moo maŋ gyu nɔɔkedi degyaŋee man,

ɔ felage keŋ wuɛ me dɔɔ yɛna kegyae.

5Ɛ mo gerepo awolɛɛ do maŋ doŋ,

ɛ mo oboroni ntoŋkumbia fɛɛ me konɔɔ,

nawolo nyi n kegyae te gyɔ maŋ kawee.

6Ɔ demena nyiŋmaa doo ma nyee ateta,

na waa mo ɔ dunoluŋ nyiŋmaa baraa maŋ.

7Yerusalɛm alebia, ma te kɛɛ,

ŋale man ŋaase na kpeleese ntam fa ŋon.

Ɛ na gyuusu yaa ɛ ke wosi kegyae ya,

kelii debaŋ keŋ kɛɛ gyae.

8Ɛ tei, me diidɔɔ woya yaa.

Ɛ kɛɛ, ŋon ne kɔŋalaa,

ɔ ne yɛlɛɛ gbaa bulase,

ɔ na toŋee gbaa bulasebia.

9Me diidɔɔ yɛɛ ŋgba ŋaa yaa kpelee bu nɛ,

Kɛɛ, ŋon seŋɛɛla da dekyaŋ wɔle,

ɔ te fɛɛ sia ɔ ne kɛɛ nfansere man,

ɔ na do sibii kɛɛ nfansere nyeela ŋan man.

10Me diidɔɔ kolosiwɔ yako maŋ nyiaa,

<<Koro, ma delebu,

ma delebu gyaagyi, kɔŋ dee gyu.

11Kɛɛ, dugbutu te lam,

te dekpao te lam.

12Kyeŋkyeŋkɔɔse te bɛɛ lee tɛɛle dɔɔ,

nɔɔneŋse kekpee te lii,

dee nyii akyakyaboŋase kewii,

de tɛɛle keŋ dɔɔ.

13Fiigi daasebia taŋ ne yɛɛ,

gerepo ta lese kyeŋkyeŋkɔɔse ŋan na lee ofoŋ.

Koro kɔŋ, me diidɔɔ,

me diidɔɔ gyaagyi, sila maŋ.

Baale

14Me duwuluŋ ŋon n doo kpanaŋ bɔɔ man,

bulase yenaŋ dayoe man,

mo n siagbɛɛ wola maŋ,

yela maa nyii n woya,

nawolo nyi n woya dana gyoŋ,

te n siagbɛɛ dana kyeo.

15Ɛ kyaŋ nyanyase fa maŋ,

nyanyase buruburu,

baŋ bɛɛ wɔlɛɛ gerepo wɔɔse nɛ,

nawolo nyi de gerepo wɔɔse te lee kyeŋkyeŋkɔɔse.

Alo

16Me diidɔɔ yɛɛ me wui, te maŋ mɔ yɛɛ ɔ wui,

ɔ ne kɛɛle ɔ wonembia ŋalese kpaakpaa man.

17Me diidɔɔ, besena n wose,

na n ke yɛɛ ŋgba ŋaa,

yaa kpelee bu,

ŋon ɔ doo bulase kebɛɛlase man nɛ,

pɛna tɛɛ kena,

na wɔŋtaase ke ŋaalaa.