Nɔɔneŋ Man Nɔɔneŋ 1

Nɔɔneŋ Gyaŋgbate

1Solomɔn nɔɔneŋ man nɔɔneŋ

Alo Ŋon

2Yela waa kyokyoe me nɔɔ nideli,

nawolo nyi n kegyae dei kela waen.

3N nuŋ anetiu keŋ dana ofoŋ nideli,

n yele yɛɛ nuŋ keŋ bɔɔ kyɛɛkee leki.

Keŋ dɔɔ te alebia ne gyae neŋ nɛ.

4Mo maŋ sila n wose, yela dɛɛ yɛɛ bileŋ,

Gyoo ta mo maŋ gyoo ɔ deni tɔɔmante man.

Gyoona

Dɛɛ nyaŋee na dee di gyoŋ,

Dɛɛ kɛlɛɛ n kegyae kela waen,

Alo

Kegbɛɛ dɔɔ yaa bɛɛ gyae neŋ nɛ.

5Yerusalɛm alebia,

me birɛɛ mɔna me dana kyeo,

me birɛɛ ŋgba Kedare kanyaŋse denɛɛ nɛ,

ŋgba Solomɔn deniman patisanse nɛ.

6Ɛ na fɛɛ ɛ sia kɛɛ maŋ nyi me birɛɛ dɔɔ ya,

nawolo nyi weese yɛɛla te me biriwɔ.

Me naa bia tewulɛɛ gyeŋa baŋ do maŋ,

te ba moo maŋ see gerepo wɔɔse gyeere.

ma te tale kɛɛ maŋ gbagba me gerepo wɔɔ gba ya.

7Nyaŋ ŋon mɛɛ gyae neŋ, yako maŋ,

botɔɔ keŋ n na mo n wonembia gyu dedii,

na botɔɔ keŋ n namense ne fɛɛfo weeseteŋteŋ.

Woŋ dɔɔ te maa mo kanyaŋ wuu ma wose,

na maa yo gyoo n tebia namense man?

Gyoona

8Alebia man alebu, akpaa n ba gyeŋ ya nɛ,

sila namense baŋ nawɔɔ man,

na n ka mo nya asoose bia gyu dedii,

wonembia kɛɛlera kefɛɛse gyaŋ.

Baale

9Ma alebu, mɛɛ gyae neŋ,

n yɛɛ ŋgba dɛɛkyɔŋse alebia baŋ bɛɛ wɔŋee gyoo Faaro anebiliŋiŋ nɛ.

10N lakaase na nya asomdɛɛse te yele n te yɛɛ kyeo,

kegyaŋase kpaakpaa nyiŋan te mia n wɔŋe.

11Dɛɛ yɛɛ kɔba yayam asomdɛɛse,

na dɛɛ mo kɔba wolom do ŋe man fa neŋ.

Alo

12Gyoo kekyaa ɔ gbeli aneteeliŋ man nɛ,

me lafenta ofoŋ lɛɛ botɔɔ pou.

13Me diidɔɔ yɛɛ ŋgba adudo,

keŋ doo ma ade nsana nɛ.

14Me diidɔɔ yɛɛ ŋgba kyeŋkyeŋkɔɔse ofoŋnyiŋan,

doola Ɛne Gɛdi gerepo wɔɔman nɛ.

Baale

15Ma delebu, sena yaa n dana kyeo mena?

O n dana kyeo ampaŋ.

N siabia yɛɛ ŋgba duwuluŋ nɛ.

Alo.

16Me diidɔɔ, n lee tobiiri gbagba,

Ayi, n dana kyeo ampaŋ ampaŋ,

Da dedoi man woɛ ŋgba faareŋ laŋnyiŋan nɛ.

Baale

17Sida daase yɛna de deni akparadaase,

taabɔɔ daase te ba moowɔ sam ke.