Nombiawolare 12

1Tɔɔse n Yɛɛre,

lee n tobiiritɛɛ,

pɛna weeya kumɛɛ kaa kɔŋ,

na kulutooneŋ ŋan na benaa na n keyako nyi,

<<Ŋɔɔ na gyoo me sia ya,>>

2pɛna weese na keŋmaŋee,

na gyaalaŋ na kyolobiise ka gyoo detiŋtɛɛ,

na debuŋta ka bese kɔŋ lee ɔga keŋɛɛ wɔle.

3Debaŋ keŋ dekpaŋalaŋ gyeera baŋ baa seree,

na baala doŋtena ke yɔkɔse,

na naŋara ke tina kenaŋ yela nawolo nyi be ta boo ya,

na baŋ bɛɛ kɛɛ nfansere man sia ke yɛɛ fulaa.

4Gbɛɛneŋ ŋan doo gyu abɔntere man gyae ke tɔ,

na abɔɔ kenaŋ yeesa ke yɔkɔse,

gyebuse kewii gyae ke yela balaŋ kefoŋii,

na nɔɔneŋ kpeera pou woya ke daa.

5Balaŋ baa yee botɔɔse ŋan korɛɛ nɛ keta,

na gyakoloŋ ka gyoo abɔnterese man,

Oboroni akotaa daase gyae ke yɛɛ kyeŋkyeŋkɔɔse,

na dekpataa ke wɔŋee ɔ wose tɛɛle man,

te kolo be gyɔ walaŋ loo bela ya.

Keŋte balaŋ baa yekee,

na baŋ bee wii lia nɛ keta kila abɔnterese man.

6Tɔɔse Wurubuarɛ pɛna kɔba wolom ŋmeleŋ ke tira,

pɛte kɔba yayam nyefale ke yɛlɛɛ,

pɛte keŋ bɛɛ mo kyee loŋ detiribuŋ man ke yɛlɛɛ detiribuŋ nɔɔman,

na kɔta keŋ bee fiili wɔŋ loŋ ke wɔlɛɛ.

7Na tɛɛle ka bese gyu tɛɛle keŋ man kɔɔ lee,

na woo keŋ ka bese gyu Wurubuarɛ ŋon ɔ be fa ke nɛ gyaŋ.

8Wolare ŋon kpa, <<Ke yɛɛ yakaa man yakaa.>>

<<Kpene kamasɛ yɛɛ yakaa.>>

Nombia Ŋan Ɔtoman

9Wolare ŋon ta lese wola nyi ɔ sia te kare kaageŋ bo ya, mɔna ɔ faa balaŋ baŋ nombia kagyeŋ. Ɔ keri nombia gyoo ŋe man nideli te ɔ yilaa aduya see ŋe gbɛɛ dɔɔ. 10Wolare ŋon kɛowɔ nideli na waa nyiŋ nɔɔwoya ŋan dei, te ŋan ɔ be ŋmarase nɛ doona ŋe gbɛɛ te ŋe yɛɛ anokoare.

11Siakaralate nɔɔwoya yɛɛ ŋgba wonembia kɛɛlere gbutu nɛ, te ŋa keyako te kaa yilaa ŋgba nyeelabia te be gyɔɔwɔ kyaŋ daasebia mataa nɛ. Wonembia kɛɛlere dokoloŋ yilaana ŋa see. 12Me bu kɛɛ nideli lee ŋan yɛɛ kpoo lee kɛŋa man nɛ.

Tɔna burum keŋmarase be dana ɔto ya, te tɔne kekasee beiŋ ne takaa walaŋ.

13Nɛnɛɛ n te nyii ŋe popou,

nombia ŋan pou ɔto yɛna nyi,

Yee Wurubuarɛ na n ke di ɔ mmaraase dɔɔ,

nawolo nyi kei yɛna keŋ kaboena nyi denibalaŋ pou baa yɛɛ.

14Nawolo nyi Wurubuarɛ waa di da abɔɔ ayɛɛsa pou nombia,

mo kpuna ŋan weesɛɛ nɛ,

nyi ŋe yɛɛ kpaakpaa yaa dukum.