Nombiawolare 11

Keŋ Siakaralate Ne Yɛɛ

1Fuŋ n weenɛɛ lɔ ɛpo dɔɔ,

wee daale nyaŋ ke nyiŋ ke bela.

2Kpala ŋa akpeŋ nyetooro yaa gyanaara man,

nawolo nyi n ba gyeŋ nombiikum keŋ gyae kaa yala tɛɛle dɔɔ ya.

3Nyi ɔga de biri nɛ,

ɔ ne ŋɛɛ woli tɛɛle.

Nyi daŋ de yale gyu ata yenaŋ yaa ado yenaŋ nɛ,

yenaŋ keŋ kɔɔ yale nɛ botɔɔ te ke gyae ke doo.

4Ɔkamasɛ ŋon ɔ ne kɛɛ feliŋ be gyae waa duu ya,

ɔkamasɛ ŋon ɔ ne kɛɛ ŋɔma be gyae waa kɔ ya.

5Mena keŋ n ba gyeŋ feliŋ detɛe man ya,

yaa mena keŋ biikyaa ne yɛɛ bee ɔ naa tɔɔman ya nɛ,

mena ke te n be gyae n ke tale nyii Wurubuarɛ,

ŋon ɔ be yɛɛ kpene kamasɛ nɛ tomse man ya.

6Duu n weenɛɛ nebo,

te de lii balinɔɔ nɛ, na lese n nyiŋmaa lee ke man ya,

nawolo nyi n ba gyeŋ keŋ gyae ke de ya,

n ba gyeŋ nyi kei yaa kei,

yaa ŋa ala pou gyae ke de ya.

Tɔɔse N Wurubuarɛ Lee N Tobiiritɛɛ

7Keŋmaŋee dana gyoŋ,

te weese kebɛɛ ne yɛɛ kyeo.

8Nyi walaŋ de di kulutooneŋ burum nɛ,

waa nyaŋee ŋe popou man.

Mɔna waa tɔɔse nyi detiŋtɛɛ weeya mɔ kyaa,

nawolo nyi detiŋtɛɛ weeya kyaa burum.

Ŋan gyae ke kɔŋ pou yɛɛ yakaa.

9Nyaŋ tobaale, yela ke yɛɛ neŋ gyoŋ n tobiiritɛɛ,

na n ke yela n konɔɔ ke nyaŋee n tobiiri weeya man.

Sila ŋan n konɔɔ ne gyae,

na ŋan n sia ne naa,

mɔna tɔɔse nyi kɛŋa pou man nɛ,

Wurubuarɛ waa di n nombia.

10Mena dɔɔ lese baŋ lee n konɔɔ man,

na n ka lese wose weeleŋ lee n man,

nawolo nyi n tobiiritɛɛ doŋ yɛɛ yakaa.