Nombiawolare 10

1Mena keŋ kyɔɔse ayeŋɛɛ ne yele nuŋ ofoŋte na lee wɔŋ nɛ,

mena ke te diyiŋ nombia kyomii ne di nyansa na obuo dɔɔ.

2Siakaralate konɔɔ na wola e nombia kpaakpaa keyɛɛ,

mɔna diyiŋte konɔɔ na wola e nombiakumɛɛ keyɛɛ.

3Nyi diyiŋte dɔŋ gbɛɛnaa man koraŋ nɛ,

ɔ bɛɛ gyueŋ kolo ya,

te ɔ na lese wola walaŋ kamasɛ nyi ɔ yɛɛ diyiŋte e.

4Nyi gyoo da gyeŋ baŋ do neŋ nɛ,

na tina n tom keyɛɛ yela ya,

nawolo nyi n yɔkɔse n wose na ɔ baŋkum ne fɛɛ.

5Me naa kolo kum daale bela tɛɛle kei dɔɔ,

ke yɛɛ nombii keŋ donɔɔ kegyiise ne yɛɛ te be dei ya.

6Be ta mo ayiŋtena see akyaese dinaana man,

te baŋ bɔɔ nyiŋ ba wose nɛ kyakɛɛ botɔɔ keŋ be dana obuo ya nɛ.

7Me naa gbeŋa kyakɛɛ dɛɛkyɔŋse dɔɔ,

na gyoorobia dɔŋna be nawɔɔ ŋgba gbeŋa nɛ.

8Ɔkamasɛ ŋon ɔ wula dowokom na waa yala ke man,

ɔkamasɛ ŋon ɔ yɛlɛɛ dekyaŋ nyi waa gyoo ke man na dom waa kyoŋ e.

9Ɔkamasɛ ŋon ɔ ne yɛlɛɛ boya na ŋe gyae ke kara e,

ɔkamasɛ ŋon ɔ ne bɛɛse daase na ŋe gyae ke gooli e.

10Akpaa debeŋa da yem,

te ba te sara ke ya nɛ,

kaboena nyi baa mo doŋ kpu,

mɔna nyansa ne gyaela ke yɛɛ ke nideli.

11Nyi dom de kyoŋ walaŋ pɛte be fae e nɛ,

na tɔnɔɔ be doo fa ŋon ɔ be fae nɛ ya.

12Siakaralate nɔɔman nombia na mo obuo kɔna e,

mɔna diyiŋte nɔɔman nombia ne wɔlɛɛna e.

13Ɔ nɔɔwoya kewalaŋ yɛɛ diyiŋ nombia ŋa,

ɔ kekolosi ɔtoman yɛɛ diteŋ gbagba ke,

14diyiŋte ne kolosi keŋ ɔ bee yeli ya.

Ŋolo ba gyeŋ keŋ gyae ke kɔŋ ya,

amɔte ne gyaela waa yako keŋ gyae ke kɔŋ ɔ yeŋ wɔle?

15Ayiŋtena kaale ne takaa wɔ,

bɔɔ gyeŋ donɔɔ gbɛɛ ya.

16Tɛɛle keŋ ke gyoo yɛɛ tobaale diyiŋte e,

te ke gyoorobia ne di siŋkiti nebo nɛ ke dɛɛ laako.

17Tɛɛle keŋ ke gyoo yɛɛ gyoorobu e,

te ke gyoorobia ne dii debaŋ kpaakpaa man,

nyi baa nyiŋ doŋ, mɔna na baa dɛɛse ya nɛ keŋna nyeebam.

18Kebɔŋale ne yele deni ne lilii,

akpaa n te yɛɛ kolo lee ke man ya na ka nyeeman ne yale gyoo.

19Nɔɔkedi na mo boŋɛɛse kɔŋ,

soloŋ na mo kenyaŋee kɔŋ,

te kɔba ne yɛɛna kpene kamasɛ.

20Na falaa gyoo n nyeeman,

yaa n ke falaa kɔbate n deni tɔɔman ya,

nawolo nyi deni dana deŋela,