Nombiawolare 9

Balaŋ Pou Fareba

1Ma gyoo nombia kɛŋa pou man te me naawɔ nyi baŋ ba tenɛɛ na siakaralatena ayɛɛsa doo Wurubuarɛ nyiŋmaa man. Mɔna ŋolo ba gyeŋ nyi kegyae yaa kekɔla ne daana e ya. 2Fareba dokoloŋ doola fa denibalaŋ pou, baŋ ba tenɛɛ na akpanyanyaŋtena, baŋ ayimɛɛ be doo be man ya, na baŋ ayimɛɛ doo be man, baŋ bee deesi na baŋ bɔɔ ne deesi ya.

keŋ doo fa balaŋ kpaakpaa nɛ,

keŋ doola fa balaŋ kumɛɛ,

keŋ doo fa baŋ bɛɛ kaŋ ntam nɛ,

keŋ doola fa baŋ bee yee ntam kekaŋ.

3Kei yɛna nombiikum keŋ doo kpene kamasɛ man tɛɛle kei dɔɔ. Keŋ yɛna nyi denibalaŋ pou fareba yɛɛ dokoloŋ. Keŋ yɛna yeŋ. Keŋ be wulu balaŋ pou nyeempɔ man yɛna nombiakumɛɛ keyɛɛ. Ba kekyaabii man pou yɛɛ diteŋ nombia keyɛɛ, te kenaŋ wɔle na be te gyu woyadɛɛ. 4Walaŋ kamasɛ ŋon ɔ kyaa nyeedoŋ man dana lookegyakaa. Nawolo nyi babaa na ɔ sia gba dei kela dinaate deyeŋe.

5Nawolo nyi baŋ be kyaana be sia gyeŋ nyi baa yeŋ,

mɔna baŋ bɔɔ yekee ba gyeŋ daale ya.

Bɔɔ dana komketɔ daale bela ya,

balaŋ te wolee ba yela gba koraŋ.

6Ba kegyae na ba kekɔla,

be nuŋkurili keyoo te wulaa ŋaalaa,

bɔɔ tekaa kpuɛna kpene kamasɛ,

keŋ ne kɔŋ tɛɛle kei dɔɔ nɛ man bela ya.

7Gyu kedi n weenɛɛ gyoŋ man, na n ka mo kenyaŋee nyɔɔ n soloŋ. Nawolo nyi Wurubuarɛ te wulaa lɛɛ keŋ n be yɛɛ nɛ do. 8Do kegbase wolomɛɛ, na n ka mo nuŋ woli n nyee debaŋ kamasɛ. 9Weeya ŋan Wurubuarɛ be fa neŋ tɛɛle kei dɔɔ pou yɛɛ yakaa, mena dɔɔ ɛmɛɛna n wɛɛle gyaagyi ɛ di ɛ nɔɔ ɛ kekyaabii man pou. Nawolo nyi keŋ yɛna n dedii tɛɛle kei dɔɔ lee n kaale pou man. 10Kpene kamasɛ keŋ n mo n nyiŋmaa tina nyi n ke yɛɛ nɛ, mo n doŋ pou yɛɛ ke. Nawolo tom keyɛɛ na nombia kagyueŋ na nombia kagyeŋ na nyansa be kyaa woyadɛɛ keŋ de yɛɛ senaa nyaŋ ke gyu nɛ ya.

11Ma besewɔ naa kolo tɛɛle kei dɔɔ nyiaa,

keyeu te yɛɛ ɔsaatena wui ya,

yoo te yɛɛ doŋtena wui ya,

weenɛɛ te yɛɛ siakaralate wui ya,

wosekenyiŋ te yɛɛ siakaralatena wui ya,

te na nombia gyeŋara te bɛɛ boele ya,

mɔna debaŋ na gbɛɛ kenyiŋ ne kɔŋ fa be popou.

12Ŋolo ba gyeŋ ɔ debaŋ ya,

mena keŋ darawaa ne kyaŋ kpebii,

yaa kɔta ne kyaŋ gyebu nɛ,

mena te debaŋ kum ne tuŋlaa deniwalaŋ,

Nyansa Dei Kela Diyiŋ

13Ma besewɔ naa nyansa kolo tɛɛle kei dɔɔ keŋ yɛɛ kolo tuturu ke fa maŋ. 14Donɔɔ dinaabii daale kyaawɔ keŋ balaŋ kyomii kyaala ke man. Keŋte gyoo doŋte ŋolo korowɔ ke tɔ wɔ do na waa gyeŋ gyoo ke man. 15Na balee ŋolo kyaa donɔɔ dinaa kenaŋ man keŋ ɔ yɛɛ diyemte e mɔna ɔ sia te kare, te ɔ moo ɔ nyansa lɛɛ donɔɔ dinaa kenaŋ. Mɔna ŋolo te tɔɔse e ya. 16Mena dɔɔ me kpa, <<Nyansa dei kela doŋ.>> Mɔna bɔɔ na mo diyemte nyansa na ɔ nɔɔwoya yɛɛ kolo ya.

17Kaboena nyi baa tei siakaralate kekolosi dɛɛdɛɛ.

kela ayiŋtena gyoo yeesa kefae.

18Nyansa dei kela yoo abɔɔ,

mɔna dukumyɛɛre dokoloŋ waa tale wɔlɛɛ abɔɔ kpaakpaa burum.