Nombiawolare 8

1Amɔte yɛɛla ŋgba siakaralate nɛ?

Amɔte gyeŋana nombia man kalese?

Walaŋ nyansa ne yele ɔ ne booli ɔ sia,

na ɔ te kyɛɛkee ɔ sia kenyaŋee.

Bu Gyoo Ŋon

2Me kpa di gyoo mmaraase dɔɔ, nawolo nyi n kaŋa ntam Wurubuarɛ siaman. 3Na barase nyi n ka koro lee gyoo siaman ya. Na seŋ nombiikum wɔle ya, nawolo nyi waa tale yɛɛ kpene kamasɛ keŋ ɔ ne gyae. 4Gyoo nɔɔwoya dana yuŋ, mena dɔɔ amɔte ne gyaela waa tale bɔɔse e nyi, <<Woŋ yaa n ne yɛɛ?>>

5Ɔkamasɛ ŋon ɔ di ɔ mmaraa dɔɔ be gyae waa gyoo nombia man ya.

Siakaralate waa gyeŋ debaŋ kpaakpaa na gbɛɛ keŋ waa mo yɛɛ ke.

6Nawolo nyi debaŋ kpaakpaa kyaa te nombii kamasɛ dana gbɛɛ keŋ bɛɛ mo yako ke,

te walaŋ kewɔlɛɛ ta bese kasolɔ fa e.

7Ŋolo ba gyeŋ keŋ gyae kekɔŋ weedaale ya dɔɔ,

amɔte ne gyaela waa tale yako ŋolo keŋ gyae kekɔŋ?

8Ŋolo be dana doŋ feliŋ dɔɔ na waa tɔ ke gbɛɛ ya,

te ŋolo be dana doŋ ɔ yeŋ wee dɔɔ ya.

Bɔɔ ne fa yoonɔɔte gbɛɛ yoo wee ya,

te akpanyanyaŋ keyɛɛ be gyae ka lɛɛ ŋon ɔ ne yɛɛ ke ya.

9Me naa kɛŋa pou te ma moo ma nyeempɔ gyakaa abɔɔ ŋan bɛɛ yɛɛ tɛɛle kei dɔɔ. Nyi walaŋ de nyiŋ doŋ balaŋ dɔɔ na ɔ ne naase ɔ wose diyem. 10Keŋte ma besewɔ naa akpanyanyaŋtena kewuu, baŋ bɛɛ gyoo lee ɔsom deni fereŋkyeŋ keŋ man te bɛɛ kɛlɛɛ wɔ donɔɔ dinaa keŋ bɔɔ yɛɛ be nombiakumɛɛ nɛ. Kei mɔ yɛɛ yakaa.

11Akpaa be te bu nombiakumɛɛ yɛɛre fɔɔ bileŋ ya na, baale mɔ ne yɛɛ nombiakumɛɛ. 12Akpaa nyi akpanyanyaŋte ŋon ɔ be yɛɛ nombiakumɛɛ betabo sɔŋonoŋ (100) de kyaa kyare koraŋ nɛ, ma gyeŋ nyi gyae ke de fa baŋ bee yee Wurubuarɛ te bɛɛ mo obuo fa e nɛ. 13Keŋ akpanyanyaŋte bee yee Wurubuarɛ dɔɔ ya be gyae ke de fa e ya. Ɔ be gyae waa kyare ya ŋgba wɔŋtaa nɛ.

14Kolo daale kyaa tɛɛle kei dɔɔ keŋ ke yɛɛ yakaa. Baŋ ba tenɛɛ ne nyiŋ keŋ kaboena akpanyanyaŋtena, te akpanyanyaŋtena ne nyiŋ keŋ kaboena baŋ ba tenɛɛ. Me kpa kei mɔ yɛɛ yakaa. 15Mena dɔɔ ma te lɛɛ gyoŋkedi do. Nawolo nyi kolo kpaakpaa daale be kyaa fa deniwalaŋ tɛɛle kei dɔɔ kela keŋ waa di na waa nyɔɔ na waa nyaŋee ya. Kenaŋ na kenyaŋee gyae ke sila e lee ɔ kaale pou man weeya ŋan Wurubuarɛ be fa e tɛɛle kei dɔɔ.

16Ma keyɛɛ ma nyeempɔ nyi maa gyeŋ nyansa, na maa naa kpene keŋ deniwalaŋ ne yɛɛ tɛɛle kei dɔɔ nelim na ka weese keŋ ɔ bee nyiŋ dosoroŋ doo ya nɛ, 17te me naa ŋan pou Wurubuarɛ be yɛɛ. Ŋolo be tale gyeŋ abɔɔ kee gyubii tɛɛle kei dɔɔ ya. Keŋ na be kɛɛ yɛɛ kakyeŋ nyi baa gyoo ŋe man koraŋ nɛ, ŋolo be tale gyeŋ ka nawolo ya. Akpaa siakaralate de yako nyi ɔ gyeŋ koraŋ nɛ, ɔ be gyae waa tale nyii ke man koraŋ ya.