Nombiawolare 7

Nyansa

1Yele kpaakpaa dei kela lafenta ofoŋte,

te yeŋ wee dei kela lolo wee.

2Dekpaŋalaŋ keŋ man lia kyaa kegyu dei,

kela dekpaŋalaŋ keŋ man nɔɔkedi kyaa,

nawolo nyi yeŋ yɛna walaŋ kamasɛ ɔto,

ŋon ɔ kyaana ɔ sia waa mo ke do wa nyeempɔ man.

3Kemutii dei kela boŋɛɛse,

nawolo nyi waraŋase kewii ne yele walaŋ ne kasee kolo.

4Siakaralate konɔɔ doo waraŋase kedi dekpaŋalaŋ man,

mɔna diyiŋte konɔɔ doo bo nɔɔkedi dekpaŋalaŋ man.

5Dei nyi nyaa tei siakaralate kekalana,

kela n ke tei ayiŋtena nɔɔneŋ.

6Mena keŋ sɔɔse na potee boalaŋ man saabu ateta nɛ,

mena te ayiŋtena boŋɛɛse doo.

Kei mɔ yɛɛ yakaa.

7Walaŋ ka ŋere lɛɛ kolo ne yele siakaralate na bese diyiŋte,

te kolo kayolɛɛ ne wɔlɛɛ walaŋ nyeempɔ.

8Nombii ɔtoman dei kela ka kewalaŋ,

te konɔɔ kenyiŋ dei kela agaŋtaŋ.

9Na gyeŋ baŋ bileŋbileŋ ya,

nawolo nyi ayiŋtena konɔɔ man te baŋ doo.

10Na bɔɔse nyi, <<Weera te gyaŋgba dei kela nɛnɛɛ?>> ya.

Nawolo nyi ŋon ɔ bɔɔse mena te yɛɛ siakaralate e ya.

11Nyansa yɛɛ kolo kpaakpaa ke ŋgba dedii nɛ,

ke dana tɔnɔɔ fa baŋ be kyaa tɛɛle kei dɔɔ nɛ.

12Nyansa wuluŋ ne wuu walaŋ dɔɔ,

ŋgba mena keŋ kɔba ne wuu walaŋ dɔɔ nɛ,

mɔna keŋ dei nombia kagyeŋ man yɛna nyi,

Nyansa ne gyee baŋ be dana ke.

13Gyene abɔɔ ŋan Wurubuarɛ be yɛɛ.

Amɔte ne gyaela waa tale tenee,

kpene keŋ ɔ be goo nɛ?

14Nyi de dee fa neŋ na yela ke yɛɛ neŋ gyoŋ,

mɔna nyi te dee fa neŋ ya na gyueŋ ke man,

Wurubuarɛ yɛɛna kei,

ŋgba mena keŋ ɔ be yɛɛ kedɔɔ keŋ nɛ.

Mena dɔɔ ŋolo be tale gyeŋ,

kpene keŋ gyae kekɔŋ weedaale ya.

15Ma kekyaa yakaa kei man me naa abɔɔ ala kɛŋa,

baŋ ba tenɛɛ na yem be katenee man,

akpanyanyaŋtena ne kyaa kyare ba akpanyanyaŋ keyɛɛ man.

16Na yɛɛ n wose ŋon ɔ tenɛɛ beiŋ ya,

te na yɛɛ n wose siakaralate beiŋ ya.

weera te n na ko n wose?

17Na yɛɛ akpanyanyaŋ beiŋ ya,

te na yɛɛ diyiŋte ya,

weera n na ko n wose pɛ n debaŋ kelii?

18Dei nyi nya kyaŋ dokoloŋ man,

te na tina alate keŋ yela ya.

Ɔkamasɛ ŋon ɔ ne yee Wurubuarɛ waa di ŋa ala pou dɔɔ.

19Nyansa ne yele siakaralate dokoloŋ ne yɛɛ doŋ nideli,

kela kegyiise kufu donɔɔ dinaa man.

20Ke gbagba na ŋolo be kyaa tɛɛle dɔɔ keŋ ɔ tenɛɛ ya,

ŋolo bɛɛ yɛɛ keŋ tenɛɛ nyi ɔ bɛɛ yɛɛ dukum koraŋ ya.

21Na tei nombii kamasɛ keŋ balaŋ ne yako ya,

na mena ya nyaŋ kenyii nyi n tobaale ne falaa neŋ.

22Nawolo n gyeŋ n konɔɔ man,

nyi nyaŋ gbagba te falaa balaŋ agbaatee agbaatee.

23Ma moo nyansa gyoo kɛŋa pou man te me yakowɔ nyiaa,

<<Maa yɛɛ kakyeŋ kara sia,>>

mɔna ka kela maŋ bo.

24Nyansa man kenyii dana baŋ te ke dana siiliŋ,

amɔte ne gyaela waa tale naa ke man?

25Mena dɔɔ me yɛɛ ma nyeempɔ maa nyii nombia man,

na maa gyoo kɛo nyansa na abɔɔ kedoobii man,

keŋ dɔɔ balaŋ ne yɛɛ akpanyanyaŋ,

te bɛɛ yɛɛ diteŋ na diyiŋ nombia.

26Me naa keŋ dana ŋaŋ kela yeŋ,

alo ŋon yɛɛ kɔta ke,

ɔ konɔɔ yɛɛ kɔta ke,

ɔ nyiŋmaase yɛɛ agbaraagbaraase ŋa.

Baale ŋon ɔ nombia na gyoo Wurubuarɛ sia waa lee ɔ nyiŋmaa man,

mɔna dukumyɛɛre waa yala ɔ kɔta man.

27Wolare ŋon kpa, <<Kɛɛ, kei te me naawɔ,>>

<<Maa mo kolo dokoloŋ kpuna alate na maa naa abɔɔ man kedoobii.

28Ma kegyakaa mɛɛ kɛo,

keŋ mɔɔ te naa ya nɛ,

Me naa baale dokoloŋ ŋon ɔ gbɛɛneŋ tenɛɛ lee kakpoŋ man,

mɔna ma te naa alo dokoloŋ ŋon ɔ gbɛɛneŋ tenɛɛ be popou man ya.

29Kɛɛ, kei yɛna kpene keŋ mɔɔ naa,

Wurubuarɛ yɛɛ denibalaŋ na ba tenɛɛ,

mɔna baŋ gbagba gyaena adao gbɛɛneŋ burum fa ba wose.>>