Nombiawolare 6

1Me naa nombiikum daale bela tɛɛle dɔɔ, keŋ ne naase denibalaŋ diyem. 2Wurubuarɛ ne fa ŋolo wosekenyiŋ na kede na obuo keŋ nyi kpene kamasɛ keŋ ɔ ne gyae na ɔ ne nyiŋ ke. Mɔna Wurubuarɛ bɛɛ fa e doŋ waa di ŋa gyoŋ ya, te ŋɔɔle ne kaa diina ŋa gyoŋ. Kei mɔ yakaa na nombiikum ke.

3Nyi ŋolo da lola bia sɔŋonoŋ (100) te ɔ di kulutooneŋ burum te ɔ ŋmɛɛ senaa te ɔ te di ɔ kede keŋ ŋaale ya, te ɔ te nyiŋ lia nideli mɔ ya nɛ, kenaŋ na bu ŋon bɔɔ lese e tɔɔ koraŋ dei kela e. 4Mena bu ŋonaŋ kalola yɛɛ yakaa. Ɔ ne ŋaalaa bo detiŋtɛɛ man na detiŋtɛɛ kenaŋ te wuu ɔ yele dɔɔ. 5Doo nyi ɔ te naa weese ya te ɔ ba gyeŋ kolo mɔ ya, mɔna waa fɛɛfo kela walaŋ ŋon. 6Nyi walaŋ ŋon de di kulutooneŋ kakpoŋ kakpoŋse koraŋ te ɔ te di ɔ kede abɔɔ ya na, te yɛɛ yenaŋ dokoloŋ te be popou ne gyu yee?

7Walaŋ kaale pou yɛna ɔ nyiŋmaa kegyu ɔ nɔɔman,

mɔna keŋ ne gyɔ e loo bɛɛ baa e korakora ya.

8Woŋ te siakaralate moowɔ kela diyiŋte?

Woŋ te diyemte,

ŋon ɔ gyeŋ ɔ wose katela balaŋ man ne nyim?

9Kpene keŋ n sibii ne naa dei,

kela n ke gyakaa kpene keŋ n bɛɛ naa ya nɛ loo.

Kei mɔ yɛɛ yakaa,

ke yɛɛ feliŋ kegegi ke.

10Kpene kamasɛ keŋ kyaa nɛ wulaa ke dana yele,

te be wulaa gyeŋ ŋon deniwalaŋ yɛɛ,

ŋolo be tale seŋ walaŋ ŋon,

ɔ dana doŋ kela e nɛ siaman ya.

11Kekolosi burum,

ne wɔlɛɛ nombia,

tɔnɔɔ woŋti doola ke man?

12Nawolo nyi amɔte gyeŋana kpene keŋ dei fa deniwalaŋ ɔ kekyaabii man, lee weeya kyomii ŋan yɛɛ yakaa te ŋɛɛ lam ŋgba wɔŋtaa nɛ? Amɔte ne gyaela waa tale yako wɔ kpene keŋ gyae kekɔŋ tɛɛle kei dɔɔ lee ba yeŋ wɔle?