Nombiawolare 5

N Sɛɛ Wurubuarɛ Kom Na Di Ke Dɔɔ

1Akpaa n ne gyu Wurubuarɛ Ɔsom Deni Dinaa man na gyeŋ keta. Tuu benaa Wurubuarɛ na n ke tei ɔ nombia. Keŋ dei kela n ke deesi ŋgba diyiŋte ŋon ɔ ba gyeŋ nyi ɔ ne yɛɛ dukum ya nɛ.

2Gyueŋ nombia man nideli pɛ ŋe ka lee n nɔɔman,

na barase lee n konɔɔ man,

sɛɛ Wurubuarɛ kom ya.

Wurubuarɛ kyaa adido,

te nyaŋ kyaa tɛɛle dɔɔ,

mena dɔɔ yela n nɔɔwoya ke yɛɛ keree.

3N gyueŋ burum na n na mo gyu dosɛɛ man,

te kekolosi burum na lese diyiŋ debɔɔ.

4Nyi n sɛɛ Wurubuarɛ kom nɛ, kɛɛ na n ke tɔ ke bileŋ. Nawolo nyi ayiŋtena nombia bɛɛ gyoo ɔ sia ya, di kom keŋ n be sɛɛ nɛ dɔɔ. 5Nyi n te sɛɛ kom ya na dei kela, keŋ n ke sɛɛ kom na n te tɔ ke ya. 6Na yele n nɔɔ ka mo neŋ gyu dukum man ya. Na yako Wurubuarɛ ɔsom deni dinaa man sae ŋon nyi, <<Ka toŋae lee me nɔɔman ya.>> Woŋ dɔɔ te Wurubuarɛ ba gyeŋ baŋ do neŋ, na waa wɔlɛɛ n nyiŋmaa man tom ya? 7Dosɛɛ burum na nɔɔwoya burum yɛɛ yakaa. Mena dɔɔ yee Wurubuarɛ.

Wosekenyiŋ Yɛɛ Yakaa

8Akpaa n naa nyi bɛɛ ŋere diyemte ŋolo do yenaŋ daale, te be bɛɛ bɔɔ di nombia na kegbɛɛ na katenee man fa e ya nɛ, na yele ke yɛɛ neŋ gyakoloŋ ya. Nawolo nyi gyoo ŋon ɔ ne yɛɛ mena nɛ mɔ dana kegyia, te kegyiise baale mɔ kyaa keŋ ba kela be bala pou. 9Balaŋ baŋ pou ne kpala keŋ ba lee tɛɛle keŋ man, gyoo gbagba koraŋ ne nyiŋ tɔnɔɔ lee wɔɔse ŋan man.

10Ɔkamasɛ ŋon ɔ ne gyae kɔba nɛ ke bɛɛ baa e ya,

ɔkamasɛ ŋon ɔ ne gyae wosekenyiŋ nɛ, keŋ ɔ nyim bɛɛ baa e ya.

Kei mɔ yɛɛ yakaa.

11Mena keŋ weenɛɛ ne wuku nɛ,

mena te diira mɔ na boo.

Tɔnɔɔ woŋti te kpenete ŋon ne nyim,

kela keŋ waa mo ɔ sia deelee ŋa?

12Nyi paate de dii kyomii yaa burum nɛ,

ɔ ne doo dosoroŋ nideli,

mɔna kɔbate kɛɛ wɔlɛɛ lee wa abɔɔ dɔɔ,

ɔ bee nyiŋ dosoroŋ doo ya.

13Me naa nombiikum tɛɛle kei dɔɔ,

baale yilaa dedii burum see te ŋe kaa bese kaale be dɔɔ.

14yaa wosekenyiŋ keŋ wɔlɛɛwɔ lee tomkum man,

mena dɔɔ dedii daale te kaa fa,

be bia ya,

15Walaŋ kamasɛ lee ɔ naa tɔɔman deteŋteli bo kɔŋ,

mena ke te waa bese gyu,

Ɔ be gyae waa mo kolo lee ɔ kaale man,

tela gyu ya.

16Kei mɔ yɛɛ nombiikum daale ke.

Mena keŋ walaŋ kamasɛ be kɔŋ nɛ, mena ke te waa bese gyu,

woŋ tɔnɔɔ te be nyiŋawɔ,

lee be kaale keŋ bɔɔ kaa leki nɛ man?

17Be dii ba weeya pou bo detiŋtɛɛ,

na weeleŋ na katoroŋ na baŋ man.

18Keŋ maŋ be naa nyi ke dei te ke kaboena yɛna nyi, walaŋ waa di na waa nyɔɔ na waa nyaŋee lee tom keŋ ɔ be yɛɛ weeya kyomii ŋan Wurubuarɛ be fa e tɛɛle kei dɔɔ nɛ man. Nawolo nyi kei yɛna ɔ wui dedii. 19Nyi Wurubuarɛ de fa ŋolo wosekenyiŋ na kede, te ɔ fa e doŋ nyi waa di ɔ wui dedii na waa nyaŋee lee ɔ kaale man nɛ, na ke yɛɛ Wurubuarɛ kolo anefaŋ ke. 20Bɔɔ na tekaa gyueŋ weeya ŋan bɔɔ kyaa tɛɛle kei dɔɔ bela ya, nawolo nyi Wurubuarɛ te yele bɛɛ nyaŋee lee be konɔɔse man.