Nombiawolare 4

Kaŋeredo na kaale te gyoo nombia be kyaa ya

1Ma besewɔ to me sia kɛɛ, te me naa mena keŋ bɛɛ ŋere balaŋ do tɛɛle kei dɔɔ.

Me naa baŋ bɔɔ ŋere wɔ do nɛ siasaraŋ,

mɔna bɔɔ dana ŋon waa kyɔlɛɛ wɔ ya.

Baŋ bɛɛ ŋere wɔ do nɛ nyiŋmaa man te doŋ doo,

mɔna baŋ bɔɔ ŋere wɔ do nɛ be dana ŋon waa kyɔlɛɛ wɔ ya.

2Keŋte me yakowɔ nyiaa,

baŋ bɔɔ wulaa yekee nɛ,

te yɛɛ nyeebam kela,

baŋ be sɛɛ be kyaa nyeedoŋ man nɛ.

3Mɔna ŋon ɔ wui dei kela be bala pou,

yɛna ŋon be ta lolata e ya,

ŋon ɔ te naata nombiakumɛɛ,

ŋan bɛɛ yɛɛ tɛɛle kei dɔɔ ya nɛ.

4Te me naawɔ nyiaa, nuŋkurili dɔɔ te walaŋ ne naase ɔ wose diyem yɛɛ tom. Kei mɔ yɛɛ yakaa na feliŋ kegegi ke.

5Diyiŋte ne bɔɔtaa ɔ nyiŋmaase do ɔ yoolaase man,

na ɔ ta mo ɔ wose do kayeyɛɛ man.

6Kolo nyiŋmaatɔɔ keŋ wosefɛɛreŋ doo ke man dei kela,

nyiŋmaatɔɔse ala keŋ kaale doo ke man,

kei mɔ yɛɛ yakaa na feliŋ kegegi ke.

7Ma besewɔ naa kolo keŋ ke yɛɛ yakaa tɛɛle kei dɔɔ.

8Walaŋ ŋolo kyaawɔ waageŋ kooŋ,

ɔ be dana bu tobaale yaa naabu ya.

Ɔ yɛɛ tom keŋ ɔ bɛɛ fɛɛfo ya,

mɔna dedii keŋ ɔ dana bɛɛ gyoo ɔ sia ya.

Ɔ te bɔɔse ɔ wose nyi, <<Amɔte yaa mɛɛ kaa maa see,

te mee wuritii ma wose keŋ mɔɔ ne di me nɔɔ ya?>>

Kei mɔ yɛɛ yakaa,

na feliŋ kegegi ke.

9Balaŋ bala dei kela walaŋ dokoloŋ,

nawolo nyi baa nyiŋ kolo kpaakpaa lee be kaale man.

10Nyi be man ŋolo da lee yala na,

balate ŋon waa gate e.

Mɔna ŋon ɔ yale waageŋ,

te ŋolo be kyaa waa gate e ya na waa laako.

11Mena mɔ te nyi balaŋ bala doo mataana dɔŋa na ba wose ne laŋe wɔ.

Sena te walaŋ dokoloŋ waa tale laŋe ɔ wose?

12Baa tale di walaŋ dokoloŋ dɔɔ,

mɔ nyi be yɛɛ bala na baa tale lɛɛ ba wose.

Ŋmeleŋ keŋ bɔɔ ŋmɛ ke debodokoloŋ atooro dana ketira baŋ.

Kakyeŋ kado yɛɛ yakaa

13Tobaale diyemte ŋon ɔ sia be kare dei kela gyoo diyiŋte ŋon ɔ bee nyii kekolosifa ya. 14Tobaale ŋon bɔɔ tɔ e deni yaa ŋon bɔɔ lola e diyem man waa tale kaa di gyoori. 15Me naawɔ nyi baŋ pou be kyaa tɛɛle kei dɔɔ silana tobaale ŋon waa kaa kyaa gyoo ŋon nawɔɔ man nɛ. 16Ŋolo be tale kala baŋ pou bɔɔ kyaa pɛte ŋon be kɔŋ nɛ ya. Mɔna baŋ bɔɔ kɔŋ wɔle wɔle nɛ be gyae baa gyae ɔ nombia ya. Kei mɔ yɛɛ yakaa na feliŋ kegegi ke.