Nombiawolare 3

Kpene Kamasɛ Dana Ka Debaŋ

1Debaŋ kyaa fa kpene kamasɛ,

te kpene kamasɛ keyɛɛ dana ka debaŋ tɛɛle kei dɔɔ.

2Kalola dana ka debaŋ te yeŋ dana ka debaŋ,

abɔɔ keduu dana ka debaŋ te abɔɔ kekɛrɛɛ dana ka debaŋ.

3Walaŋ kako dana ka debaŋ te walaŋ kekyɔ dana ka debaŋ,

kolo ketekerii dana ka debaŋ te kolo kema dana ka debaŋ.

4Kewii dana ka debaŋ te boŋɛɛse dana ka debaŋ,

waraŋsa kedi dana ka debaŋ te sɔɔre dana ka debaŋ.

5Boya keyaasee dana ka debaŋ te boya keyilaa dana ka debaŋ,

balaŋ kepukaa dana ka debaŋ te balaŋ man ketira dana ka debaŋ.

6Kolo kekɛo dana ka debaŋ te kolo ketina yela dana ka debaŋ,

kolo ka mo see dana ka debaŋ te kolo kefuŋ leki dana ka debaŋ.

7Ketirii dana ka debaŋ te keŋara dana ka debaŋ,

kekyaa yididi dana ka debaŋ te kekolosi dana ka debaŋ.

8Kegyae dana ka debaŋ te kekɔla dana ka debaŋ,

yoo dana ka debaŋ te wosefɛɛreŋ dana ka debaŋ.

9Tɔnɔɔ woŋti te tomyɛɛre ne nyim lee ɔ kaale man? 10Ma te naa kaale keŋ Wurubuarɛ ba mo lɔ denibalaŋ dɔɔ. 11Ɔ yɛɛ kpene kamasɛ nideli ka debaŋ man. Ɔ yela denibalaŋ gyeuŋwɔ abɔɔ ŋan ŋe kyaa kekpaakekpaa nɛ be konɔɔse man, mɔna ŋolo be tale gyeŋ keŋ Wurubuarɛ be yɛɛ lee kewalaŋ kelii kɔ ɔto ya. 12Ma te naa nyi kolo kpaakpaa daale be kyaa fa deniwalaŋ kela keŋ waa nyaŋee na waa yɛɛ abɔɔ kpaakpaa ɔ kekyaabii man pou ya. 13Nyi walaŋ de dii te ɔ nyɔɔ te ɔ di gyoŋ ɔ kekyaabii man na ke yɛɛ Wurubuarɛ faa na e. 14Ma gyeŋ nyi kpene kamasɛ keŋ Wurubuarɛ be yɛɛ gyae ke kyaa kekpaakekpaa, ŋolo be tale mo kolo kpu ya te ŋolo be tale lese kolo lee ke man ya. Wurubuarɛ yɛɛna ke mena na balaŋ ke nyiŋ yee e.

15Kpene keŋ kyaa gyɛŋ nɛ te wulaa kyaa kaalaŋ,

kpene keŋ gyae ke kɔŋ nɛ wulaa ke kyaa,

te Wurubuarɛ waa yela ŋan be kɔŋ laŋ nɛ ka bese kɔŋ.

16Ma besewɔ naa kolo tɛɛle kei dɔɔ,

nombia dedii man nɛ, akpanyanyaŋ nombia kyaa botɔɔ,

nombia ŋan doona ŋe gbɛɛ dedii man nɛ, akpanyanyaŋ nombia kyaa botɔɔ.

17Me yako ma wose nyiaa,

<<Wurubuarɛ waa di balaŋ nombia,

baŋ be gbɛɛneŋ tenɛɛ na akpanyanyaŋtena pou,

nawolo nyi debaŋ kyaa fa tom kamasɛ,

debaŋ kyaa keŋ baa di da ayɛɛsa pou nombia.

18Me yakowɔ me konɔɔ man nyiaa, <<Wurubuarɛ ne kɛɛse wɔ bo kɛɛ na baa naa nyi be yɛɛ ŋgba wonembia nɛ. 19Ke yɛɛ ampaŋ nyi denibalaŋ na wonembia pou fareba yɛɛ dokoloŋ, te fareba dokoloŋ kenaŋ doola fa be popou. Mena keŋ walaŋ na yem nɛ, mena te wonembu mɔ na yem. Weesɛɛ dokoloŋ doola be popou man. Deniwalaŋ ba kela wonembu ya. Ŋe popou yɛɛ yakaa. 20Be popou ne gyu debodokoloŋ, be popou lee tɛɛle man, tɛɛle man te baa bese gyu. 21Amɔte gyeŋala nyi deniwalaŋ weesɛɛ na gyem gyu adido, te wonembia weesɛɛ ne tisi gyu tɛɛle man?>>

22Mena dɔɔ ma te naa nyi kolo kpaakpaa daale be kyaa fa deniwalaŋ kela nyi, waa yɛɛ tom na waa nyaŋee lee keŋ ɔ be nyim lee ɔ tom man nɛ ya. Nawolo nyi amɔte ne gyaela waa besena wɔ kɔŋ na be kaa naa kpene keŋ gyae ke kɔŋ ba yeŋ wɔle?