Nombiawolare 2

Siakagye Yɛɛ Yakaa

1Me yakowɔ ma nyeeman nyiaa, <<Kɔŋ, na maa mo gyoŋ kedi kɛɛse neŋ kɛɛ keŋ dei.>> Mɔna keŋ mɔ yɛɛ yakaa. 2Me yakowɔ nyiaa, <<Boŋɛɛse yɛɛ diteŋ ke. Woŋ te gyoŋ kedi na mo kɔŋ?>> 3Me yɛɛ ma nyeempɔ nyi maa mo soloŋ gye me sia na maa yɛɛ diyiŋ nombia. Na ma nyeempɔ sɛɛ silana nyansa nombia. Me gyaewɔ maa gyeŋ kpene keŋ dei fa denibalaŋ weeya kyomii keŋ baa kyaa tɛɛle kei dɔɔ nɛ.

4Me yɛɛ tomse dinaana. Me baŋee denɛɛ fa ma wose te me fara gerepo wɔɔse. 5Me yɛɛ wɔɔsebia na botɔɔ keŋ baa kyaa lɛɛ feliŋ te me duu daase kpookpoo ŋan na se bia nɛ ŋe man. 6Me wulii atiribuŋse na maa mo ŋa loŋ ŋmatee daase bia ŋan ne tuu nɛ. 7Me lɛɛ gbeŋa ala na baala, te ba lolee gbeŋa baale ma dekpaŋalaŋ man. Me dana nunkyuese na namense kela baŋ pou bɔɔ kyaa Yerusalɛm kaalaŋ pɛte maŋ be kɔŋ nɛ. 8Me yilaa kɔba wolom na kɔba yayam na gyooro abɔɔ na tɛɛlese fa ma wose. Me yilaa ala na baala nɔɔneŋ kpeera. Me dana ŋan pou kaboena nyi baale waa nyiŋ te me dana diidɔɔna burum. 9Me kaa lɛɛ yele kela baŋ pou bɔɔ kyaa Yerusalɛm pɛte maŋ be kɔŋ nɛ. Kɛŋa pou man nɛ na me dana nyansa nideli.

10Kpene kamasɛ keŋ me naa te mɛɛ gyae na mee nyiŋ ke.

Ma te bɛɛse ma wose kpene keŋ ne gyɔ maŋ loo ya.

Me konɔɔ nyaŋeewɔ me kaale pou man,

te kei yɛna tɔnɔɔ keŋ mɔɔ nyim lee me kaale pou man.

11Mɔ ma too me sia kɛɛ ŋan pou mɔɔ yɛɛ,

na ŋan pou mɔɔ nyim lee me kaale man nɛ,

ŋe popou yɛɛ yakaa, ke yɛɛ feliŋ kegegi ke,

tɔnɔɔ kamasɛ be doo ŋe man tɛɛle kei dɔɔ ya.

Nyansa na Diyiŋ Yɛɛ Yakaa

12Keŋte me kyɛɛkee ma nyeempɔ nyi maa kɛo nyansa,

na diteŋ nombia na diyiŋ nombia,

Woŋ te ŋon ɔ be di gbeli ŋolo wɔle nɛ waa yɛɛ,

kela keŋ bɔɔ wulaa yɛɛ kaalaŋ nɛ?

13Me naawɔ nyi nyansa dei kela diyiŋ,

ŋgba mena keŋ keŋmaŋee dei kela detiŋtɛɛ nɛ.

14Nyansatena dana sia be nyeeya man,

te ayiŋtena dɔŋ bo detiŋtɛɛ man,

mɔna me kaa gyenewɔ nyiaa,

nombii dokoloŋ kenaŋ ne yalana be popou.

15Keŋte me yako ma wose nyiaa,

<<Nombii keŋ be yala diyiŋte nɛ gyae ke yala maŋ mɔ,

kenaŋ na woŋ tɔnɔɔ te maa nyiŋ lee nyansa kenyiŋ man?>>

Me yako ma wose nyiaa,

<<Kei mɔ yɛɛ yakaa.>>

16Siakaralate na diyiŋte pou, bɔɔ gyae baa tɔɔse wɔ kekpaakekpaa ya,

weeya ne kɔŋ keŋ be taŋ ke wolee be popou.

Siakaralate mɔ waa yeŋ ŋgba diyiŋte nɛ.

Kaale Yɛɛ Yakaa

17Mena dɔɔ me kɔla tɛɛle kei dɔɔ kekyaa, nawolo nyi tomse ŋan bɛɛ yɛɛ tɛɛle kei dɔɔ na mo kayeyɛɛ bo kɔna maŋ. Ŋe popou yɛɛ yakaa, ke yɛɛ feliŋ kegegi ke. 18Me kɔla abɔɔ ŋan pou mɔɔ naa diyem nyiŋ tɛɛle kei dɔɔ nɛ, nawolo nyi maa tina ŋa yela see ŋon waa di ma abɔɔ nɛ. 19Amɔte gyeŋala nyi ɔtenate waa yɛɛ siakaralate yaa diyiŋte? Mɔna ŋon ne gyaela waa di ma abɔɔ ŋan mɔɔ naa diyem yɛɛ kakyeŋ gyae tɛɛle kei dɔɔ nɛ. Kei mɔ yɛɛ yakaa. 20Mena dɔɔ takaa maŋ lee ŋan pou mɔɔ naa diyem yɛɛ tom gyae see tɛɛle kei dɔɔ nɛ. 21Nawolo nyi kaboena nyi walaŋ waa tina ŋan pou ɔ be naa diyem mo ɔ nyansa na ɔ nombia kagyeŋ na wa adaose gyae nɛ see walaŋ ŋon ɔ te naa diyem ya nɛ. Kei mɔ yɛɛ yakaa na nyeekum dinaa. 22Woŋ te walaŋ ne nyim lee ɔ kaale na diyem keŋ ɔ be naa tɛɛle kei dɔɔ nɛ man? 23Ɔ kekyaabii man pou yɛɛ waraŋase kewii na kaale ke, nelim koraŋ na ɔ wɔe bɛɛ fɛɛ e ya. Kei mɔ yɛɛ yakaa.

24Walaŋ be tale yɛɛ kolo kela keŋ waa di na waa nyɔɔ, na ɔ wɔe ke fɛɛ e lee keŋ ɔ be kaa nyiŋ nɛ man ya. Kei mɔ me naawɔ nyi ka lee Wurubuarɛ gyaŋ. 25Nawolo nyi na ŋon ya na, amɔte ne gyaela waa tale di na waa nyaŋee ɔ wose man? 26Walaŋ ŋon ɔ nombia na gyoo Wurubuarɛ sia nɛ, ŋon te ɔ ne fa nyansa na nombia kagyeŋ na gyoŋkedi. Mɔna dukumyɛɛre dɔɔ, Wurubuarɛ ne yele ɔ ne naa diyem gyae abɔɔ yilaa see na ŋon Wurubuarɛ ka mo ŋa fa ŋon ɔ nombia na gyoo ɔ sia nɛ. Kei mɔ yɛɛ yakaa na feliŋ kegegi ke.