Nombiawolare 1

Kpene Kamasɛ Yɛɛ Yakaa

1Dawide bu Nombiawolare ŋon ɔ be di gyoori Yerusalɛm nɛ nombia yaa.

2Nombiawolare ŋon kpa,

<<Ke yɛɛ yakaa, Ke yɛɛ yakaa.

Ke yɛɛ yakaa man yakaa,

Kpene kamasɛ yɛɛ yakaa.>>

3Tɔnɔɔ woŋti te walaŋ ne nyim lee kaale,

keŋ pou ɔ ne kaa tɛɛle kei dɔɔ nɛ man?

4Kalola kegyakaarese ne kɔŋ, na kalola kegyakaarese te lam,

mɔna tɛɛle doo kakedoobii kekpaakekpaa.

5Weese na lee na weese ta gyoo,

na ɔ te yɛɛ bileŋ bese gyu ɔ dɛɛlee man.

6Feliŋ ne gyɔɔ gyu atayenaŋ,

na ta besena gyu adoyenaŋ,

kee fiili fiili,

na ke ta bese kɔŋ ke wɔle.

7Booneŋ pou ne gyu ka gyoo ɛpo man,

mɔna ɛpo bee wulu korakora ya.

Botɔɔse ŋan booneŋ na lee nɛ,

botɔɔ te ŋɛɛ bese gyu bela.

8Kpene kamasɛ yɛɛ kaale ke,

keŋ walaŋ be tale yako ya.

Kolo kekɛɛ bɛɛ baa sibii ya,

te kolo kenyii bee wulu deŋele ya.

9Kpene keŋ be kyaa kaalaŋ nɛ gyae ka bese kyaa bela,

kpene keŋ bɔɔ yɛɛ kaalaŋ nɛ baa bese yɛɛ ke bela,

kolo wɔle daale be kyaa tɛɛle kei dɔɔ ya.

10Kolo kyaa keŋ ŋolo waa tale yako nyi,

<<Kɛɛ, kei yɛɛ kolo wɔle ke>>?

Ke wulaa kyaa lee gyaŋgba gyaŋgba,

ke kyaa pɛte ba lola daa.

11Ŋolo bɛɛ tɔɔse gyaŋgba kalola kegyakaare keŋ ya,

te baŋ be ta lolata wɔ koraŋ ya nɛ,

be wɔletena gba be gyae baa tɔɔse wɔ ya.

Nyansa Yɛɛ Yakaa

12Maŋ wolare ŋon, me dii gyoori Iserae dɔɔ Yerusalɛm. 13Me bakewɔ ma nyeeman nyi maa mo nyansa kɛo na maa gyoo ŋan pou bɛɛ yɛɛ tɛɛle kei dɔɔ nɛ man. Kɛɛ kasolɔ yuŋte keŋ Wurubuarɛ ba mo lɔ deniwalaŋ dɔɔ. 14Ma too me sia kɛɛ ŋan pou deniwalaŋ ne yɛɛ tɛɛle kei dɔɔ nɛ ŋe popou yɛɛ yakaa. Yɛɛ yaa ŋgba feliŋ kegegi nɛ.

15Kpene keŋ be goo nɛ, bɔɔ tale tenee ke ya,

kpene keŋ be doo ya nɛ, bɔɔ tale kala ke ya.

16Me yako ma wose nyiaa, <<Kɛɛ, me te gyu siaman nyansa man kela baŋ pou bɔɔ di gyoori Yerusalɛm pɛte maŋ be kɔŋ nɛ. Ma gyeŋ kpene keŋ nyansa na nombia kagyeŋ yɛɛ.>> 17Keŋte me yɛɛ kakyeŋ nyi maa gyeŋ keŋ yɛɛ nyansa na diteŋ kagyoo na diyiŋ nombia. Mɔna me naawɔ nyi yɛɛ yaa ŋgba feliŋ kegegi nɛ.

18Nawolo nyi nyansa burum na mo waraŋsa kedi burum kɔŋ.

nombia kagyeŋ burum na mo waraŋase kedi burum kɔŋ.