Nɔɔneŋ Man Nɔɔneŋ 8

1Ao, nafɔ nyeŋ yɛɛ me ŋmɛɛtee e,

ŋon ɔ be ŋmase me naa dide.

Nafɔ me naa neŋ abɔntere man nɛ,

maa kyokyoe n nɔɔ,

keŋ ŋolo be tale yako maŋ kolo ya.

2Maa ta n siaman,

na maa mo neŋ kɔŋ me naa dɛɛ,

ŋon yɛna ŋon ɔ be kɛɛle maŋ.

Maa fa neŋ waen keŋ bɔɔ mo daase ofoŋnyiŋan do ke man n ke nyɔɔ,

keŋ bɔɔ ŋmaase lee maŋ gbagba me oboroni akotaa man.

3N demena nyiŋmaa gyae ke doo ma nyee ateta,

na n dunoluŋ nyiŋmaa ke baraa maŋ.

4Yerusalɛm alebia, ma te kɛɛ fa ŋon,

ɛ na gyuusu yaa ɛ ke wosi kegyae ya,

kelii debaŋ keŋ kɛɛ gyae.

Gyoona

5Amɔte leela depampaa keŋ man ɔ ne kɔŋ,

te ɔ mataana ɔ diidɔɔ gyaagyi nɛ?

Alo

Atɔ daŋ tɛɛ te me gyuusu neŋ,

botɔɔ te n naa kyaŋa neŋ fulu,

botɔɔ te ŋon ɔ ba doŋee nɛ lola neŋ.

6Mo maŋ do n konɔɔ man ŋgba nɔɔketɔ nɛ,

ŋgba n baam dɔɔ nɔɔketɔ nɛ,

nawolo nyi kegyae dana doŋ ŋgba yeŋ nɛ,

ke nuŋkurili bɛɛ baa ya ŋgba yebɔɔ nɛ.

Kɛɛ kpaa ŋgba boalaŋ degyapaa nɛ,

ŋgba boalaŋ laakem melimeli nɛ.

7Loŋse burum be gyae ke tale ko kegyae ya,

booneŋ be gyae ke tale waale ke ya.

Nyi ŋolo da mo,

ɔ dekpaŋalaŋ man dedii pou fa lee kegyae dɔɔ nɛ,

baa boŋo e bo.

Gyoona

8De dana deesi kemaasabii,

ŋon ɔ te gyɔɔta ade ya.

Akpaa ŋolo de kɔŋ nyi waa yala e na,

woŋ te dɛɛ yɛɛ fa de deesi ŋon?

9Nyi ɔ yɛɛ dekyaŋ ke na,

dɛɛ baŋ kɔba wolom dekagya kilisi ke.

Nyi ɔ yɛɛ disim ke na,

dɛɛ mo sida daase baŋee kilisi e.

Alo

10Na me yɛɛ dekyaŋ ke,

te nɛnɛɛ ma ade yɛɛ ŋgba akagyase nɛ.

Ɔ ne kɛɛ maŋ nyi,

me yɛɛ walaŋ ŋon ɔ na mo wosefɛɛreŋ kɔŋ.

11Solomɔn dana gerepo wɔɔ Baa Hamɔn,

ɔ moo ɔ gerepo wɔɔ keŋ do paasetena nyiŋmaa man.

Nyi ɔkamasɛ waa mo kɔba wolombia kakpoŋ,

kaa tɔ gerepo ŋan kom.

12Maŋ gbagba me gerepo wɔɔ yɛɛ me wui,

kɔba wolombia kakpoŋ keŋ yɛɛ nyaŋ Solomɔn wui,

te sɔŋonoŋse ala yɛɛ paasetena baŋ wui.

Baale

13Nyaŋ ŋon n kyaa wɔɔsebia ŋan man,

me gyoona ne tei neŋ,

yela maa nyii n woya.

Alo

14Me diidɔɔ gyaagyi, yɛɛ ɔsaa kɔŋ,

yɛɛ ŋgba ɔkyoeŋ,

yaa ŋaa bu,

ŋon ɔ gyakaa teeneŋ ofoŋnyiŋan bula dɔɔ nɛ.