Nɔɔneŋ 115

Degbeŋgyoo yɛna Wurubuarɛ gbagba

1Na daa ya, Ao Degbeŋgyoo, na daa ya,

mɔna n yele te gyoorobiiri kaboena,

lee n kegyae na nya anokoare kedi dɔɔ.

2Woŋ dɔɔ te tɛɛlese ne bɔɔse nyi,

<<Be Wurubuarɛ kyaa aleŋ?>>

3De Wurubuarɛ kyaa adido,

ɔ ne yɛɛ kpene kamasɛ keŋ ɔ gyae.

4Mɔna be banɛɛ yɛna kɔba wolom na kɔba yayam,

denibalaŋ nyiŋmaase yɛɛna ŋa.

5Be dana nɔɔse mɔna bɔɔ ne kolosi ya,

be dana sia mɔna bɔɔ ne naa ya.

6Be dana deŋela mɔna bɔɔ ne nyii ya,

be dana memɔɔse, mɔna bɔɔ ne wɔm nyii ya.

7Be dana nyiŋmaase, mɔna bɔɔ ne tina kolo ya,

be dana naawɔɔ, mɔna bɔɔ ne tɛɛ ya,

te bɔɔ na mo be lokotɛɛse fae yeesa ya.

8Baŋ bɔɔ yɛɛ wɔ nɛ, baa yɛɛ ŋgba baŋ nɛ,

mena te baŋ pou bɛɛ mo ba wose lɔ be dɔɔ nɛ baa yɛɛ.

9Ɛmɛɛ Iseraetena pou, ɛ mo ɛ wose lɔ Degbeŋgyoo dɔɔ.

ŋon yɛna be kyɔɔre na be yoo nyeele pampasaŋ.

10Aarɔn dekpaŋalaŋmantena, ɛ mo ɛ wose lɔ Degbeŋgyoo dɔɔ,

ŋon yɛna be kyɔɔre na be yoo nyeele pampasaŋ.

11Ɛmɛɛ baŋ ɛ ne yee Degbeŋgyoo nɛ, ɛ mo ɛ wose lɔ ɔ dɔɔ,

ŋon yɛna be kyɔɔre na be yoo nyeele pampasaŋ.

12Degbeŋgyoo ne tɔɔse daa, te waa hiraa daa.

Waa hiraa ɔ balaŋ Iseraetena,

waa hiraa Aarɔn dekpaŋalaŋmantena,

13waa hiraa baŋ bee yee Degbeŋgyoo nɛ,

bia na kegyiise pou.

14Degbeŋgyoo waa yela ɛ ke wuku,

ɛmɛɛ na ɛ bia pou.

15Degbeŋgyoo waa hiraa ŋon,

ŋon yɛɛna adido na tɛɛle.

16Adido adido yɛɛ Degbeŋgyoo wui,

mɔna ɔ ta mo tɛɛle fa denibalaŋ.

17Na woya na lesena Degbeŋgyoo yele ya,

te baŋ bɔɔ tisi gyu woyadɛɛ nɛ bɛɛ lese ɔ yele ya.

18Mɔna daa dɛɛ lese Degbeŋgyoo yele,

lee gyɛŋ kelii kekpaakekpaa.

Ɛ lese Degbeŋgyoo yele.