Nɔɔneŋ 116

Ŋolo kalese Wurubuarɛ yele ŋgba ɔ ba lese e lee yeŋ man nɛ

1Mɛɛ gyae Degbeŋgyoo, nawolo nyi ɔ nyii ma woya,

ɔ nyii me waraŋase kewii.

2Keŋ ɔ ba see deŋele nyii maŋ dɔɔ,

maa wii baake e ma kekyaa man pou.

3Yeŋ ŋmeeseŋ milii maŋ,

woyadɛɛ gyakoloŋ gyoo maŋ,

me naa diyem te waraŋase kyaŋa maŋ.

4Keŋte me baake Degbeŋgyoo yele nyi, <<Degbeŋgyoo lɛɛ ma nyee.>>

5Degbeŋgyoo na boele balaŋ, te ɔ tenɛɛ,

de Wurubuarɛ ne wii balaŋ.

6Degbeŋgyoo ne gyee baŋ bɔɔ dana kyɔɔre ya nɛ,

ma wose yɔkɔse maŋ na, ɔ lɛɛ ma nyee.

7Ma woo bese gyu n kaa fɛɛfo,

nawolo nyi Degbeŋgyoo te yɛɛ deeli fa neŋ.

8Nawolo nyi nyaŋ Degbeŋgyoo lesena maŋ lee yeŋ man,

me sia lee siasaraŋ man.

me nawɔɔ lee kekpaŋte man,

9na maa ta Degbeŋgyoo siaman,

denibalaŋ tɛɛle dɔɔ.

10Ma moo ma wose lɔ Degbeŋgyoo dɔɔ, debaŋ keŋ mɔɔ yako nyi,

<<Nombia ne takaa maŋ nideli nɛ.>>

11Me wɔe kelɔ maŋ na me yakowɔ nyi,

Walaŋ kamasɛ yɛɛ dekarate e.

12Woŋ yaa maa mo tɔ Degbeŋgyoo kom,

lee ɔ deeli ŋan pou ɔ be yɛɛ fa maŋ nɛ dɔɔ?

13Maa gyina nyeekelɛɛ leenɔɔ keŋ adido,

na maa baake Degbeŋgyoo yele fa e karaŋ.

14Maa tɔ ma alaŋaŋ fa Degbeŋgyoo,

ɔ balaŋ pou degyaŋee man.

15Degbeŋgyoo tewulɛɛ fereŋkyeŋ baŋ yeŋ,

na lee koya ɔ siaman.

16Ao Degbeŋgyoo, ampaŋ me yɛɛ n tobaale e,

mɛɛ som neŋ ŋgba me naa ka som neŋ nɛ,

nyaŋ boolina maŋ lee ma agbaraagbaraase man.

17Maa yɛɛ karaŋ kefa kedeesa fa neŋ,

na maa baake Degbeŋgyoo yele.

18Maa tɔ maa alaŋaŋ fa Degbeŋgyoo,

ɔ balaŋ pou degyaŋee man,

19Degbeŋgyoo ɔsom deni dinaa keŋ dekpaŋalaŋ man,

Yerusalɛm nsana nsana.

Ɛ lese Degbeŋgyoo yele.