Katoroŋ 4

1Kɛɛ mena keŋ kɔba yayam be kpem

2 na kɔba yayam kpaakpaate ke yɛɛ ayimɛɛ!

Ba te yaasee dekpaŋalaŋ fereŋkyeŋ keŋ boya koyadoŋ nyiŋan

lɔ abɔnterese man.

2Siyɔn bia baŋ bɛɛ lee koya

baŋ nafɔ bɛɛ yɛɛ wɔ ŋgba mena keŋ bɛɛ keri kɔba yayam nɛ,

yaa nɛnɛɛ bɛɛ kɛɛ wɔ ŋgba degbaŋ tɛɛle,

keŋ doo saabu maare nyiŋmaa man nɛ!

3Gbougbouse koraŋ

ne fa be bia dide,

mɔna me balaŋ bee wii walaŋ ya

ŋgba boogyebu depampaa man nɛ.

4Nawolo nyi loŋboaneŋ te yele biikyaa laakem

ta wolo kyaŋ ɔ nɔɔ adido,

Bia na solee weenɛɛ,

mɔna ŋolo bɛɛ fa wɔ ya.

5Baŋ nafɔ bee di weenɛɛ kpaakpaa nɛ,

na yeŋana tanam abɔntere man nɛ.

Baŋ bɛɛ do abɔɔ kpaakpaa leenaŋ be biatɛɛ nɛ,

ne doola dufuŋ man nɛnɛɛ nɛ.

6Me balaŋ deŋele kewɔŋ

kela Sodom wui,

keŋ bɔɔ wɔlɛɛ ke debokenaŋ man

te na nyiŋmaa wɔlɛɛna ke ya.

7Be gyooro bia ŋmaŋɛɛ kela senoo

te ba wolosɛɛ kela akaralɛɛ (nunkyue dideloŋ)

be yasɛɛ kela kegyaŋase kpaakpaa nyiŋan,

te be wɔɛ ŋgba lapise lasuli nɛ.

8mɔ nɛnɛɛ be birɛɛ kela nyewalaŋ,

bɔɔ na teka gyene wɔ abɔnterese man ya.

Ba wose naane te mataa be ŋɔɔ nideli,

ŋe ta wolo ŋgba daŋ nɛ.

9Baŋ bɔɔ mo yoosila koe nɛ dei beiŋ

kela baŋ tanam keyala na koe nɛ.

Weenɛɛ ŋan be te nyim lee wɔɔman yaa dɔɔ

2 te tanam naase wɔ diyem koe wɔ.

10Ala baŋ be tɔɔ loobia ne kyoŋii wɔ nɛ

koe be bia gyakaa tao,

ba moo wɔ bese weenɛɛ

debaŋ keŋ bɔɔ wɔlɛɛ me balaŋ nɛ.

11Degbeŋgyoo ta lese wola nyi, ɔ ta nyeŋ baŋ nideli,

ɔ te kyɛɛkee ɔ baŋ beiŋ keŋ lɔ

Ɔ kyaŋee boalaŋ Siyɔn

te ke kpaa ka mokɔɔ kaseese.

12Tɛɛle keŋ dɔɔ gyooneŋ

yaa tɛɛle keŋ dɔɔ balaŋ baŋ man ŋolo te lɛɛ di,

nyi kɔlara na wɔlɛɛra baa gyoo

Yerusalɛm anaanɔɔse ŋan man ya.

13Mɔna ɔ gbalara nombiakumɛɛ

na ɔ saese dukum dɔɔ te kɔŋawɔ mena,

nawolo nyi ba te kyɛɛkee

baŋ ba tenɛɛ nɛ fatabo leki.

14Nɛnɛɛ be dɔŋ bɛɛ lalaa abɔnterese man

ŋgba siayɛlɛɛsatena nɛ.

Be ta mo fatabo do ba wose ayimɛɛ

keŋ ŋolo bɛɛ gyae nyi waa mo ɔ nyiŋmaa tina ba kegbase ya.

15Balaŋ fae yeesa yako wɔ nyiaa << Ɛ lee kɛbo! Ɛ wose dana ayimɛɛ>>

<<Ɛ ta! Ɛ ta! Ɛ naa tina daa ya!>>

Debaŋ keŋ be dɔŋ bee kyeŋgbeŋ nɛ,

balaŋ yakowɔ nyiaa,

<<Bɔɔ tekaa tale kyaa kɛbo bela ya.>>

16Degbeŋgyoo gbagba te yasee wɔ,

ɔ bɛɛ tekaa gyee wɔ ya.

Be bɛɛ mo obuo fa saese baŋ ya,

te be bee bu kegyiise baŋ ya.

17Bela na da te kaa

lee kekyɔ keŋ dɛɛ kɛo te dɔɔ ne nyim ya nɛ dɔɔ,

dɛɛ kɛɛ gbɛɛ lee da dekagya dɔɔ

fa tɛɛle keŋ kɔɔ tale lɛɛ daa ya nɛ gbɛɛ.

18Balaŋ ne kɛɛ de naawɔ kekulu,

mena dɔɔ dɔɔ ne tale ta abɔnterese man ya.

Da weeya ta benaa, bɛɛ kala da weeya,

nawolo nyi dɔ ɔto te lii.

19Baŋ bɔɔ kuu kyaa de dɔɔ nɛ dana ɔsaa

kela otolokuse adido

be silana daa bulase dɔɔ

te be daana daa depampaa man.

20Degbeŋgyoo nuŋ tiure ŋon ɔ yɛɛ da nyeedoŋ weesɛɛ e nɛ,

ba te kyaŋ e be kɔtase man.

Na da gyeŋ nyi ɔ wuluŋ tɛɛ te

dee nyiŋ kyaa tɛɛlese ŋan man.

21Ao Ɛdom bu alebu, ŋon n kyaa Use tɛɛle man,

nyaŋee na ke yɛɛ neŋ gyoŋ.

Mɔna deŋele kewɔŋ leenɔɔ keŋ gyae ke lii n dɔɔ,

ke gyae ke dɛɛse neŋ, na n ka lese n wose deteŋteli.

22Ao Siyɔn Bu Alebu, n deŋele kewɔŋ gyae ke kɔŋ ɔto,

Degbeŋgyoo be gyae waa yela n gbeŋiri man kekyaa ke kyare ya.

Mɔna Ɛdom bu alebu, waa wɔŋ n deŋele lee n dukum dɔɔ

na waa lese nya akpanyanyaŋ debɔɔ.