Katoroŋ 3

1Maŋ yɛna baale ŋon mɔɔ naa kaale

ɔ baŋ dambila keŋ man.

2Ɔ te gegi maŋ te ɔ yelaa me dɔŋ

detiŋtɛɛ man keŋ keŋmaŋee be doo ya,

3Ayi, ɔ te gyɔ maŋ lɔ

agbaatee agbaatee, debaŋ kamasɛ

4Ɔ te yele ma wose tɔne na wose naane te ŋmɛɛ

te ɔ tekeri me ŋɔɔ.

5Ɔ te tɔ maŋ do

te ɔ moo ŋan na kaale kilisi maŋ.

6Ɔ te yele me kyaa detiŋtɛɛ man

ŋgba baŋ bɔɔ wulaa yeŋ nɛ.

7Ɔ te baŋ dekyaŋ kilisi maŋ keŋ mɔ tale yeu ya,

ɔ ta mo agbaraagbaraase bake maŋ see.

8Akpaa me baake yaa me wii nyi waa lɛɛ maŋ koraŋ nɛ,

ɔ bɛɛ tei ma kefane ya.

9Ɔ ta mo boya dinaana tɔ me gbɛɛ,

ɔ te yele me gbɛɛ te gɛɛse.

10Ŋgba mokɔɔte ŋon ɔ ne daa

ŋgba dinaate ŋon ɔ yoɛ nɛ,

11ɔ wɔŋa maŋ lee detɛe keŋ man te ɔ kyekpetee maŋ

te ɔ tinaa maŋ yela keŋ ɔ te kyɔ maŋ ya.

12Ɔ wɔŋa ɔ baŋdaŋ lese

te ɔ moo ɔ baŋdaŋ nyeela tɔ maŋ

13Ɔ lese ɔ baŋdaŋ nyeela lee ɔ gbegya man

sɔɔ me konɔɔ man

14Me ta bese boŋɛɛse fa balaŋ pou,

Bee kpee nɔɔneŋ kulu maŋ wee kamasɛ.

15Ɔ ta mo ŋan baa maŋ

te ɔ moo ŋanŋanborɔ suu maŋ.

16Ɔ ta mo boe tekeri me keli,

te ɔ sakatee maŋ aŋasa man.

17Mɔɔ tekaa dana wosefɛɛreŋ ya,

ma te wolee mena keŋ kede wɔɛ.

18Mena dɔɔ me yakowɔ nyiaa <<Mɔ obuo gyoorobiiri na ŋan pou mɔ mo me loo gyakaa

Degbeŋgyoo dɔɔ nɛ ta lee me nyiŋmaa man.

19Me tɔɔse me kaale na kekila,

na ŋaŋ na ŋanŋanborɔ keŋ.

20Me tɔɔse ŋa nideli,

na te yele ma woo te yeu.

21Mɔna kei te me tɔɔsewɔ

te me nyiŋa lookegyakaa.

22Lee Degbeŋgyoo kegyae beiŋ keŋ dɔɔ, ba te wɔlɛɛ daa ya,

nawolo nyi ɔ balaŋ kewii bɛɛ taŋ ya.

23Ŋe yɛɛ wɔle nebo kamasɛ,

nya anokoare kedi boe.

24Me yakowɔ fa ma wose nyiaa <<Degbeŋgyoo yɛna me dedii,

mena dɔɔ maa kɛɛ ɔ siaman.>>

25Degbeŋgyoo dei fa baŋ bɛɛ mo be loo gyakaa ɔ dɔɔ,

fa baŋ bɛɛ kɛo e nɛ.

26Dei nyi nyaa kyaa yididi daa

Degbeŋgyoo nyeekelɛɛ keŋ.

27Dei nyi baale waa seele kasolɔ keŋ

ɔ tobiiritɛɛ.

28Yela waa kyaa waageŋ yididi

nawolo nyi Degbeŋgyoo moona ke gyakaa ɔ dɔɔ.

29Yela waa mo ɔ sia buŋ aŋasa man

mberem loo kegyakaa doo bela.

30Yela waa mo ɔ lakaa fa ŋon waa gyɔ e nɛ,

na baa do e desɛŋ.

31Nawolo nyi Degbeŋgyoo

be gyae waa bɛɛ ŋolo kekpaakekpaa ya.

32Doo nyi ɔ ne yele walaŋ ne di waraŋsa, mɔna waa bese wii ɔ waraŋase,

ɔ kegyae beiŋ keŋ taŋ ɔto ya.

33Nawolo nyi ɔ bɛɛ mo kaale

yaa weeleŋ kɔŋ balaŋ bia dɔɔ yakaa ya.

34Nyi waa sakatee

baŋ pou bɔɔ kyaŋ tɔ deni,

35na waa bɛɛ balaŋ keŋ kaboena wɔ

Adidote ŋon siaman,

36na waa bɛɛ nombiakedi kegbɛɛ dɔɔ

keŋ Degbeŋgyoo be naa yee?

37Amɔte ne gyaela waa tale kolosi na kekɔŋ mena

2 akpaa Degbeŋgyoo te yako ya?

38Na Adidote ŋon nɔɔman te

nombiikum na abɔɔ kpaakpaa na lee yee?

39Woŋ dɔɔ te balaŋ baŋ be kyaa na be sia na toroŋ

akpaa be wɔŋ ba deŋele lee be nombiakumɛɛ dɔɔ?

40Ɛ yela dɛɛ gyoo da wose man na dɛɛ kɛɛse ŋa kɛɛ,

na dɛɛ bese gyu Degbeŋgyoo gyaŋ.

41Ɛ yela dɛɛ fane lee de konɔɔse man na dee gyina de nyiŋmaase

tee Wurubuarɛ adido na dɛɛ yako nyiaa,

42<< Da te yɛɛ dukum na deŋele doŋ

te n ta mo kyɛɛ daa ya.

43<<N gyeŋa baŋ beiŋ te n kuuwɔ kyaa de dɔɔ,

n koe daa keŋ n te wii de waraŋase ya.

44N ta mo ŋɔma wuu n wose

na kefane be nyiŋ mo ŋe man lii n gyaŋ ya.

45N ta mo daa yɛɛ duwaare na woŋsila

tɛɛlese ŋan man.

46<<De kɔlara pou te gyuusu be nɔɔse

haa tia daa

47Gyakoloŋ kyaŋa daa te de yalawɔ dowokom man

kewɔlɛɛ na ketekerii.>>

48Me sia wii siasaraŋ ŋgba boo ne laŋa laa nɛ

nawolo nyi ba te wɔlɛɛ me balaŋ.

49Me sia gyae ke wii loŋ agbaatee agbaatee,

be gyae ke tina yela ya,

50kelii debaŋ keŋ Degbeŋgyoo waa tisina ɔ sia

lee adido na waa naa.

51Keŋ mɔɔ naa nɛ yelaa ma wose gbirisi maŋ

lee ala baŋ pou be kyaa donɔɔ dinaa keŋ man nɛ dɔɔ.

52Baŋ be yɛɛ me kɔlarawɔ keŋ ma te yɛɛ kolo ya nɛ

ne nyɔɔ maŋ kɔta ŋgba gyebu.

53Be tɛɛse maŋ do dowokom man baa ko maŋ,

te be fuŋii maŋ boya,

54Loŋse ŋan wuuwɔ munu maa nyee,

na ma gyeŋ nyi maa yeŋ

55Ao Degbeŋgyoo n yele te me baakewɔ

lee dowokom keŋ tɔɔman.

56N nyii me kasola, <<Na tɔ n deŋela

nyi n be nyii me kewii baake ya>>

57Debaŋ keŋ mɔɔ baake neŋ nɛ n tuuwɔ benaa,

te n yakowɔ nyiaa <<Naa yee ya.>>

58Ao Degbeŋgyoo, n seŋawɔ me wɔle,

te n lɛɛ ma nyee.

59Ao Degbeŋgyoo, n naa dukum keŋ bɔɔ yɛɛ maŋ.

Di me nombia fa maŋ!

60N naa ba kom ketɔ siiliŋ,

ŋan pou bɔɔ bake tia maŋ.

61Ao Degbeŋgyoo, n nyii be tuubia,

na ŋan pou bɔɔ bake tia maŋ

62keŋ me kɔlara ne kolosi adadawoya na dɛɛdɛɛ man

tia maŋ wee kamasɛ.

63Kɛɛ wɔ! Be kyaa yaa ba seŋɛɛ,

Bɛɛ boŋo maŋ be nɔɔneŋ kekpee man.

64Ao Degbeŋgyoo, tɔ wɔ kom ŋgba mena keŋ kaboena wɔ nɛ,

lee keŋ be nyiŋmaase be yɛɛ nɛ dɔɔ.

65Yela baa yɛɛ konɔɔyuŋ,

na n kefalaa ke gyakaa be dɔɔ!

66Degbeŋgyoo, mo baŋ kuu kyaa be dɔɔ na n ke wɔlɛɛ wɔ

lee tɛɛle dɔɔ.