Katoroŋ 2

1Kɛɛ mena keŋ Degbeŋgyoo ba mo ɔ

baŋ ŋɔma wuu Siyɔn Bu Alebu dɔɔ!

Ɔ te fuŋ Iserae gyoorobiiri,

lee adido kaa lɔ tɛɛle man,

ɔ te tɔɔse ɔ nae dɛɛsee keŋ,

ɔ baŋ wee keŋ ya.

2Degbeŋgyoo te wɔlɛɛ Yakɔbe akyaese pou,

keŋ ɔ te wii be waraŋase ya,

lee ɔ baŋ beiŋ dɔɔ ɔ te wɔlɛɛ

Yuda Bu Alebu akagyase pou.

Ɔ te yɛlɛɛ ɔ gyooridedii

te ɔ lese ɔ gyoorobia obuo lee be dɔɔ.

3Lee ɔ baŋ beiŋ dɔɔ, ɔ te kɛrɛɛ

Iserae woi kamasɛ. 1

Debaŋ keŋ kɔlara baŋ ne kɔŋ nɛ,

ɔ wɔŋa ɔ dunoluŋ nyiŋmaa lee wɔle.

Ɔ ne kpaa Yakɔbe ŋgba boalaŋ degyapaa,

kɛɛ wɔlɛɛ kpene kamasɛ keŋ be kilisi ke.

4Ɔ te wɔŋ ɔ baŋdaŋ ŋgba kɔlare nɛ,

ɔ te desina ɔ dunoluŋ nyiŋmaa.

Ɔ ta koe baŋ pou bɛɛ gyoo sia nɛ,

ŋgba kɔlare nɛ,

ɔ ta lese ɔ baŋ beiŋ debɔɔ ŋgba boalaŋ nɛ

gyakaa Siyɔn Bu Alebu ŋon kanyaŋ deni dɔɔ.

5Degbeŋgyoo yɛɛ ŋgba kɔlare nɛ,

ɔ te wɔlɛɛ Iserae.

Ɔ te yɛlɛɛ ɔ gyooro akpaŋalaŋse pou,

te ɔ wɔlɛɛ wa akyaŋse.

Ɔ te yele Yuda Bu Alebu,

waraŋsa kedi na ɔ katoroŋ ta boo.

6Ɔ te yɛlɛɛ ɔ dekyae ŋgba wɔɔbii nɛ,

ɔ te wɔlɛɛ ɔ dɛɛgyaŋee.

Degbeŋgyoo te yele Siyɔn te wolee

ɔ nɔɔkedi debaŋ na ɔ kefɛɛfoweeya,

ɔ baŋ beiŋ keŋ dɔɔ ɔ te bɛɛ

gyoo na ɔ sae.

7Degbeŋgyoo te bɛɛ ɔ kedeesaboe,

te ɔ tinaa ɔ dekyae fereŋkyeŋ keŋ yela.

Ɔ ta mo ɔ gyooro akpaŋalaŋ akyaŋse,

do kɔlara baŋ nyiŋmaase man,

bɛɛ fae keyoodi yeesa Degbeŋgyoo dɛɛ,

ŋgba nɔɔkedi debaŋ daale nɛ.

8Degbeŋgyoo te bakesee nyi waa tekerii,

dekyaŋ keŋ be kilisi Siyɔn Bu Alebu ŋon nɛ.

Ɔ te wɔŋ ɔ kemaa ŋmeleŋ keŋ,

ɔ te wɔlɛɛ ke kerekere,

Ɔ te yele akagyase ŋan na akyaŋse,

ŋan pou te wɔlɛɛ.

9Wa anaanɔɔse te munu gyoo tɛɛle man,

ɔ te tekerii ŋa nyeela te ɔ wɔlɛɛ ŋa.

Ɔ gyooneŋ na ɔ gyoorobia ta bese gbeŋa tɛɛlese man,

ŋolo bee di mmaraa keŋ dɔɔ bela ya,

te ɔ gbalara bɛɛ tekaa naa nombia na be sia,

lee Degbeŋgyoo gyaŋ bela ya.

10Siyɔn Bu Alebu kegyiise,

kyakɛɛ tɛɛle man yididi,

be ta mo akuŋkuŋ woli ba nyeeya,

te ba moo titire kpaŋee.

Yerusalɛm alebia,

te wuluŋu ba nyeeya tɛɛle man.

11Kewii te yele me sia te yɛɛ fulaa,

mɛɛ naa diyem,

mee nyii weeleŋ me konɔɔ man,

nawolo nyi ba te wɔlɛɛ me balaŋ,

nawolo nyi bia na kyokyoose ne gbalase,

donɔɔ dinaa keŋ abɔnterese man.

12Bɛɛ bɔɔse be naɔ nyi,

nde weenɛɛ na waen?

bɛɛ gbalase ŋgba baŋ bɔɔ do wɔ gyamɛɛ,

donɔɔ dinaa keŋ abɔnterese man nɛ,

be weesɛɛ bɛɛ yee wɔ,

be naɔ nyiŋmaase man ya.

13Yerusalɛm Bu Alebu,

woŋ yaa maa yako nyi ka lee neŋ?

Woŋ yaa maa mo neŋ maana?

Siyɔn Bu Alebu keteŋ,

amɔte wɔɛ laa ŋgba nyaŋ,

na maa mo kyɔlɛɛ neŋ?

N gyam ta gyoo bɔɔ ŋgba ɛpo siiliŋ nɛ.

Amɔte ne gyaela waa tale kyɔ neŋ?

14Nombia ŋan n gbalara ne naa na be sia nɛ,

yɛɛ akɛrɛɛ ŋa te ŋe taŋ tɔnɔɔ ya,

be ta lese n dukum debɔɔ wola neŋ,

na ne be nyiŋ gyu yoo gbeŋiri man ya.

Nombia ŋan bɔɔ naa yako neŋ,

yɛɛ akɛrɛɛ na ŋan ŋɛɛ mo walaŋ yo gbɛɛ.

15Baŋ pou be dɔŋ n gbɛɛ dɔɔ nɛ,

ne kpiisi be nyiŋmaase woli neŋ,

te doo be nɔɔ te bee kpiisi ba nyeeya,

fa Yerusalɛm Bu Alebu nyiaa,

<<Donɔɔ dinaa keŋ bɛɛ baake nyi,

kyeo keŋ ka dokoso be kyaa ya,

tɛɛle kei pou kenyaŋee nɛ yaa?>>

16N kɔlara pou te wola be nɔɔse,

haa tee neŋ,

bee kpiisi ba nyeeya na bɛɛ tao be kela,

na bɛɛ yako nyi, <<Da te wɔlɛɛ e pou.

Kei yɛna wee keŋ dɔɔ kɛɛ ke gbɛɛ,

da te naa ke na de sia gyɛŋ.>>

17Degbeŋgyoo te yɛɛ kpene keŋ ɔ be bake nyi waa yɛɛ,

ɔ te yele ɔ nombii keŋ,

ɔ be yako lee beneŋ beneŋ keŋ te kɔŋ mena.

Ɔ te wɔlɛɛ neŋ keŋ ɔ te wii n waraŋase ya,

ɔ te yele n kɔlare te nyaŋee lee nyaŋ dɔɔ,

ɔ te fa n kɔlara doŋ n dɔɔ.

18Balaŋ baŋ ne wii baake Degbeŋgyoo,

lee be konɔɔse man.

Ɛmɛɛ Siyɔn Bu Alebu akyaŋse,

ɛ yela ɛ siasaraŋ ke laŋ ŋgba boo nɛ,

nelim na ka weese,

ɛ naa tina waraŋsa kedi yela ya,

ɛ naa tina kewii yela ya.

19Koro, fae yeesa nelim,

agbaatee agbaatee,

lese n konɔɔ man nombia,

lɔ Degbeŋgyoo siaman ŋgba loŋ nɛ.

Gyina n nyiŋmaase tee e

lee n bia baŋ tanam ne gbalase,

abɔnterese man nɛ nyeedoŋ dɔɔ.

20Degbeŋgyoo, kɛɛ na n ka gyoo ke man.

Amɔte te n naase diyem nnɛ?

Dei nyi ala baa kyaŋ be tɔɔman bia,

baŋ baŋ gbagba be kɛɛle nɛ tao?

Dei nyi baa ko saese na gbalara,

Degbeŋgyoo ɔsom deni man?

21<<Bia na kegyise pou ta yekee be doo

abɔnterese man,

me bia alebia na tewulɛɛ

te yale yoosila nɔɔman n baŋ wee keŋ,

n te koe wɔ keŋ n te wii be waraŋase ya.

22<<Mena keŋ n ne lɔ yele baake balaŋ nɔɔkedi wee nɛ,

mena te n lɔɔ yele baake wɔe kelɔ tia maŋ yenaŋ kamasɛ

Degbeŋgyoo baŋ wee keŋ nɛ

ŋolo be gyae waa tale yeu yaa waa lɛɛ ɔ nyee ya.

Baŋ mɔɔ tele te mɔɔ kɛɛle nɛ,

me kɔlara ta koe wɔ.