Katoroŋ 1

Yerusalɛm kewɔlɛɛ

1Donɔɔ dinaa keŋ nafɔ balaŋ be wulu ke man nɛ,

kɛɛ nɛnɛɛ ka ke doo yakaa.

Ŋon nafɔ ɔ dana doŋ tɛɛlese man nɛ,

kɛɛ ɔ ke kyaa ŋgba lialo nɛ!

Ŋon nafɔ ɔ yɛɛ alagyoo e tɛɛlese man nɛ,

nɛnɛɛ ɔ ta bese gbeŋi.

2Ɔ ne wii nideli nelim,

siasaraŋ te wulu ɔ sia.

Ɔ te nyiŋ ŋolo ke kyɔlɛɛ e,

baŋ bɛɛ gyae e pou nɛ man ya.

Ɔ gyoona pou ta lese e fa,

be ta bese ɔ kɔlara.

3Diyem kena na tom nedoŋ keyɛɛ wɔle nɛ,

Yuda te gyu gbeŋiri man.

Ɔ kyaa tɛɛlese man,

mɔna ɔ te nyiŋ defɛɛfoe ya.

Baŋ pou bɔɔ kuu gyakaa ɔ dɔɔ nɛ te kyaŋ e

ɔ kaale man.

4Siyɔn gbɛɛneŋ ne di waraŋsa

nyi ŋolo bɛɛ kaa mo ɔ gyaŋ gyu ɔ nɔɔkedi debaŋ man ya.

Wa anaanɔɔse te yɛlɛɛ,

ɔ saese na keketee,

wa alebia na yeyɛɛ

te ŋon gbagba doo weeleŋ man.

5Ɔ kɔlara ta bese ɔ gbeŋgyoona,

ɔ kɔlara wose te fɛɛ wɔ.

Degbeŋgyoo te yele ɔ na yeyɛɛ

lee ɔ nombiakumɛɛ burum dɔɔ.

Ɔ bia kyaa gbeŋiri man,

be ta bese gbeŋa be kɔlara gyaŋ.

6Siyɔn Bu Alebu

gyoorobiiri pou ta lee ɔ man.

Ɔ gyoorobia wɔɛ ŋgba ɔkyueŋ

ŋon ɔ bee nyiŋ ŋale ya nɛ,

wose keyɔkɔse man te be yeuwɔ lee

ŋon ɔ ne gegi wɔ nɛ siaman.

7Yerusalɛm diyem kena na ɔ ke dɔŋ ɔ kili

te ɔ tɔɔse abɔɔ kpaakpaa nyiŋan ŋan pou

ɔ be nyim kaalaŋ nɛ.

Ɔ balaŋ ke yala gyoo kɔlara nyiŋmaa man nɛ,

ɔ te nyiŋ ŋolo ke kyɔ e ya.

Ɔ kɔlara kɛɛ e

te ba boŋo e lee ɔ kewɔlɛɛ dɔɔ.

8Yerusalɛm te yɛɛ dukum beiŋ

te ɔ doo ɔ wose ayimɛɛ.

Baŋ pou nafɔ bɛɛ bu e nɛ na tee e,

nawolo nyi be popou te naa ɔ deteŋteli,

ŋon gbagba na keketee

te ɔ gɔŋase ɔ nyee.

9Wa ayimɛɛ te kpatee wa abɔɔ,

ɔ ta gyueŋ fa wee daale ya.

Ɔ keyala yɛɛ gyakoloŋ,

ŋolo be kyaa waa kyɔlɛɛ e ya.

Ao Degbeŋgyoo, kɛɛ me kakeketee,

nawolo nyi kɔlare ŋon te di deŋele.

10Kɔlare ŋon ta mo ɔ nyiŋmaa

gyakaa wa abɔɔ kpaakpaa pou dɔɔ,

ɔ naa tɛɛlese ŋan

ta gyoo ɔ fereŋkyeŋ keŋ man,

baŋ n be tɔ wɔ nyi,

be naa gyoo n dɛɛgyaŋee man ya nɛ.

11Ɔ balaŋ pou na keketee

bɛɛ kɛo weenɛɛ,

baa mo ba abɔɔ kpaakpaa nyiŋan kyɛɛkeena weenɛɛ

na baa nyiŋ nyeedoŋ

Ao Degbeŋgyoo, kɛɛ na n ka gyoo ke man,

nawolo nyi mɔɔ dana obuo ya.

12<<Ɛmɛɛ baŋ pou ɛ na mo kɛbo nɛ, ɛ be famenɛ yee?

Ɛ kɛɛ kilisi na ɛ ke naa.

Kaale daale kyaa ŋgba me kaale

keŋ mɛɛ naa,

keŋ Degbeŋgyoo ba mo kɔŋ me dɔɔ

ɔ baŋ beiŋ wee keŋ nɛ?

13<<Ɔ yelaa boalaŋ lee adido

kaa gyoo me ŋɔɔ man.

Ɔ te nyɔɔ me naawɔ kɔta

te ɔ wɔŋa maŋ lee wɔle.

Ɔ te yele ma te yɛɛ yakaa,

te ma yekeewɔ wee dibiliŋ pou.

14<<Ɔ te bake me dukum yɛɛ kasolɔ

ɔ moo ɔ nyiŋmaa loo ŋa towaa.

Ɔ te bake ŋa kyaŋ me wɔŋe.

Degbeŋgyoo te yele me doŋ te taŋ.

Ɔ ta mo maŋ do

baŋ mɔɔ tale seŋ be siaman ya nɛ nyiŋmaa man.

15<< Degbeŋgyoo te bɛɛ

doŋtena baŋ pou me dana nɛ,

Ɔ te yilaa yoonɔɔtena tia maŋ1 nyi baa wɔlɛɛ me tewulɛɛ.

Degbeŋgyoo te sakatee Yuda Alebu keteŋ ŋon,

ŋgba mena keŋ bɛɛ sakatee waen, ke desarae man nɛ.

16<<Kei dɔɔ te mee wii

te siasaraŋ wulu me sia.

Ŋolo ba benaa na waa kyɔlɛɛ maŋ ya,

ŋolo be kyaa waa kolosido maŋ ya.

Me bia be doo daale man ya

nawolo nyi kɔlare ŋon te di deŋele>>

17Siyɔn te fɛlɛɛ ɔ nyiŋmaase,

mɔna ŋolo be kyaa waa kyɔlɛɛ e ya.

Degbeŋgyoo yakowɔ lee Yakɔbe woseman,

nyi ɔ dɔɔna ta bese ɔ kɔlara,

Yerusalɛm ta bese

kolo duwaare be man.

18Degbeŋgyoo tenɛɛ,

mɔna me yɛɛ deŋele doŋ tia ɔ kefaree.

Ɛmɛɛ balaŋ pou, ɛ tei,

ɛ kɛɛ me kaale,

Me bia alebia na tewulɛɛ,

kyaa gbeŋiri man

19Me baake baŋ bɛɛ gyae maŋ nɛ

mɔna ba lese maŋ bo fa.

Me saese na me kegyiise

ta yekee donɔɔ dinaa keŋ man,

debaŋ keŋ bɛɛ gyae weenɛɛ,

na baa nyiŋ nyeedoŋ nɛ.

20Ao Degbeŋgyoo, kɛɛ me kaale!

Mɛɛ naa diyem

te nombia ne takaa maŋ me konɔɔ man,

nawolo nyi ma te yɛɛ deŋele doŋ beiŋ.

Yoosila na koe abɔntere man,

te baale mɔ na yem dɛɛ.

21<<Balaŋ te nyii me kakeketee,

mɔna ŋolo be kyaa waa kyɔlɛɛ maŋ ya.

Me kɔlara pou te nyii me kayeyɛɛ,

bɛɛ nyaŋee lee keŋ n be yɛɛ nɛ dɔɔ.

Yela nombia kedi wee keŋ n be yakosee nɛ kekɔŋ

na baŋ mɔ ke yɛɛ ŋgba maŋ nɛ.

22<<Yela ba akpanyanyaŋ nombia ke kɔŋ n siaman

wɔŋ ba deŋele

ŋgba mena keŋ n be wɔŋ ma deŋele

lee me nombiakumɛɛ pou dɔɔ nɛ.

Me kakeketee boe

te ma woo te yeu lee me gyaŋ.