Yeremiya 52

Yerusalɛm keyala

1Sedekiya ke di kulutooneŋ sao daale na te ba moo e see gyoo, te ɔ dii gyoori Yerusalɛm kulutooneŋ kufu daale. Ɔ naa yele yɛna Hamutale ŋon ɔ kya yɛna Yeremiya nɛ. Ɔ lee Libena. 2Sedekiya kei yɛɛ nombiakumɛɛ Degbeŋgyoo siaman, ŋgba mena keŋ Yehoyakim be yɛɛ nɛ. 3Lee Degbeŋgyoo baŋ dɔɔ te kɛŋa pou kɔŋawɔ Yerusalɛm na Yuda dɔɔ, te ɔ gegi wɔ lee ɔ siaman.

Sedekiya mɔ korowɔ seŋ tia Babilɔn gyoo.

4Sedekiya kedi gyoori kulutooneŋ kadaalete ŋon gyaalaŋna kufute ŋon weeya kufute te Babilɔn gyoo Nebukadenɛsa na ɔ yoonɔɔtena pou korowɔ ke yoo Yerusalɛm. Be tɔɔ wɔ do te be baŋee dekagyase kilisi ke. 5Be tɔɔ donɔɔ dinaa kenaŋ do kelii gyoo Sedekiya gyoori kedi kulutooneŋ kufudaalete ŋon man.

6Gyaalaŋna banaarate ŋon wee kadaalete nɛ, tanam keyala keŋ nɔɔ yɛɛ doŋ nideli donɔɔ dinaa keŋ man keŋ nyi balaŋ bee nyiŋ weenɛɛ baa di ya. 7Keŋte be yɛlɛɛ donɔɔ dinaa keŋ dekyaŋ, te yoonɔɔtena baŋ pou yeuwɔ laŋ. Ba korowɔ nelim mo denaanɔɔ keŋ doo akyaŋse ala ŋan nsana benaana gyoo wɔɔbii keŋ. Doo nyi na Babilɔntena te kilisi donɔɔ dinaa keŋ nɛ, be yeuwɔ mo Yɔɔdan detaŋgya keŋ man laŋ. 8Mɔna Babilɔntena yoonɔɔtena kuuwɔ kyaa gyoo Sedekiya dɔɔ te be ke tuŋa e Yeriko depampaa man. Ɔ yoonɔɔtena pou tinaa e yela te be yaaseewɔ yela e, 9keŋte be kyaŋa gyoo ŋon.

Ba moo e gyina Babilɔn gyoo Ribela Hamate tɛɛle man, botɔɔ keŋ bɔɔ di ɔ nombia nɛ. 10Ribela botɔɔ te Babilɔn gyoo koe Sedekiya bia tewulɛɛ ŋon gbagba siaman, te ɔ besewɔ koe Yuda kyaarabia pou. 11Keŋte ɔ kulii Sedekiya siabia, te ɔ moo kɔbere agbaraagbaraase bake e te ɔ moo e gyu Babilɔn. Keŋte ɔ moo e ketɔ deni nyi waa doo botɔɔ kaboena waa mo yeŋ.

12Babilɔn gyoo Nebukadenɛsa gyoori kedi kulutooneŋ kufu kadaalete ŋon gyaalaŋna banoŋte ŋon wee kufute nɛ, yoonɔɔtena kegyia Nebusaradan ŋon ɔ na som Babilɔn gyoo nɛ kɔŋawɔ Yerusalɛm. 13Ɔ too Degbeŋgyoo ɔsom deni dinaa keŋ, na gyooro dekpaŋalaŋ keŋ na Yerusalɛm akpaŋalaŋ pou. Ɔ too denɛɛ kpaakpaa nyiŋan ŋan pou. 14Babilɔn yoonɔɔtena baŋ pou be doo yoonɔɔtena kegyia ŋon tɛɛ nɛ, tekerii akyaŋ ŋan pou be kilisi Yerusalɛm nɛ. 15Keŋte yoonɔɔtena kegyia Nebusaradan ŋon moo ayematena baŋ baale na baŋ bɔɔ kaa donɔɔ dinaa keŋ man na baŋ ba gyeŋ nyiŋmaa man tomse na baŋ bɔɔ tira ba wose ke kpuna Babilɔn gyoo nɛ laŋ yoogbeŋiri man. 16Mɔna Nebusaradan tinaa ayematena gbagba baŋ yela nyi baa yɛɛ tom gerepo wɔɔse man na baa fara wɔɔse.

17Babilɔntena tekerii kɔbere piilase ŋan na daase ŋan seŋɛɛ na kɔbere sabɛɛ dinaa, keŋ doo Degbeŋgyoo ɔsom deni dinaa keŋ man nɛ, te be kuu kɔbere ŋan pou gyu Babilɔn. 18Ba moo saabuse na sɔɔfese na ŋan bɛɛ mo nyɔrɛɛ abɔɔ na nyefalɛɛ ŋan bɛɛ mo loŋ do mo ŋmatee na kuruwaase na kɔbere abɔɔ ŋan pou bɛɛ mo yɛɛ tom ɔsom deni dinaa keŋ man nɛ. 19Yoonɔɔtena kegyia ŋon moo tasase na gbɛŋgbɛŋse na tasase ŋan man bɛɛ mo abɔɔ do ŋmatee nɛ, na osuŋse na kanea daase na tasase na nyefalɛɛ ŋan bɛɛ mo yɛɛ soloŋ kedeesase, ŋan pou bɔɔ mo kɔba yayam kpaakpaate yaa kɔba wolom yɛɛ nɛ laŋ.

20Kɔbere keŋ bɔɔ mo yɛɛ piilase ala ŋan na loŋ sabɛɛ dinaa keŋ, na kɔbere nunkyue baala kufubala baŋ be doo ke tɛɛ na ŋe naawɔɔ ŋan pou gyoo Solomɔn be yɛɛ see Degbeŋgyoo ɔsom deni dinaa keŋ man nɛ, ŋolo be tale keri ŋa ya. 21Piila keŋ dokoloŋ ɔkooroŋ yɛɛ metase gyanaara na kyomii, (8.1) te ke kepipii man yɛɛ metase anoŋ na kyomii (5.4). Ke kepipii man yɛɛ nyimbia anaara te ke dana bɔɔ ke man. 22Kɔbere nyeete keŋ gyakaa piila dokoloŋ nyeedɔɔ ɔkooroŋ yɛɛ metase ala na kyomii (2.3) te ba moo agbaraagbaraa na pomegeranatese ŋan bɔɔ mo kɔbere yɛɛ nɛ desina ke kilisi. Piila alate keŋ na ke pomegeranatese mɔ yɛɛ ŋgba keŋ nɛ. 23Pomegeranatese ŋan doo ka yenaase yɛɛ sɔŋonaara na kufu looro (96). Pomegeranatese ŋan doo agbaraagbaraa keŋ man pou yɛɛ sɔŋonoŋ (100).

24Yoonɔɔtena kegyia ŋon moo sae kegyia Seraiya na sae ŋon ɔ gyakaa ɔ dɔɔ Sefaniya na balaŋ batooro baŋ bɛɛ kɛɛ denaanɔɔ dɔɔ nɛ laŋ. 25Baŋ bɔɔ kaa donɔɔ dinaa keŋ man nɛ, ɔ moo siamante ŋon ɔ ne kɛɛ baala baŋ bee gyu yoo nɛ, na gyoo kyaarabia nyetooro. Ɔ besewɔ mo tɔne ŋmarasele ŋon ɔ yɛɛ kegyia ŋon ɔ ne yilaa tɛɛle keŋ man balaŋ gyu yoo nɛ, na balaŋ sɔŋotooro baŋ ɔ be naa donɔɔ keŋ man nɛ. 26Yoonɔɔtena kegyia Nebusaradan moo wɔ pou, te ɔ moo wɔ kɔna Babilɔn gyoo Ribela donɔɔ man. 27Keŋte Babilɔn gyoo yelaa ba koe wɔ Ribela keŋ kyaa Hamate tɛɛle man nɛ.

Mena te ba moo Yuda lee be tɛɛle man gyu gbeŋiri man.

28Balaŋ baŋ Nebukadenɛsa ba moo gyu gbeŋiri man yaanɔɔle yaa

Ɔ gyoori kedi kulutooneŋ nyetoorote man nɛ,

Yudatena yɛɛ kakpoŋse atooro na sao atooro (3,023)

29Nebukadenɛsa gyoori kedi kulutooneŋ kufu gyanaarate man nɛ,

Baŋ bɔɔ lee Yerusalɛm yɛɛ sɔŋonoŋse gyanaara na sao na kufu ala (832).

30Ɔ gyoori kedi kulutooneŋ sao atoorote man nɛ,

Yoonɔɔtena kegyia Nebusaradan moo Yudatena sɔŋonoŋse nyetooro na sɔŋola na anoŋ (745) gyu gbeŋiri man.

Be popou yɛɛ balaŋ kakpoŋse anaara na sɔŋonoŋse looro (4,600)

Be ke tina Yehoyakim yela

31Ba ke kyaŋ Yuda gyoo Yehoyakyin gyu gbeŋiri man kulutooneŋ sao na kufu nyetoorote (37), keŋ yɛɛ kulutoo keŋ Awele Merodake be di gyoori Babilɔn nɛ, gyaalaŋna kufu balate ŋon wee sao anoŋte nɛ, ɔ lese Yehoyakyin lee deni man. 32Ɔ kolosi nɔɔwoya kpaakpaa fa Yehoyakyin, te ɔ faa e obuo dekyae keŋ kela gyooneŋ baŋ be kyaa gbeŋiri man Babilɔn nɛ. 33Mena dɔɔ Yehoyakim kpee ɔ deni man kedoo kegbase ŋan, te ŋon na gyoo na do be nyiŋmaa di nyefale dokoloŋ man debaŋ kamasɛ ɔ weeya akaŋ ŋan pou. 34Wee kamasɛ na Babilɔn gyoo ne fa Yehoyakim kɔba debaŋ keŋ ɔ kyaa nɛ kelii wee keŋ waa mo yeŋ.