Yeremiya 51

1Nnɛ yaa Degbeŋgyoo ne yako,

<Kɛɛ, maa wosi wɔlɛɛre ŋon feliŋ,

tia Babilɔn na Lebo Kamaitena.

2Maa kpila ŋɔɔla gyu Babilɔn,

na be kaa feefu e na baa wɔlɛɛ ɔ tɛɛle,

baa seŋ tia e yenaŋ kamasɛ,

ɔ nombiikum keyala wee keŋ.

3Ɛ naa yele baŋdaŋ tɔɔre ke wɔŋ ɔ baŋdaŋ nyeele,

yaa waa do ɔ yoo abɔɔ ya.

Ɛ naa wii ɔ tewulɛɛ ya,

ɛ wɔlɛɛ ɔ yoonɔɔtena kerekere.

4Baa yala yooman Babilɔn,

baa gooli wɔ nideli ka abɔnterese man.

5Doo nyi nombiakumɛɛ te wulu be tɛɛle,

Iserae Fereŋkyeŋte ŋon siaman koraŋ nɛ,

be Wurubuarɛ, Degbeŋgyoo Doŋ Pou Nyee ŋon,

te woleeta Iserae na Yuda ya.

6Ɛ yeu lee Babilɔn,

Ɛ yeu lɛɛ ɛ nyee.

Ɛ naa yele baa wɔlɛɛ ŋon lee ɔ dukum dɔɔ ya.

Debaŋ te lii keŋ Degbeŋgyoo waa tɔ kom,

waa tɔ e keŋ kaboena e nɛ.

7Babilɔn yɛɛ ŋgba kɔbayayam leenɔɔ nɛ Degbeŋgyoo nyiŋmaa man,

ɔ yelaa tɛɛle kei pou dɛɛsewɔ.

Tɛɛlese pou nyɔɔ ɔ waen,

mena dɔɔ be ta gyoo ateŋse.

8Karatetee dokoloŋ Babilɔn waa lee yala na waa tekerii.

Ɛ lɔ nɔɔ lee ŋon dɔɔ.

Ɛ gyae nuŋtee doo ɔ gyamɛɛ,

mberem ŋe gyae ka yeŋ.

9< <<De gyaewɔ nyi nafɔ dɛɛ kyɔ Babilɔn kawee,

mɔna da te tale ya,

ɛ yela dee tina e yela, na ɔkamasɛ ke gyu ŋon gbagba tɛɛle man,

nawolo nyi ɔ nombiakedi te lii ŋɔma man,

ŋe ta gyem gyu naŋ adido.>>

10Degbeŋgyoo te fa daa deŋele kedi,

ɛ kɔŋ dee gyu Siyɔn keyako,

kpene keŋ Degbeŋgyoo de Wurubuarɛ be yɛɛ.>>

11Ɛ sara ɛ baŋdaŋ nyeela,

ɛ mo ɛ nyeela pampasaŋse.

Degbeŋgyoo te wosi Media gyooneŋ,

nawolo nyi ɔ nyeeman kebake yɛna nyi waa wɔlɛɛ Babilɔn.

Degbeŋgyoo waa wɔŋ deŋele tɔ kom,

Deŋele kewɔŋ fa wɔ ɔsom deni dinaa keŋ,

12Ɛ gyina felage Babilɔn akyaŋse dɔɔ.

Ɛ yela kegyee keŋ ke yɛɛ doŋ,

ɛ mo gyeera baŋ see be daseŋae man,

Ɛ yela baale ka yoe.

Degbeŋgyoo waa yɛɛ ɔ nyeeman kebake,

keŋ ɔ be yako nyi waa yɛɛ tia Babilɔn nɛ.

13Ɛmɛɛ baŋ ɛ kyaa booneŋ burum nɔɔman,

te ɛ be nyiŋ ɛ wose nideli nɛ,

yɔ ɔto te lii,

keŋ baa wɔlɛɛ ŋon.

14Degbeŋgyoo Doŋ Pou Nyee te kaŋ ɔ wose ntam,

Maa mo yoonɔɔtena kaa wuu ɛ dɔɔ ŋgba akpataana dikpii nɛ,

na baa fae keyoodi yeesa ɛ dɔɔ.

15Ŋon moona ɔ doŋ yɛɛ tɛɛle kei,

ɔ moo ɔ nyansa yela tɛɛle seŋawɔ

te ɔ moo ɔ nombia man kenyii fɛlɛɛ adido.

16Akpaa ɔ fae na, adido loŋse ne muusu,

ɔ ne yele debuŋta na koro lee tɛɛle ɔto.

Ɔ ne yele ɔga keŋmaale ne ŋmaale ɔga man,

na ɔ ta lese feliŋ lee wa abɔɔ dɛɛseese man.

17Walaŋ kamasɛ yɛɛ diyiŋte e, te ɔ ba gyeŋ daale ya,

kɔba yayam luure kamasɛ bane na doona e desɛŋ.

Abɔɔ ŋan ɔ ne yɛɛ nɛ yɛɛ akɛrɛɛ,

weesɛɛ be doo ŋe man ya.

18Be yɛɛ behuhoonawɔ, te bɔɔ doo daale man ya,

wee keŋ baa di be nombia na, baa munu.

19Ŋon ɔ yɛɛ Yakɔbe wui dedii nɛ be doo mena ya,

nawolo nyi ŋon yɛɛna abɔɔ pou,

mo kpuna balaŋ baŋ baa di ɔ dedii,

ɔ yele yɛna Degbeŋgyoo Doŋ Pou Nyee.

20Nyaŋ yɛna me yoo okpokpo,

me yoo abɔɔ,

nyaŋ te maa mo yɛlɛɛ tɛɛlese,

nyaŋ te maa mo wɔlɛɛ gyooridediise,

21nyaŋ te maa mo ko dɛɛkyɔŋ na ɔ kyaare,

nyaŋ te maa mo yɛlɛɛ anebiliŋiŋ na ɔ kaŋare,

22nyaŋ te maa mo ko alo na baale,

nyaŋ te maa mo ko kegyia na alebu na tobaale,

nyaŋ te maa mo ko alebu na tobaale,

23nyaŋ te maa mo kyekpetee namensekɛɛlere na wonembia,

nyaŋ te maa mo kyekpetee wɔɔfarale na nunkyuese,

nyaŋ te maa mo kyekpetee kegyiise baŋ be kyaa gyoo dinaa nawɔɔ man na be kyaarabia.

24<Maa tɔ Babilɔn na baŋ pou be kyaa Babilɔn nombiakumɛɛ ŋan bɔɔ yɛɛ Siyɔn nɛ kom ɛ siaman,> Degbeŋgyoo torola yako.

25<<Nyaŋ bula ŋon n ne wɔlɛɛ abɔɔ, me ta koro n dɔɔ,

nyaŋ ŋon n ne wɔlɛɛ tɛɛle pou,>

maa gyina me nyiŋmaa n dɔɔ,

maa biliŋi neŋ lee kpanaŋse dɔɔ lɔ,

na maa yɛɛ neŋ bula keŋ be kpaa.

Degbeŋgyoo torola yako.

26Bɔɔ gyae baa mo n boe yɛɛ kebɔtala man boe,

yaa baa mo n boe yɛɛ mokɔɔkasee boe ya,

nawolo nyi nyaŋ ke doo yakaa kekpaakekpaa,> Degbeŋgyoo torola yako.

27Ɛ gyina felage tɛɛle keŋ man.

Ɛ wola kaberɛ tɛɛlese man.

Ɛ desina tɛɛlese na be kaa yoo e,

ɛ yilaa Ararɛte na Mini na Asekenase,

gyoori deediise na be kaa yoo e.

Ɛ lese yoonɔɔtena kegyia na be kaa yoo e,

ɛ mo dɛɛkyɔŋse ŋgba akpataana dikpii nɛ kɔŋ.

28Ɛ desina tɛɛlese na be kaa yoo e,

Media gyooneŋ,

na be tɛɛlese dɔɔ kɛɛra na be kyaarabia pou,

na tɛɛlese ŋan pou bee di ŋe dɔɔ nɛ.

29Tɛɛle sereewɔ te ke nyii weeleŋ,

nawolo nyi Degbeŋgyoo nyeeman kebake lee Babilɔn dɔɔ ta sem,

nyi waa yela Babilɔn tɛɛle ke doo yakaa,

na ŋolo be kyaa botɔɔ ya.

30Babilɔn yoonɔɔtena te tina yoo yela,

ba te dɔɔ ba akyaŋse ŋan ne gyee wɔ nɛ man,

be doŋ te taŋ,

ba te yɔkɔse,

Be ta too ba akyaese,

ba te tekerii ba anaanɔɔse nyeela ŋan,

31Yeure silana yeure,

te kpilare silana kpilare,

na be kaa yako Babilɔn gyoo nyi,

be te di ɔ donɔɔ dinaa keŋ pou dɔɔ.

32Ba te lɛo boo dɛɛtoŋae keŋ,

be ta too apaase ŋan,

te gyakoloŋ gyoo yoonɔɔtena baŋ.

33Nnɛ yaa Degbeŋgyoo, Doŋ Pou Nyee, Iserae Wurubuarɛ ŋon ne yako,

<Babilɔn Bu Alebu yɛɛ ŋgba botɔɔ keŋ bee tuku amɔla,

debaŋ keŋ bɛɛ sakatee ŋa nɛ,

teka kyomii na debaŋ keŋ baa kɛrɛɛ e nɛ te lii.>

34Babilɔn gyoo Nebukadenɛsa te tirii daa,

ɔ te yele kekolosi ta gyoo daa,

ɔ te yele de ta bese osuŋ keŋ kolo be doo ke man ya.

Ɔ te lila daa ŋgba doo nɛ,

ɔ moo da abɔɔ kpaakpaa wulu ɔ tɔɔ,

keŋte ɔ tɔe daa leki.

35Baŋ be kyaa Siyɔn nɛ kpa,

nombiakumɛɛ ŋan bɔɔ yɛɛ daa nɛ dɛɛ seele Babilɔn.

Baŋ be kyaa Yerusalɛm nɛ kpa,

<De fatabo dɛɛ seele baŋ be kyaa Babilɔn nɛ.>

36Mena dɔɔ nnɛ yaa Degbeŋgyoo ne yako,

<Kɛɛ, maa di seŋ ɛ wɔle,

na maa wɔŋ deŋele tɔ kom fa ŋon.

Maa yela wɔ ɛpo ka yo,

na ɔ boŋobiise ka yo.

37Babilɔn gyae ka bese donɔɔ keŋ be yɛlɛɛ,

na gbougbouse dekyae,

ke gyae ka bese botɔɔ keŋ dana gyakoloŋ, na balaŋ kekulu,

keŋ walaŋ be kyaa botɔɔ bela ya.

38Ɔ balaŋ pou ne muusu ŋgba dinaate nɛ,

bee wii ŋgba dinaate bia nɛ.

39Akpaa be kedikum da koro nɛ,

maa do kesaa fa wɔ,

na maa yela baa dɛɛse,

na baa lɔ akelelee,

na baa doo yeŋ,>

Degbeŋgyoo torola yako.

40<Maa mo wɔ tisi kɔŋ,

ŋgba namensebia baŋ bee gyu be kaa ko,

ŋgba namense baala na asoose nɛ.

41Ɛ kɛɛ mena keŋ bɔɔ di Babilɔn dɔɔ,

tɛɛle pou wose kegate te kɔŋ ɔto.

Babilɔn gyae ke doo yakaa,

tɛɛlese man.

42Ɛpo gyae ka koro gbaa Babilɔn,

ɔ kegyɔ nedoŋ gyae ke wuu ɔ dɔɔ.

43Ɔ donɔɔse gyae ke doo yakaa,

tɛɛle dowolo na depampaa tɛɛle,

tɛɛle keŋ ŋolo be kyaa ke man ya,

te ŋolo bɛɛ tɛɛ ke dɔɔ laŋ ya.

44Maa wɔŋ Bɛle deŋele Babilɔn,

na maa yela waa tɔe ŋan ɔ be lili nɛ.

Tɛɛlese ba tekaa gyu ɔ gyaŋ bela ya.

Babilɔn dekyaŋ gyae ke tekerii yala.

45Me balaŋ, ɛ lee ɔ man.

Ɛ yeu lɛɛ ɛ nyee,

Ɛ yeu lee Degbeŋgyoo baŋ beiŋ keŋ man.

46Akpaa ɛ nyii be kpa be kpa nombia tɛɛle keŋ man nɛ,

ɛ naa yele ɛ wɔe kelɔ ŋon ya, te ɛ naa yee ya,

be kpa be kpa nombia ne kɔŋ kulutoo kei, na daale mɔ te kɔŋ kulutoo anekɔŋaŋ,

be kpa be kpa nombiakumɛɛ kyaa tɛɛle keŋ man,

te gyooneŋ na koro tia gyooneŋ.

47Nawolo nyi de yɛɛ senaa debaŋ keŋ gyae kekɔŋ,

keŋ maa wɔŋ Babilɔn bɛɛneŋ deŋela,

desɛŋ gyae ke kyaŋ ɔ tɛɛle keŋ pou,

na ɔ balaŋ baŋ pou bɔɔ yale yoo man nɛ, woya ke doo ke dɔɔ.

48Keŋte adido na tɛɛle na ŋan pou doo ŋe man,

baa fae yeesa nyaŋee lee Babilɔn dɔɔ,

nawolo nyi wɔlɛɛra baa lee ado yenaŋ

kɔŋ kaa yoo e.>

Degbeŋgyoo torola yako.

49Kaboena nyi Babilɔn dɛɛ yala lee Iseraetena baŋ ɔ ba koo dɔɔ,

ŋgba mena keŋ bɔɔ ko balaŋ tɛɛle pou dɔɔ,

lee Babilɔn dɔɔ nɛ.

50Ɛmɛɛ baŋ ɛ be yeu lee yoosila nɔɔman,

ɛ ta keŋ ɛ naa sem ya.

Ɛ tɔɔse Degbeŋgyoo tɛɛle lemlem man,

na ɛ ke yela Yerusalɛm ke doo ya nyeempɔ man.>>

51<Desɛŋ te kyaŋ daa,

nawolo nyi be ta tee daa,

te desɛŋ te wuu de sia,

nawolo nyi ŋɔɔla ta gyoo,

botɔɔse ŋan yɛɛ fereŋkyeŋ Degbeŋgyoo ɔsom deni dinaa man.>

52Degbeŋgyoo kpa, <<Mɔna weeya ŋaale ne kɔŋ,

keŋ maa wɔŋ ɔ banɛɛ deŋele,

na baŋ bɔɔ do wɔ gyamɛɛ nɛ,

ke doo tɛɛle keŋ pou dɔɔ keŋee.

53Akpaa Babilɔn da gyem gyu adido,

te ɔ yele ɔ keyeu kagyoo de yɛɛ doŋ koraŋ nɛ,

maa kpila wɔlɛɛra tia e.>

Degbeŋgyoo torola yako.

54De nyii kewii lee Babilɔn,

kolo dinaa keyala kewii,

ta lee Babilɔn tɛɛle man.

55Degbeŋgyoo waa yela Babilɔn ke doo yakaa,

waa yela be yeesa ke kɔŋ ɔto.

Kɔlara yeesa yɛɛ ŋgba loŋse burum yeesa nɛ,

ba woya kemuusu ne wii keŋkeŋ.

56Wɔlɛɛre waa kaa yoo Babilɔn,

baa kyaŋ ɔ baalabia,

na baa tekerii be baŋdaŋse.

Nawolo nyi Degbeŋgyoo yɛɛ Wurubuarɛ ŋon ɔ te tɔ kom,

waa tɔ kom nideli.

57Maa yela ɔ kyaarabia na ɔ siakaralatena,

baŋ bɛɛ kɛɛ tɛɛlese dɔɔ na ɔ kegyiise na ɔ baalabia ke dɛɛse,

baa doo kekpaakekpaa keŋ bɔɔ gyae baa foŋ ya,>

gyoo ŋon ɔ yele yɛna Degbeŋgyoo Doŋ Pou Nyee nɛ, torola yako.

58Nnɛ yaa Degbeŋgyoo Doŋ Pou Nyee ŋon ne yako,

baa tala Babilɔn dekyaŋ keŋ ke dana taneŋ nɛ,

na baa too wa anaanɔɔse ŋan korɛɛ nɛ,

balaŋ baŋ ne naase ba wose diyem bo yakaa,

tɛɛlese kaale pou gyae ke kpa boalaŋ man.>

59Kei yɛna tiila keŋ gbalare Yeremiya ba mo fa kegyia Seraya ŋon ɔ kya yɛna Neriya te ɔ naana yɛna Maseiya debaŋ keŋ ŋon na Yuda gyoo Sedekiya be gyu Babilɔn ɔ gyoori kedi kulutooneŋ anaarate man nɛ. 60Yeremiya ŋmarase nombiakumɛɛ ŋan pou gyae ke kɔŋ Babilɔn dɔɔ, na ŋan pou bɔɔ ŋmarase lee Babilɔn wose man nɛ do tɔne anebɔɔŋ man. 61Ɔ yako Seraya nyiaa, <Akpaa n gyu Babilɔn nɛ, kɛɛ nyi n te kala nombia kɛŋa pou keŋkeŋ. 62Na n ke yako nyiaa, <<Degbeŋgyoo, nyaŋ yakola nyi nyaŋ ke wɔlɛɛ kɛbo keŋ nyi denibalaŋ na wonembia be gyae baa kyaa ke man ya, ke gyae ke doo yakaa kekpaakekpaa.>> 63Akpaa n kala tɔne anebɔɔŋ kei taŋ nɛ, mo boe kpaŋna ke na n ke fuŋ ke do Eferatese boo man. 64Na n ke yako nyiaa, <<Mena te Babilɔn waa munu keŋ ɔ ba lee bela ya, lee nombiikum keŋ maa mo kɔŋ ɔ dɔɔ nɛ dɔɔ. Te ɔ balaŋ baa yala.> >>

Yeremiya nɔɔwoya ɔto yaa.