Yeremiya 50

Babilɔn wose man nombii

1Nnɛ yaa Degbeŋgyoo tɛɛwɔ gbalare Yeremiya dɔɔ kolosi lee Babilɔn na Babilɔn1 tɛɛle wose man.

2Ɛ gyɔ dekpeŋkpeŋ na ɛ ka toro yako tɛɛlese man,

ɛ gyina felage adido na ɛ ka dekpeŋkpeŋ,

ɛ naa mo kolo weese ya, mɔna ɛ yako nyiaa,

<<Baa di Babilɔn dɔɔ,

Desɛŋ gyae ke kyaŋ Bɛle,

Gyakoloŋ ta gyoo Maraduke.

Be ta do ɔ banɛɛ dinɔɔ pou desɛŋ,

na gyakoloŋ ka gyoo ɔ bɛɛneŋ.

3Tɛɛle daale gyae ka lee adoyenaŋ kaa yoo e,

na baa yela ɔ tɛɛle ke doo yakaa.

Ŋolo be gyae waa kyaa ke man ya,

denibalaŋ na wonembia pou baa yeu lee ke man.

4Degbeŋgyoo kpa, <Weeya ŋenaŋ na debaŋ kenaŋ man nɛ,

Iseraetena na Yudatena pou,

baa mo siasaraŋ kɛo Degbeŋgyoo be Wurubuarɛ.

5Baa bɔɔse Siyɔn gbɛɛ,

na baa mo be sia tee botɔɔ.

Baa kɔŋ na baŋ na Degbeŋgyoo,

ke bake nɔɔ see kekpaakekpaa,

keŋ bɔɔ gyae baa wolee ke ya.

6Me balaŋ ta bese namense baŋ bɔɔ yoo,

be kɛɛlera ta mo wɔ yo gbɛɛ,

te be yelaa bee kili bulase dɔɔ.

Bee kyeŋgbeŋ bulase na bulasebia dɔɔ,

te be wolee baŋ gbagba dedoi.

7Ɔkamasɛ ŋon ɔ naa wɔ na, ɔ na kyekpetee wɔ,

be kɔlara ne yako nyiaa, <<De te di fɔɔ ya,

nawolo nyi baŋ gbagba yɛɛna dukum tia Degbeŋgyoo, ŋon ɔ yɛɛ be wonembia deedii kpaakpaa nɛ,

Degbeŋgyoo yɛna be naanaɔ lookegyakaa.>>

8<Ɛ yeu lee Babilɔn lɛɛ ɛ nyee,

ɛ lee Babilɔntena tɛɛle man,

na ɛ ke yɛɛ ŋgba asoose baŋ be dɔŋ wonembia siaman nɛ.

9Nawolo nyi maa putii tɛɛlese doŋ nyibaŋ lee adoyenaŋ tɛɛle man,

na baa yɛɛ nɔɔ kaa yoo Babilɔn.

Baa bake gbegyase seŋ na baa yoo e,

na baa di ɔ dɔɔ lee adoyenaŋ.

Be baŋdaŋ nyeela yɛɛ ŋgba yoonɔɔtena baŋ ba gyeŋ nyiŋmaa man tom,

baŋ bɔɔ ne gyu bese kɔŋ nyiŋmaase wolo ya nɛ.

10Mena dɔɔ baa kuu Babilɔntena abɔɔ yooman,

baŋ pou baa kuu ba abɔɔ ŋan nɛ, baa nyiŋ abɔɔ nideli,>

Degbeŋgyoo torola yako.

11<Ɛmɛɛ baŋ ɛ ne ŋmaa me dedii,

keŋ ɛ ne nyaŋee te ɛ ne di gyoŋ,

nawolo nyi ɛ na toŋee ŋgba nunkyue bu ŋon ɔ ne tuku amɔla,

te ɛ ne wii ŋgba dɛɛkyɔŋ baala dɔɔ,

12desɛŋ gyae ke kyaŋ ɛ naa nideli,

ŋon ɔ ba lola neŋ nɛ sia gyae ka yeŋ.

Waa yɛɛ kemaasabii tɛɛlese man,

waa yɛɛ depampaa na tɛɛle dowolo, na tɛɛle keŋ bɔɔ bɛɛ ke.

13Lee Degbeŋgyoo baŋ dɔɔ, ŋolo be gyae waa kyaa ke man ya,

mɔna baa bɛɛ ke kerekere.

Baŋ pou baa mo Babilɔn nɛ nɔɔ gyae ke doo wɔ,

baa kulu e lee ɔ gyamɛɛ dɔɔ.

14Ɛmɛɛ baŋ ɛ ne tɔ baŋdaŋse,

ɛ bake gbegyase Babilɔn dɔɔ.

Ɛ tɔ e baŋdaŋse. Ɛ naa kaase baŋdaŋ nyeela ŋaale ya,

nawolo nyi ɔ te yɛɛ dukum tia Degbeŋgyoo.

15Ɛ fae yoo yeesa tia e yenaŋ kamasɛ,

ɔ te tale seŋ yoo keŋ man, ɔ dekagyase te yale,

wa akyaŋse te tekerii yala.

Keŋ kei yɛna Degbeŋgyoo komketɔ dɔɔ,

ɛmɛɛ mɔ ɛ tɔ e kom,

ɛ yɛɛ e ŋgba mena keŋ ɔ be yɛɛ baale nɛ.

16Ɛ lese ŋon ɔ ne duu abɔɔ,

na ŋon ɔ dana sakawa ɔ ne kɛrɛɛ nɛ lee Babilɔn.

Lee ŋon ɔ na ŋere ŋon do nɛ yoosila dɔɔ,

yela ɔkamasɛ ka bese gyu ŋon gbagba ɔ balaŋ man,

yela ɔkamasɛ ke yeu gyu ŋon gbagba ɔ tɛɛle man.

17<<Iserae yɛɛ wonembia baŋ bɔɔ yaasee,

baŋ dinaatese be gegi wɔ do ŋale.

Ŋon ɔ be taŋgbɛɛ kyekpetee wɔ,

yɛna Asiriya gyoo,

ɔtomante ŋon ɔ be yɛlɛɛ be ŋɔɔ,

yɛna Babilɔn gyoo Nebukadenɛsa.>>

18Mena dɔɔ nnɛ Degbeŋgyoo Doŋ Pou Nyee, Iserae Wurubuarɛ ŋon ne yako,

<<Maa wɔŋ Babilɔn gyoo na ɔ tɛɛle deŋele,

ŋgba mena keŋ mɔɔ wɔŋ Asiriya gyoo deŋele nɛ.

19Mɔna maa besena Iserae kɔŋ ŋon gbagba ɔ tɛɛle man,

na baa dii Kamɛle na Basan tɛɛle man,

baa nyiŋ keŋ ne gyɔ wɔ loo nɛ di baa,

Ɛferayim na Gileade bulasebia dɔɔ.

20Degbeŋgyoo kpa,

weeya ŋenaŋ man na debaŋ kenaŋ nɛ,

baa kɛo Iserae dukum,

mɔna bɔɔ gyae baa nyiŋ ya,

baa kɛo Yuda dukum,

mɔna bɔɔ gyae baa nyiŋ ya,

nawolo nyi maa mo kyɛɛ baŋ mɔɔ kaase wɔ nɛ.

21<<Ɛ yoo Meratayim tɛɛle,

na baŋ be kyaa Pekode nɛ.

Ɛ kuu gyakaa be dɔɔ, ɛ koe wɔ na ɛ ke wɔlɛɛ wɔ kerekere.

<Ɛ yɛɛ kpene kamasɛ keŋ mɔɔ faedo ŋon nyi yaa yɛɛ nɛ.

Degbeŋgyoo torola yako,

22Yoo yeesa ne wii tɛɛle keŋ man,

kewɔlɛɛ dinaa yeesa,

23Kɛɛ mena keŋ bɔɔ yɛlɛɛ,

tɛɛle pou yaasee ke.

Babilɔn te kaa doo yakaa,

tɛɛlese pou man.

24Babilɔn, me nyɔɔ neŋ kɔta,

te ke kyaŋa neŋ pɛte n gyeŋawɔ,

be naa neŋ te be dii n dɔɔ,

nawolo nyi n seŋawɔ tia Degbeŋgyoo.

25Degbeŋgyoo ta toro ɔ yoo abɔɔ dɛɛsee deni,

te ɔ lese ɔ baŋ yoo abɔɔ debɔɔ,

nawolo nyi Degbeŋgyoo, Doŋ Pou Nyee ŋon dana tom waa yɛɛ,

Babilɔntena tɛɛle man.

26Ɛ lee lemlem kaa yoo e.

Ɛ yɛlɛɛ ɔ wamela kpeese,

ɛ yilaa e see ŋgba wamela te be yilaawɔ nɛ.

Ɛ wɔlɛɛ e kerekere,

te ɛ naa kaase e kolo na kolo ya.

27Ɛ koe ɔ nunkyue baalabia pou,

ɛ mo wɔ tisi gyu be dɛɛ koe wɔ man.

Baa laako. Nawolo nyi ba weeya te lii,

ba deŋele kewɔŋ debaŋ te lii.

28Ɛ nyii baŋ bɔɔ yekii, na baŋ yoo be gegi wɔ lee Babilɔn nɛ woya,

bɛɛ toro Degbeŋgyoo komketɔ yako,

ɔ komketɔ lee wɔ ɔsom deni dinaa,

keŋ dɔɔ Siyɔn.

29Ɛ baake baŋdaŋ tɔɔra kaa yoo Babilɔn,

baŋ ba gyeŋ baŋdaŋ ketɔ nideli.

Ɛ yilaa kilisi e pou,

ɛ naa yele ŋolo ke nyiŋ gbɛɛ yeu lɛɛ ɔ nyee ya.

Ɛ tɔ e ŋan ɔ be yɛɛ nɛ kom,

ɛ yɛɛ e ŋgba mena keŋ ɔ be yɛɛ nɛ.

Nawolo nyi ɔ te gate ɔ wose Degbeŋgyoo,

Iserae Fereŋkyeŋte ŋon dɔɔ.

30Mena dɔɔ ɔ tewulɛɛ baa yoo yala abɔnterese man,

ɔ yoonɔɔtena pou baa yekee wee kenaŋ,

Degbeŋgyoo torola yako.

31Degbeŋgyoo, Degbeŋgyoo Doŋ Pou Nyee ŋon kpa, <<Kɛɛ, nyaŋ agaŋtaŋte, me ta seŋ tia neŋ,

nawolo nyi n wee te lii,

debaŋ keŋ maa wɔŋ n deŋele te lii,>

32Agaŋtaŋte waa gyɔ ɔ nae na waa lee yala,

keŋ ŋolo be gyae waa gate e ya.

Maa too ɔ donɔɔse pou,

na ke kpa baŋ pou be kyaa kilisi e nɛ.>

33Nnɛ yaa Degbeŋgyoo Doŋ Pou Nyee ŋon ne yako,

Be ta ŋere Iseraetena do,

te Yudatena mɔ mena.

Baŋ pou bɔɔ di be dɔɔ nɛ dana wɔ keŋkeŋ,

ba te bɛɛ nyi bɔɔ tina wɔ yela baa ta ya.

34Mɔna be lɛɛre dana doŋ,

ɔ yele yɛna Degbeŋgyoo Doŋ Pou Nyee.

Waa di lɛɛ ɔ balaŋ nideli,

na waa mo kefɛɛfo kɔŋ be tɛɛle man,

mɔna waa mo woseyooreŋ do Babilɔntena man.

35Degbeŋgyoo kpa,

<Yoosila dɛɛ koe Babilɔntena,

dɛɛ koe baŋ be kyaa Babilɔn,

na ɔ kyaarabia na ɔ siakaralatena.

36Yoosila dɛɛ koe wa akɛrɛɛ gbalara baŋ.

Baa bese ayiŋtena.

Yoo dɛɛ koe ɔ yoonɔɔtena.

Gyakoloŋ gyae ka gyoo wɔ.

37Yoosila dɛɛ koe ɔ dɛɛkyɔŋse na wa anebiliŋiŋse,

na ŋɔɔla baŋ pou be kyaa be man.

Baa yɔkɔse.

Yoo dɛɛ wɔlɛɛ ɔ dedii dɛɛsee.

Baa kuu wa abɔɔ yoo man.

38Dugbutu dɛɛ lee,

na ɔ loŋse pou ka yo.

nawolo nyi ke yɛɛ tɛɛle keŋ bɛɛneŋ be lɛɛ ke,

gyakoloŋ gyae ke yela bɛɛneŋ baŋ ka gyoo ateŋse.

39Mena dɔɔ kefula man wonembia na mokɔɔtese baa kyaa botɔɔ,

na kpilimse mɔ ke kyaa botɔɔ.

Walaŋ ba tekaa kyaa botɔɔ bela,

yaa baa kyaa botɔɔ lee kalola kegyakaare kelii kalola kegyakaare dɔɔ ya.

40Mena keŋ mɔɔ yɛlɛɛ Sodom na Gomora,

mo kpuna ŋe donɔɔse ŋan be kilisi wɔ nɛ,

mena te ŋolo be gyae waa kyaa botɔɔ ya,

balaŋ ba tekaa kyaa botɔɔ ya.

Degbeŋgyoo torola yako,

41Kɛɛ, yoonɔɔtena baale ta lee adoyenaŋ bɛɛ kɔŋ,

be te putii tɛɛle dinaa daale na gyooneŋ burum,

lee tɛɛlese ɔto bɛɛ kɔŋ.

42Be baana baŋdaŋse na apiase,

be dana nyeeman doŋ keŋ bɔɔ ne wii walaŋ waraŋase ya.

Be kyaa be dɛɛkyɔŋse dɔɔ na,

be yeesa yɛɛ ŋgba ɛpo ke muusu nɛ,

ba te bake gbegya bɛɛ kɔŋ,

be kaa yoo nyaŋ Babilɔn bu alebu.

43Babilɔn gyoo te nyii ba wose man nombia,

te ɔ nyiŋmaase yeŋa e.

Ɔ wose te kyaŋ e,

ɔ ne nyii weeleŋ ŋgba alo ŋon ɔ na doŋee nɛ.

44Mena keŋ dinaate na lee Yɔɔdan laa tuum man,

kɔŋ tɛɛle kpaakpaa man nɛ,

mena te maa kuu kyaa Babilɔn dɔɔ, lee ɔ tɛɛle man karatetee dokoloŋ.

Amɔte yɛna ŋon mɛɛ gyae e, na maa lese e fa tom kei keyɛɛ?

Amɔte yɛɛla ŋgba maŋ nɛ, te amɔte ne gyaela wa tale seŋ me siaman?

Te namensekɛɛlere woŋti ne gyaela waa tale seŋ me siaman?>

45Mena dɔɔ ɛ nyii keŋ Degbeŋgyoo be bake tia Babilɔn,

na nyeempɔ keŋ ɔ ba mo tia Babilɔntena tɛɛle wose man,

baa tuu be namensebia laŋ,

be namense deedii gyae ke doo be nɔɔ lee keŋ be kɔŋ be dɔɔ nɛ dɔɔ.

46Akpaa be di Babilɔn dɔɔ nɛ, ke yeesa gyae ke wosi tɛɛle,

na be kewii kelii tɛɛlese man.