Yeremiya 49

Nombii lee Amon wose man

1Nombii lee Amonitena wose man,

Nnɛ yaa Degbeŋgyoo ne yako,

<<Iserae be dana bia tewulɛɛ yee?

Iserae be dana abɔɔdiiri yee?

Weera te Molɛke kaa moo Gade bese ɔ wui?

Weera te ɔ balaŋ kyakɛɛ ke donɔɔse man?

2Degbeŋgyoo ta toro yako nyi,

<<Mɔna weeya ŋaale ne kɔŋ,

Keŋ maa yela yoo yeesa,

ke wii Amonitena donɔɔ dinaa Raba man,

ke gyae ka bese donɔɔ keŋ be yɛlɛɛ,

na baa too ka akuraase ŋan be kilisi ke nɛ.

kenaŋ na Iserae waa bese lɛo ɔ tɛɛle,

lee baŋ bɔɔ gegi e lee nɛ gyaŋ.

Degbeŋgyoo yakola.

3Hɛsebɔn, lɔ nɔɔ, nawolo nyi ba te wɔlɛɛ Ai,

Ɛmɛɛ Rabatena, ɛ wii keŋkeŋ.

Ɛ mo titirese kaa na ɛ ke di waraŋsa,

Ɛ yekii gyoo lee akyaŋse ŋan man,

nawolo nyi baa mo Moleke gyu yoo gbeŋiri man,

mo kpuna ɔ saese na ɔ kyaarabia.

4Weera te n ne gate n wose lee n detaŋgyase dɔɔ,

te n ne gate n wose nyi n detaŋgyase ne de abɔɔ?

Amon bu Alebu ŋon n bee di anokoare ya,

n na mo n wose lɔ n wosekenyiŋ dɔɔ yako nyiaa,

<Amɔte ne gyaela waa tale yoo maŋ?

5Degbeŋgyoo, Degbeŋgyoo Doŋ Pou Nyee, ta toro yako nyi,

<Kɛɛ, maa mo gyakoloŋ lee baŋ pou bɔɔ kilisi ŋon,

nɛ man kaa do ɛ man,>>

<<Baa gegi ɛ man walaŋ kamasɛ lee,

te ŋolo be gyae waa yilaa yoo gbeŋa baŋ ya.

6<<Mɔ kenaŋ wɔle na, maa besena Amonitena see ba beneŋ man,>>

Degbeŋgyoo torola yako

Ɛdom wose man nombia

7Nombii lee Ɛdom wose man

Nnɛ yaa Degbeŋgyoo Doŋ Pou Nyee ne yako,

<<Nyansa ba tekaa kyaa Teman bela yee?

Kekolosifa ta yoo lee nombia gyeŋara man?

Be nyansa keŋ te dale?

8Ɛmɛɛ Dedanetena,

ɛ bese ɛ wɔle na ɛ ke yeu ka yo boya bɔɔneŋ ŋan ŋe dana siiliŋ nɛ man,

nawolo nyi maa yela nombiikum ke yala Esawu,

debaŋ keŋ maa wɔŋ ɔ deŋele nɛ man.

9Nyi gerepo kɔɔra de kɔŋ kaa kɔ gerepo na,

bɔɔ gyae baa tina ŋaale yela ŋe woŋse dɔɔ yee?

Nyi ŋmɛɛlatena de kɔŋ kaa ŋmɛɛle nelim na,

bɔɔ gyae baa ŋmɛɛle ŋan pou bɛɛ gyae nɛ yee?

10Mɔna maa kpee Esawu deteŋteli,

maa lese botɔɔse ŋan ɔ na yoo nɛ debɔɔ,

na ɔ be nyiŋ weese ɔ wose ya.

Baa wɔlɛɛ ɔ yoonɔɔtena,

mo kpuna baŋ ɔ ne gyae nɛ na ɔ dɔɔna,

na ŋolo be kaa na waa yako nyi,

11<Tina ɛ yoyolobiise yela fa maŋ, maa gyee ba nyee.

Ɛ liala mɔ baa tale mo ba wose lɔ me dɔɔ ya.> >>

12Nnɛ yaa Degbeŋgyoo ne yako, <<Nyi akpaa baŋ ba tekaboena nyi baa nyɔɔ leenɔɔ keŋ man ya, baa nyɔɔ ke man na, kenaŋ na weera dɔɔ te bɔɔ wɔŋ n deŋele ya? Bɔɔ tina neŋ yela nyi bɔɔ wɔŋ n deŋele ya, mɔna kaboena nyi nyaa nyɔɔ ke. 13Degbeŋgyoo ta toro yako nyiaa, <<Ma te kɛɛ maŋ gbagba ma wose nyiaa, <<Bosara gyae ke yɛlɛɛ na baa mo ɔ yele falaa. Ke gyae ke yɛɛ gyakoloŋ na baa kulu ke, na ke donɔɔse pou ke yɛlɛɛ kekpaakekpaa.>>

14Me nyii nombii lee Degbeŋgyoo gyaŋ nyiaa,

be kpila kpilare ŋolo gyu tɛɛlese man nyi,

<<Ɛ yilaa ɛ wose na ɛ ke yoo ke.

Ɛ kpaŋ gbegya fa yoo.>>

15Nɛnɛɛ maa yɛɛ neŋ peperee tɛɛlese man,

denibalaŋ be gyae baa kala neŋ do kolo man ya.

16Gyakoloŋ keŋ n na do balaŋ,

na n wose kegate na beo neŋ,

nyaŋ ŋon n kyaa kpanaŋse bɔɔneŋ man,

te n kyaa bulase nyeeya dɔɔ.

Doo nyi n ta loo n desaa adido adido ŋgba otoloku nɛ,

maa tisina neŋ lee botɔɔ kɔŋ tɛɛle man,>>

Degbeŋgyoo torola yako

17Maa wɔlɛɛ Ɛdom na ke ka bese gyakoloŋ,

baŋ pou baa mo botɔɔ nɛ wose gyae ke gbirisi wɔ na ke doo be nɔɔ,

lee mena keŋ bɔɔ yɛlɛɛ ke nɛ dɔɔ.

18Mena keŋ bɔɔ wɔlɛɛ Sodom na Gomora,

mo kpuna ke donɔɔse ŋan kpuɛna ke nɛ,

mena te ŋolo be gyae waa kyaa botɔɔ ya,

te balaŋ mɔ be gyae baa kyaa botɔɔ bela ya,

Degbeŋgyoo yakola.

19<<Mena keŋ dinaate na lee Yɔɔdan laa tuum man,

gyu wonembia deedii man nɛ,

mena te maa gegi Ɛdom, lee tɛɛle keŋ man karatetee.

Amɔte yɛna ŋon mɛɛ gyae e, na maa lese e waa yɛɛ kei?

Amɔte yɛɛlaa ŋgba maŋ nɛ, te amɔte ne gyaela waa tale seŋ me siaman?

Namensekɛɛlere woŋti ne gyaela waa tale seŋ tia maŋ?

20Mena dɔɔ ɛ nyii keŋ Degbeŋgyoo be bake tia Ɛdom,

na nyeempɔ keŋ ɔ ba moo tia balaŋ baŋ be kyaa Teman.

Baa tuu be namense buruburu laŋ,

be namense deedii gyae ke doo be nɔɔ, lee keŋ be kɔŋ nɛ dɔɔ.

21Ba keyala yeesa gyae ke yela tɛɛle ke seree,

be kewii gyae kelii naŋ ɛpo yayam man.

22Kɛɛ, otoloku waa furufu na waa tisi kɔŋ,

ɔ te fɛlɛɛ ɔ beŋkelɛɛ kuŋaa Bosara dɔɔ.

Wee kenaŋ na Ɛdom yoonɔɔtena konɔɔse,

gyae ke yɛɛ ŋgba alo ŋon ɔ na doŋee nɛ konɔɔ.

Damasekɔse wose man nombii

23Damasekuse wose man nombii yaa.

<<Hamate na Arepade te yala koyololo,

nawolo nyi be te nyii nombiikum.

Be wɔe ne lɔ wɔ,

ŋgba ɛpo kegyɔ keŋ bɛɛ fɛɛfo ya nɛ.

24Damasekuse te yɔkɔse,

ɔ ta besena ɔ wose waa ta,

te wɔe kelɔ ta gyoo e,

kayeyɛɛ na weeleŋ te kyaŋ e,

weeleŋ ŋgba alo ŋon ɔ na doŋee nɛ.

25Weera te be tinaa donɔɔ dinaa keŋ kɔɔ lɛɛ yele,

donɔɔ keŋ kɛɛ gyoo me sia nɛ yela mena?

26Mena dɔɔ baa koe ɔ tewulɛɛ lɔ abɔnterese man,

na baa koe be yoonɔɔtena pou mena wee kenaŋ,>>

Degbeŋgyoo Doŋ Pou Nyee torola yako.

27<<Maa too Damasekuse akyaŋse,

ke gyae ke kpa botɔɔse ŋan ne gyee Bɛne Hadade nɛ.>>

Kedare na Hasɔ wose man nombii

28Kedare na Hasɔ gyooridediise ŋan, Babilɔn gyoo Nebukadenɛsa be wɔlɛɛ ŋa nɛ wose man nombia yaa.

Nnɛ yaa Degbeŋgyoo ne yako,

<<Ɛ koro na ɛ ke yoo tia Kedare

na ɛ ke wɔlɛɛ weese dɛɛlee yenaŋ balaŋ baŋ.

29Baa mo be kanyaŋ denɛɛ na be wonembia,

baa kuu ba kefɛɛse laŋ,

mo kpuna ba abɔɔ na be kurumɔɔse pou.

Balaŋ baa fae yeesa nyiaa,

<Gyakoloŋ ta gyoo yenaŋ kamasɛ.>

30<<Ɛ yeu ta bileŋ.

Ɛmɛɛ baŋ ɛ kyaa Hasɔ nɛ, ɛ gyu ka yo boya bɔɔneŋ ŋan ŋe dana siiliŋ nɛ man,>>

Babilɔn gyoo Nebukadenɛsa te bake tia ŋon.

ɔ te bake ɔ nyeeman tia ŋon.

Degbeŋgyoo torola yako.

31<<Ɛ koro na ɛ ke yoo tɛɛle keŋ be kyaa wose kefɛɛ man,

be kyaa keŋ be wɔe bɛɛ lɔ wɔ ya,>>

Tɛɛle keŋ bɔɔ dana anaanɔɔse yaa nyeela ŋe man ya nɛ,

baŋ baageŋ kyaala, keŋ be wɔe bɛɛ lɔ wɔ ya.

Degbeŋgyoo torola yako,

32Baa mo be kurumɔɔse yooman,

na be wonembia burum baŋ ka bese yooman abɔɔ.

Maa yela feliŋ ke yaasee baŋ be kyaa lemlem nɛ,

na maa yela nombiikum ke yala wɔ lee yenaŋ kamasɛ,>>

Degbeŋgyoo torola yako.

33<<Hasɔ gyae ka bese gbougbouse dekyae,

baa bɛɛ ke kekpaakekpaa.

Ŋolo be gyae waa kyaa botɔɔ ya,

balaŋ be gyae baa kyaa ke man ya.>>

Elam wose man nombii

34Kei yɛna nombii keŋ Degbeŋgyoo be yako gbalare Yeremiya lee Elam wose man, debaŋ keŋ Yuda gyoo Sedekiya be di gyoori kewalaŋ nɛ.

35Nnɛ yaa Degbeŋgyoo Doŋ Pou Nyee ne yako.

<<Kɛɛ, maa tekerii Elam baŋdaŋ,

keŋ be doŋ doo ke man nɛ.

36Maa mo feliŋse anaara ŋan lee,

adido yenaase anaara ŋan kaa tia Elam.

Maa yaasee wɔ do feliŋ anaara ŋan man,

te tɛɛle daale be gyae ke kyaa,

botɔɔ keŋ Elametena te gyu yoo gbeŋiri man nɛ ya.

37Maa do Elametena gyakoloŋ be kɔlara siaman,

baŋ bɛɛ gyae wɔ baa ko nɛ siaman,

Maa yela nombiikum ke yala wɔ,

lee me baŋ beiŋ keŋ dɔɔ,

maa mo yoosila gegi wɔ,

kaboena maa munu wɔ pou,

Degbeŋgyoo torola yako.

38Maa see me gyooro gbeli Elam,

na maa wɔlɛɛ ɔ gyooneŋ na ɔ kyaarabia,>>

Degbeŋgyoo torola yako.

39Mɔna weeya ŋaale ne kɔŋ,

keŋ maa besena Elam see ɔ beneŋ man,>>

Degbeŋgyoo torola yako.