Yeremiya 48

Moabe wose man nombii

1Degbeŋgyoo Doŋ Pou Nyee, Iserae Wurubuarɛ ŋon kpa,

Nebo dɛɛ laako, nawolo nyi baa wɔlɛɛ ke,

Desɛŋ gyae ke kyaŋ Kiriyatayim, na baa di ɔ dɔɔ,

desɛŋ gyae ke kyaŋ ɔ dekagyase, na baa wɔlɛɛ ŋa.

2Bɔɔ tekaa lese Moabe yele bela ya,

ba te bake ɔ nyeeman Nyeempɔkum Hɛsebɔn nyi,

<< Ɛ kɔŋ, ɛ yela dɛɛ wɔlɛɛ tɛɛle kenaŋ kekpaakekpaa,>>

Ɛmɛɛ Mademetena, baa yela ɛ nɔɔ ke wuu,

yoosila gyae ke gegi ŋon.

3Ɛ tei, kewii na lee Horonayim,

diyem kena na kewɔlɛɛ dinaa kewii.

4Ba te wɔlɛɛ Moabe,

ɔ bia buruburu ne wii keŋkeŋ,

5Ba gyeŋa bulabii keŋ gyu Luhite,

bee gyu na bee wii nideli,

be ke tisi mo Horonayim gbɛɛ keŋ na,

bee nyii be kewii lee ba kewɔlɛɛ keŋ dɔɔ.

6Ɛ yeu, ɛ yeu lɛɛ ɛ nyee,

ɛ yɛɛ ŋgba depampaa man afurum nɛ.

7Keŋ ɛ na mo ɛ wose lɔ ya abɔɔ ayɛɛsa, na ɛ wosekenyiŋ dɔɔ nɛ,

baa yoo kyaŋ ŋon,

na baa mo Kemose gyu yoo gbeŋiri man,

mo kpuna ɔ saese na ɔ kyaarabia.

8Wɔlɛɛre ŋon waa kaa wɔlɛɛ donɔɔ kamasɛ,

keŋ donɔɔ daale be gyae waa nyiŋ gbɛɛ yeu lɛɛ ɔ nyee ya.

Baa wɔlɛɛ detaŋgya keŋ,

na baa wɔlɛɛ bula nyeedɔɔ tɛɛle keŋ,

nawolo nyi Degbeŋgyoo te kolosi.

9Ɛ mo yabia ŋmatee Moabe tɛɛle

nawolo nyi ke gyae ke doo yakaa,

ɔ donɔɔse gyae ke doo yakaa,

keŋ ŋolo na ŋolo be gyae waa kyaa ŋe man ya.

10<<Kefaala dɛɛ kɔŋ ŋon ɔ ne yɛɛ kebɔŋale Degbeŋgyoo tom keyɛɛ man nɛ dɔɔ!

Kefaala dɛɛ kɔŋ ɔkamasɛ ŋon ɔ bɛɛ mo ɔ yoosila ko ya nɛ dɔɔ!

11<<Moabe te kyaa wosefɛɛreŋ man leenaŋ ɔ biatɛɛ,

ŋgba waen na ogele keŋ,

ba te kyɛɛkee ke lee kɔ ogele man do daale man ya nɛ,

be ta moota e gyu yoogbeŋiri man ya.

Mena dɔɔ ka gyoŋ doo ka kedoobii,

te kɔ ofoŋ bɛɛ kyɛɛkee ya.

12Mɔna Degbeŋgyoo ta toro yako nyiaa, <<Kɛɛ, weeya ŋaale ne kɔŋ,

keŋ maa kpila baala baŋ bɛɛ kyɛɛkee lee ogelese man,

na baa kyɛɛkee ke lee kɔ ogele man leki,

baa kyɛɛkee ŋa pou leki,

na baa yɛlɛɛ ɔ ogelese ŋan bogobogo.

13Kenaŋ na desɛŋ gyae ke kyaŋ Moabe lee Kemose dɔɔ,

ŋgba mena keŋ desɛŋ be kyaŋ Iserae,

debaŋ keŋ bɔɔ mo ba wose lɔ Bɛtɛle dɔɔ nɛ.

14<<Sena yaa ɛ ke tale yako nyi, <De yɛɛ baalabiawɔ,

baala baŋ dɛɛ gyɔ konɔɔ gyu yoo>?

15Baa wɔlɛɛ Moabe, na ŋe donɔɔse,

baa koe ɔ tewulɛɛ kpaakpaa nyibaŋ,>>

Gyoo ŋon ɔ yele yɛna Degbeŋgyoo Doŋ Pou Nyee nɛ torola yako.

16Moabe keyala te lii,

nombiikum gyae ke yala e bileŋ.

17Ɛmɛɛ baŋ pou ɛ kyaa kilisi e nɛ, ɛ di waraŋsa fa e,

ɛmɛɛ baŋ ɛ gyeŋ ɔ yele kelɛɛ nɛ,

ɛ yako nyiaa, <Sena yaa be tekeri ɔ gbutu doŋte keŋ,

sena yaa ɔ gyoorobiiri gbutu keŋ tekeriwɔ mena?>

18<<Nyaŋ ŋon n kyaa Dibon,

tisi lee n gyoorobiiri man kɔŋ,

na n kaa kyaa tɛɛle kpakparakpaa man,

nawolo nyi ŋon waa wɔlɛɛ Moabe nɛ,

waa kɔŋ kaa yoo neŋ,

na waa yɛlɛɛ n donɔɔse dinaana ŋan, n be baŋ dekagyase do ŋa nɛ.

19Nyaŋ ŋon n kyaa Aroe,

seŋ gbɛɛnaa nɔɔman na n ke kɛɛ.

Bɔɔse baale ŋon ɔ be yeu lee botɔɔ, na alo ŋon ɔ be nyiŋ gbɛɛ yeu lɛɛ ɔ nyee nɛ,

bɔɔse wɔ nyi, <Woŋ kɔŋala?>

20Be ta do Moabe desɛŋ, nawolo nyi ba te yɛlɛɛ ke bogobogo.

Ɛ wii na ɛ ke fae yeesa keŋkeŋ,

ɛ gyɔ ka dekpeŋkpeŋ Anon,

nyi ba te wɔlɛɛ Moabe.

21Be te bu donɔɔse ŋan kyaa bula nyeedɔɔ nɛ fɔɔ,

ŋan yɛna Holon na Yahasa na Mefaate,

22na Dibon, na Nebo na Bete Dibelatayim,

23na Kiriyatayim na Bete Gamule, na Bete Meon,

24kelii Kiriote na Bosera

kelii Moabe donɔɔse ŋan pou kyaa lemlem na titii nɛ.

25Ba te yɔkɔse Moabe doŋ,1

ɔ bam te tekeri,>>

Degbeŋgyoo torola yako.

26<<Ɛ yela waa dɛɛse,

nawolo nyi ɔ te gate ɔ wose Degbeŋgyoo dɔɔ.

Moabe waa biliŋi ɔ tɔɔla man,

yela baa kulu ŋon mɔ.

27Na Iserae te ɛ kuluwɔ kaalaŋ yee?

Be kyaŋa e kpuna ŋmɛɛlatena,

te ɛ ne kolosi ɔ wose man nombia,

te ɛ ne kpiisi ɛ nyeeya ɔ dɔɔ?

28Ɛmɛɛ baŋ ɛ kyaa Moabe,

Ɛ koro lee ɛ donɔɔse man, na ɛ kaa kyaa kpanaŋse man.

Ɛ yɛɛ ŋgba duwuluŋ ŋon ɔ ba loo ɔ desaa

boebɔɔ nɔɔman nɛ.

29<<De nyii Moabe wose kegate,

wa agaŋtaŋ beiŋ keŋ,

ɔ wose kawola na ɔ wose kegate, na ɔ konɔɔ kegyɔ,

na ɔ konɔɔ kawola.

30Ma gyeŋ ɔ ketiimiiri, mɔna ke yɛɛ yakaa,>>

te ɔ wose kegate yɛɛ yakaa.

Degbeŋgyoo torola yako.

31Mena dɔɔ maa lɔ nɔɔ fa Moabe,

nawolo nyi mee wii fa Moabe,

mee di waraŋsa fa Kire haresetena.

32Nyaŋ Sibema gerepose,

Mee wii fa neŋ ŋgba mena keŋ Yasɛre ne wii nɛ.

N tombia te fɛlɛɛ kelii ɛpo man,

kelii naŋ Yasɛ ɛpo nɔɔman.

Wɔlɛɛre ŋon te yale,

n daasebia ayɛɛ na gerepose dɔɔ.

33Kenyaŋee na gyoŋ kedi ta lee,

Moabe wɔɔse na ŋe tɛɛlese man.

Ma te tɔ waen gbɛɛ lee botɔɔ keŋ bɛɛ ŋmaase ŋa nɛ,

ŋolo ba tekaa mo kenyaŋee yeesa ŋmaase ŋa ya.

Doo nyi yeesa kyaa,

mɔna ŋa te yɛɛ kenyaŋee yeesa ya.

34Be kewii na lee,

Hɛsebɔn kelii Eleale na Yahase,

lee Soa kelii naŋ Horonayim na Ɛgelate Selisiya,

nawolo nyi Nimerim loŋse koraŋ ta yoo.

35Maa wɔlɛɛ baŋ pou,

bee gyu ke deesi bulasebia dɔɔ,

te bɛɛ too oliifi fa be wurubuarɛse Moabe nɛ,>>

Degbeŋgyoo torola yako.

36<<Mena dɔɔ mɛɛ toroŋ me konɔɔ man fa Moabe ŋgba liatɛɛ adolɛɛ kegyɔ nɛ,

kɛɛ toroŋ ŋgba adolɛɛ kegyɔ nɛ fa Kire Haresetena.

nawolo nyi dedii ŋan bɔɔ nyim pou ta lee be nyiŋmaa man.

37Ba te gbee nyee kamasɛ,

te be tisi nɔɔfata kamasɛ,

gyaŋtarɛɛ doo nyiŋmaa kamasɛ man,

te ba moo titire kpaŋee ba teŋase man.

38Moabe denɛɛ pou nyeeya dɔɔ,

na ka abɔnterese pou man nɛ,

n be nyii kolo kpuna waraŋsa kedi ya,

nawolo nyi ma te yɛlɛɛ Moabe,

ŋgba saabu keŋ kɔɔ yɛlɛɛ, te ŋolo be gyae ke ya nɛ,>>

Degbeŋgyoo torola yako.

39<<Kɛɛ mena keŋ bɔɔ yɛlɛɛ ke, mena keŋ ɔ ne lɔ nɔɔ,

Moabe ta mo desɛŋ bese ɔ wɔle,

Moabe ta bese ŋon bee kulu e,

na gyakoloŋ kolo fa baŋ pou bɔɔ kilisi e nɛ.>>

40Nnɛ yaa Degbeŋgyoo ne yako,

<<Kɛɛ, otoloku te furufu tisi ɔ ne kɔŋ,

ɔ te fɛlɛɛ ɔ beŋkelɛɛ kuŋaa ɔ ne kɔŋ Moabe dɔɔ.

41Baa yoo kyaŋ Kiriote,

na baa mo botɔɔse ŋan ne gyee wɔ nɛ.

Mena wee kenaŋ Moabe baalabia konɔɔse,

gyae ke yɛɛ ŋgba alo ŋon ɔ na doŋee nɛ konɔɔ.

42Baa wɔlɛɛ Moabe keŋ ka be gyae ke yɛɛ tɛɛle bela ya,

nawolo nyi ɔ te gate ɔ wose adido tia Degbeŋgyoo dɔɔ.

43Ao Moabetena,

gyakoloŋ na dowokom na kɔta ne daa ŋon,>>

Degbeŋgyoo torola yako.

44Ɔkamasɛ ŋon ɔ yeu lee gyakoloŋ keŋ man,

waa yala gyoo dowokom man,

ɔkamasɛ ŋon ɔ gyem lee dowokom keŋ man,

kɔta gyae ke kyaŋ e,

nawolo nyi maa mo Moabe deŋele kewɔŋ,

kulutoo kɔŋ ɔ dɔɔ,>>

Degbeŋgyoo torola yako.

45<<Baŋ yoo be gegi wɔ te bɔɔ dana doŋ ya nɛ,

seŋɛɛ Hɛsebɔn wuluŋ man,

nawolo nyi boalaŋ ne kpaa lee Hesibɔn,

te boalaŋ ogyefeliŋ na lee Sihɔn,

kɛɛ kpa Moabe siamantena tirinɔɔse,

na baŋ bɛɛ yɛɛ nɔɔman gyɔ be konɔɔse nɛ nyeeya pokoose.

46Nyaŋ Moabe, laako.

Ba te wɔlɛɛ Kemosetena,

be ta mo n bia tewulɛɛ na alebia gyu yoogbeŋiri man,

tɛɛle wɔle daale man.

47<<Mɔna weeya ŋaale ne kɔŋ,

keŋ maa besena Moabe abɔɔ kpaakpaa fa wɔ,>>

Degbeŋgyoo torola yako.

Moabe wose man nombia kedi ɔto yaa.