Yeremiya 47

Filisitena wose man nombii

1Nombii keŋ Degbeŋgyoo be yako gbalare Yeremiya lee Filisitena wose man pɛte Faaro ba ke yoo Gasa yaa,

2Nnɛ yaa Degbeŋgyoo ne yako,

<<Kɛɛ mena keŋ loŋse na koro ado yenaŋ,

ŋe gyae ka bese booneŋ kaa wuu waale.

Ŋe gyae ke waale tɛɛle na kpene kamasɛ keŋ doo ke man,

na donɔɔse na balaŋ baŋ be kyaa ŋe man.

Balaŋ baŋ baa fae yeesa keŋkeŋ,

baŋ pou be kyaa tɛɛle keŋ man baa lɔ nɔɔ,

3lee dɛɛkyɔŋse awɔkatese agiŋgiŋ,

na kɔlara yookɔtase yeesa,

na be nawɔɔ kefiili yeesa dɔɔ.

Lolala be gyae baa gɛɛse kɛɛ be bia ya,

be nyiŋmaase gyae ke yɔkɔse wɔ.

4Nawolo nyi wee daale ne kɔŋ,

keŋ baa wɔlɛɛ Filisitena pou,

na baa lese balaŋ akaŋ baŋ,

baa tale kyɔ Tae na Sidon nɛ.

Degbeŋgyoo ne gyae waa wɔlɛɛ Filisitena,

baŋ bɔɔ kaa Kafatɔ boo keŋ loŋ be kilisi ke man nɛ.

5Gasa waa gbee ɔ nyee waraŋsa kedi man,

Asekelon nɔɔ gyae ke doo e.

Ɛmɛɛ akaŋ baŋ ɛ ba lee kefula man nɛ,

kelii woromɔ yaa ɛ ke tina ɛ wose kekɛrɛɛ yela?

6<< <Ao Degbeŋgyoo yoosila,

kelii woromɔ yaa nyaŋ ke fɛɛfo?

Bese gyoo n bɔɔlee man,

tina yela na n ke yɛɛ diiŋ.>

7Mɔna sena yaa ke gyae ke fɛɛfo,

lee keŋ Degbeŋgyoo faela do ke,

keŋ ɔ be fae do ke nyi,

gyu ke yoo tia Asekelon na ɛpo nɔɔman nɛ?>>