Yeremiya 46

Igyipite wose man nombii

1Nombii keŋ Degbeŋgyoo be yako gbalare Yeremiya lee tɛɛlese ŋan wose man yaa,

2Nombii lee Igyipite wose man.

Kei yɛna nombii lee Igyipite wose man. Yosiya bu Yehoyakim ke di gyoori Yuda kulutooneŋ anaarate ŋon man nɛ, Babilɔn gyoo Nebukadenɛsa kaa yoowɔ di Igyipite gyoo Faaro Neko na ɔ yoonɔɔtena dɔɔ Karekemise, keŋ kyaa Eferate boo nɔɔman nɛ. Degbeŋgyoo yako Igyipite yoonɔɔtena nyiaa,

3<<Ɛ desina ɛ nyeele pampasaŋse dinaana na buruburu,

na ɛ ke gyu yoo.

4Ɛ mo yookɔtase kpaŋna dɛɛkyɔŋse baŋ,

dɛɛkyɔŋ kyaara baa gyeŋ kyaa be dɔɔ.

ɛ wuu nyeela kotɔtɔɔse,

na ɛ ka seŋ ɛ dɛɛ seŋae man,

Ɛ sara ya apiase,

na ɛ ka do ɛ yoo abɔɔ.

5Woŋ yaa mɛɛ naa nɛ?

Gyakoloŋ ta gyoo wɔ,

bɛɛ bese be wɔle,

be te di be yoonɔɔtena dɔɔ.

bee yekii ɔsaa man,

keŋ bɔɔ ne kɛɛ be wɔle ya,

te gyakoloŋ doo yenaŋ kamasɛ,>>

Degbeŋgyoo torola yako.

6<<Ɔsaatena bɛɛ tale baa yeu,

yaa doŋtena ke yeu lɛɛ ba wose ya.

Adoyenaŋ gyu Eferate boo nɔɔman,

bɛɛ gyɔ be naawɔɔ lee yala.

7<<Amɔte yɛna kei ŋon ɔ na koro ŋgba naele boo,

ŋgba boo keŋ be wuu gbaa ne lam nɛ?

8Igyipite na koro ŋgba naele boo nɛ,

ŋgba booneŋ ŋan be wuu gbaa ne lam nɛ.

Ɔ kpa, <Maa koro na maa wuu tɛɛle dɔɔ,

maa wɔlɛɛ donɔɔ dinaana na ŋe man balaŋ.>

9Ɛ faedo dɛɛkyɔŋse,

Dɛɛkyɔŋ kyaara, ɛ mo sibiiyam ŋere gyoo ke man,

ɛmɛɛ Kusi yoonɔɔtena na Putetena baŋ ɛ dana nyeele pampasaŋse,

na Ludi baala baŋ ɛ gyeŋ baŋdaŋ ketɔ, ɛ lee gyu siaman.

10Mɔna wee kenaŋ yɛɛ Degbeŋgyoo, Degbeŋgyoo Doŋ Pou Nyee ŋon wui,

ke yɛɛ dukum kom ketɔ wee ke, ɔ kɔlara kom ketɔ.

Yoosila gyae ka koe, kaboena ka ke baa,

kelii debaŋ keŋ fatabo gyae ka ko ɔ loŋboaneŋ.

Nawolo nyi Degbeŋgyoo, Degbeŋgyoo Doŋ Pou Nyee waa deesi

ado yenaŋ tɛɛle man gyu Eferatese boo nɔɔman.

11<<Igyipite alebu keteŋ,

gyeŋ gyu Gileade n kaa gyae nuŋtee.

Mɔna teeneŋ kpookpoo ŋan n ne yɛɛ nɛ yɛɛ yakaa,

n be gyae n ke nyiŋ kawee kekyɔ ya.

12Tɛɛlese baa nyii n desɛŋ nombia,

n kewii gyae ke lɛɛ tɛɛle dɔɔ pou.

Yoonɔɔte dokoloŋ waa kpaŋte gyoona ɔ dɔɔ,

be bala pou baa lee yala debodokoloŋ.>>

13Nombii keŋ Degbeŋgyoo be yako gbalare Yeremiya, lee mena keŋ Babilɔn gyoo Nebukadenɛsa waa kɔŋ kaa yoo Igyipite nɛ yaa.

14<< Ɛ gyɔ dekpeŋkpeŋ Igyipite, na ɛ ka toro yako ke Migedole,

ɛ toro ke yako Memefise na Tahepanehɛse mɔ nyiaa,

<Ɛ gyu ka seŋ ɛ daseŋae man, na ɛ ke desina ɛ wose,

nawolo nyi yoosila gyae ka koe baŋ bɔɔ kilisi ŋon nɛ.>

15Woŋ dɔɔ te baa kɔna n baalabia tɛɛle man?

Bɔɔ gyae baa tale seŋ ya, nawolo Degbeŋgyoo waa tɛɛse wɔ lɔ.

16Baa kpaŋte agbaatee agbaatee,

na baa lee yala dɔŋa dɔɔ.

Baa yako nyiaa, <Ɛ koro, ɛ yela dɛɛ bese de wɔle,

gyu daa gbagba de balaŋ, na tɛɛle keŋ bɔɔ lola daa nɛ man,

dɛɛ lee baŋ bɛɛ ŋere daa do nɛ yoosila nɔɔman.>

17Botɔɔ te baa fae yeesa nyiaa,

Igyipite gyoo Faaro ne yɛɛ yeesa bo yakaa,

ɔ te yele ɔ gbɛɛ kenyiŋ te laŋ e.>

18Gyoo ŋon ɔ yele yɛna, Degbeŋgyoo Doŋ Pou Nyee nɛ,

ta toro yako nyiaa, <<Maŋ nyiŋaa me kyaa nɛ,

<<Ŋolo waa kɔŋ keŋ ɔ yɛɛ ŋgba Tabɔ bula nɛ bulase man,

ŋgba Kamɛle bula nɛ ɛpo nɔɔman.

19Ɛmɛɛ baŋ ɛ kyaa Igyipite,

ɛ gelee ya abɔɔ na ɛ ke gyu yoo gbeŋiri man,

nawolo nyi Memefise donɔɔ gyae ke doo yakaa,

na ka ke wɔlɛɛ keŋ walaŋ be kyaa ke man ya.

20Igyipite yɛɛ ŋgba nunkyue bu ŋon ɔ dana kyeo,

mɔna keraa ta lee ado yenaŋ ɔ ne kɔŋ,

ɔ kaa kyaa ɔ dɔɔ.

21Yoonɔɔtena baŋ ɔ be bɔ wɔ paa nɛ,

yɛɛ ŋgba nunkyue bia baŋ bɔɔ doo nuŋ nɛ.

Baŋ mɔ baa bese be wɔle yekii,

bɔɔ gyae baa tale seŋ yoo keŋ man ya,

nawolo nyi nombiikum keyala wee ne kɔŋ be dɔɔ,

ba deŋele kewɔŋ wee te lii.

22Igyipite waa wii ŋgba dom ŋon ɔ ne yeu,

debaŋ keŋ ɔ kɔlare be kuu gyakaa ɔ dɔɔ nɛ,

baa mo abeŋase kɔŋ ɔ dɔɔ,

ŋgba baala baŋ bee tuŋii daase nɛ.

23Degbeŋgyoo ta toro yako nyiaa,

<<Nyi laa keŋ man yɛɛ gbirim koraŋ nɛ,

baa tuŋii ke daase pou lɔ,

Nawolo nyi be yaanɔɔle kela akpataana,

keŋ ŋolo be tale kala wɔ ya.

24Baa do Igyipite alebu desɛŋ,

na baa mo e do ado yenaŋ balaŋ nyiŋmaa man.>>

25Degbeŋgyoo Doŋ Pou Nyee, Iserae Wurubuarɛ kpa, <<Kɛɛ, mɛɛ gyae maa wɔŋ Tebetena bane Amon, na Faaro na Igyipite na ɔ wurubuarɛse, na ɔ gyooneŋ, na baŋ bɛɛ mo ba wose lɔ Faaro dɔɔ nɛ deŋele. 26Maa mo wɔ do Babilɔn gyoo Nebukadenɛsa, na ɔ kegyiise baŋ bɛɛ gyae wɔ baa ko nɛ nyiŋmaa man. Mɔna kenaŋ wɔle na, balaŋ baa kaa kyaa Igyipite ŋgba ka beneŋ keŋ nɛ,>> Degbeŋgyoo torola yako.

27<<Ma somere Yakɔbe, naa yee ya,

Iserae, naa yele n wɔe kelɔ neŋ ya,

De yɛɛ senaa maa lɛɛ neŋ lee tɛɛle lemlem man,

maa lɛɛ n duuluŋmantena lee tɛɛle keŋ bɔɔ mo wɔ gyu yoogbeŋiri man nɛ.

Yakɔbe waa bese nyiŋ wosefɛɛreŋ na kegyee,

te ŋolo be gyae waa ŋmaase e ya.

28Degbeŋgyoo ta toro yako nyiaa, ma somere Yakɔbe naa yee ya,

nawolo nyi me kpuɛna neŋ.>>

Nyi me wɔlɛɛ tɛɛlese ŋan,

man mɔɔ yaasee ŋon gyu kerekere nɛ,

mɔɔ gyae maa wɔlɛɛ neŋ kerekere ya.

Maa tenee neŋ, mɔna ŋgba mena keŋ kaboena neŋ bo,

Mɔɔ gyae maa yela n ke ta, nyi mɔɔ wɔŋ n deŋele korakora ya.