Yeremiya 9

1Ao, nyi ma nyee deŋ yɛɛ loŋ detiribuŋ ke,

te me sia deŋ yɛɛ siasaraŋ nyee ke nɛ,

nafɔ maa wii nelim na ka weese,

lee me balaŋ baŋ bɔɔ koo nɛ dɔɔ.

2Ao, nyi meŋ dana gbɛɛtɛɛra dasoe

depampaa man nɛ,

nafɔ meŋ korowɔ lee me balaŋ man

na maa tu lee be gyaŋ,

nawolo nyi be popou yɛɛ yale wɔlɛɛrawɔ,

na akɛrɛɛtena dikpii.

3<<Ba te desina be laakem see

ŋgba baŋdaŋ nɛ baa mo tɔ akɛrɛɛ,

na anokoare

te bɛɛ mo di tɛɛle keŋ dɔɔ ya.

Bɛɛ lee dukum daale man gyu daale man,

te bɔɔ gyeŋ maŋ ya.>>

Degbeŋgyoo torola yako.

4Kɛɛ n wose nideli lee n gyoona wose man,

naa lɛɛ ɔkamasɛ di n dekpaŋalaŋ man ya.

Nawolo nyi be man ɔkamasɛ na beo balaŋ,

te gyoo kamasɛ yɛɛ walaŋ wɔlɛɛre e.

5Gyoo na beo ɔ gyoo,

te ŋolo bɛɛ kolosi anokoare ya.

Be ta wola be laakemse akɛrɛɛ kedi,

te bɛɛ do ba wose kaale dukum keyɛɛ man.

6N 1 kyaa akɛrɛɛtena man,

be balaŋ kabeo dɔɔ, ba te bɛɛ nyi bɔɔ gyeŋ maŋ ya,>>

Degbeŋgyoo torola yako.

7Mena dɔɔ nnɛ yaa Degbeŋgyoo Dekpataakpere ne yako,

<<Kɛɛ, maa yalakee wɔ na maa kɛɛse wɔ kɛɛ,

nawolo nyi woŋ te maa tekaa yɛɛ,

lee me balaŋ dukum dɔɔ?

8Be laakem yɛɛ baŋdaŋ nyeele keŋ na koo,

kɛɛ beo walaŋ.

Bɛɛ mo be nɔɔse kolosi fa dɔŋa gyoŋ man,

mɔna be konɔɔse man na bɛɛ nyɔɔ wɔ kɔtase.

9Degbeŋgyoo kpa,

Me naa wɔŋ ba deŋele lee kei dɔɔ yee?

Me naa tɔ

mena tɛɛle kei dinɔɔ kom yee?>>

10Maa wii na maa lɔɔ nɔɔ fa bulase,

na maa toroŋ lee wonembia dedii kefula keŋ dɔɔ.

Tɛɛle keŋ doo yakaa keŋ ŋolo bɛɛ tɛɛ ke dɔɔ ya,

te bɔɔ ne nyii nunkyuese kewii ya.

Gyebuse ta lee botɔɔ,

te wonembia mɔ te tu.

11Maa yela Yerusalɛm ka bese donɔɔ keŋ kɔɔ yɛlɛɛ,

ke gyae ka bese gbougbouse dekyae,

na maa yela Yuda donɔɔse ke doo yakaa,

keŋ walaŋ be kyaa botɔɔ ya.>>

12Amɔte yɛna siakaralate ŋon waa nyii kei man? Amɔte te Degbeŋgyoo wola nombia nyi waa lese ke man? Weera tɛɛle keŋ wɔlɛɛwɔ bese depampaa keŋ ŋolo bɛɛ mo ke dɔɔ bela ya?

13Degbeŋgyoo kpa, <<Nawolo nyi ba te bɛɛ maŋ mmaraa keŋ mɔɔ fa wɔ, be te nyii me dei ya te be te di maŋ mmaraa dɔɔ ya. 14Mɔna be yɛɛ konɔɔyuŋ te ba som Baale, ŋgba mena keŋ be naanaɔ ba wola wɔ nɛ.>> 15Mena dɔɔ nnɛ yaa Degbeŋgyoo Doŋ Pou Nyee, Iseraetena Wurubuarɛ ŋon ne yako, <<Maa yela balaŋ kɛwɔ ke di weenɛɛ ŋan dana ŋaŋ, na baa nyɔɔ loŋ keŋ teekum doo ke man. 16Maa yaasee wɔ do tɛɛlese ŋan baŋ yaa be naanaɔ ba gyeŋ ya nɛ man. Na maa mo yoosila kuu gyakaa be dɔɔ kaboena maa munu wɔ.>>

17Nnɛ yaa Degbeŋgyoo, Doŋ Pou Nyee ŋon ne yako,

<<Ɛ gyoo ke man! Ɛ baake ala baŋ bee wii nɛ nyi baa kɔŋ.

ɛ kpila baake ala baŋ bɛɛ kɛlɛɛ alagyia nɛ.

18Ɛ yela baa kɔŋ bileŋ,

na baa wii fa daa,

kaboena siasaraŋ ke wulu de sia,

na de siabia ke kyara loŋ.

19Bee nyii kewii yeesa Siyɔn,

<Ba te wɔlɛɛ daa,

Be ta do daa desɛŋ nideli!

Kaboena nyi dɛɛ koro lee de tɛɛle man,

nawolo nyi ba te yɛlɛɛ da akpaŋalaŋse.> >>

20Ɛmɛɛ ala, nɛnɛɛ ɛ nyii Degbeŋgyoo nombia,

ɛ see deŋela nyii ɔ nɔɔman nombia.

Ɛ wola ɛ bia alebia nɔɔ kelɔ,

ɛ wola dɔŋa katoroŋ.

21Yeŋ ta moo da nfanserese man gyoo,

ɔ ta gyoo de gyooro akpaŋalaŋ man,

ɔ ta lese de bia lee abɔnterese man,

te ɔ lese de tewulɛɛ lee de dɛɛgyaŋeese man.

22Yako nyi, nnɛ yaa Degbeŋgyoo ne yako

<<Woya baa dokii,

tɛɛle keŋ dɔɔ ŋgba wonembia pena nɛ,

ŋgba wamela doola ŋon ɔ ne tekerii ŋa wɔle nɛ,

te ŋolo be kyaa waa yilaa ŋa ya.> >>

23Nnɛ yaa Degbeŋgyoo ne yako,

<<Siakaralate naa gate ɔ wose lee ɔ nyansa dɔɔ

yaa doŋte ke gate ɔ wose lee ɔ doŋ dɔɔ,

yaa baŋ bɔɔ nyiŋ ba wose ke gate ba wose lee ba wosekenyiŋ dɔɔ ya,

24mɔna ŋon ɔ ne gate ɔ wose waa gate ɔ wose nyi,

be dana nombiaman kenyii nyi ba gyeŋ maŋ,

nyi maŋ yɛna Degbeŋgyoo ŋon me dana wɔe keŋ taŋ ɔto ya,

me nombia doona kegbɛɛ te ma tenɛɛ tɛɛle dɔɔ,

nawolo nyi ŋan na gyoona me sia.

Degbeŋgyoo torola yako.

25Degbeŋgyoo kpa, <<Weeya ŋaale ne kɔŋ keŋ maa wɔŋ baŋ pou bɔɔ kara be baalawose wosenaane kaageŋ man nɛ deŋele. 26Lee Igyipite na Yuda na Ɛdom na Amon na Moabe na baŋ pou be kyaa depampaa man te bɔɔ gbee ba nyeeya nɛ. Nawolo nyi tɛɛlese kɛŋa pou te kara be baalawose ya, te Iserae dekpaŋalaŋmantena koraŋ te kara be konɔɔ man baalawose ya. >>