Yeremiya 8

1Degbeŋgyoo kpa, < <<Debaŋ kenaŋ nɛ, baa purikii Yuda gyooneŋ na ɔ kyaarabia ŋɔɔ na saese na gbalara ŋɔɔ na Yerusalɛmtena pou ŋɔɔ lee ba yebɔɔse man. 2Baa leŋ wɔ weese na gyaalaŋ na adido kyolobiise pou man. Baŋ te be gyaewɔ te ba som wɔ te be sila wɔ te be kɛo wɔ te be buŋawɔ som wɔ. Bɔɔ gyae baa yilaa wɔ yaa baa wuu wɔ ya, mɔna baa doo tɛɛle man bo ŋgba wonembia pena nɛ. 3Yenaŋ kamasɛ keŋ maa gegi wɔ gyu nɛ, tɛɛlekum kei dɔɔ balaŋ akaŋ baŋ pou baa gyae yeŋ kela nyeedoŋ. Degbeŋgyoo Dekpataakpere torola yako.

Dukum na deŋele kewɔŋ

4Yako wɔ nyiaa, <Degbeŋgyoo kpa,

< <<Nyi balaŋ de yale na, bɔɔ na koro yee?

Nyi ŋolo da yo gbɛɛ na, ɔ bɛɛ bese kɔŋ yee?

5Nɛnɛɛ woŋ dɔɔ te balaŋ kɛwɔ na yo gbɛɛ?

Weera te Yerusalɛm na yo gbɛɛ debaŋ kamasɛ?

Be silana dekara,

ba te bɛɛ nyi bɔɔ bese kɔŋ ya.

6Ma see deŋele tei nideli,

mɔna bɔɔ ne yako keŋ doona kegbɛɛ ya.

Be man ŋolo te kyɛɛkee lee wa akpanyanyaŋ man,

yako nyi, <<Woŋ yaa me yɛɛwɔ nɛ? ya>>

Walaŋ kamasɛ ta mo ɔ gbɛɛ,

ŋgba dɛɛkyɔŋ ŋon ɔ ne firikii ɔ ne gyu yooman nɛ.

7Akyakyaboŋa ŋon ɔ dɔŋ feliŋ man koraŋ,

gyeŋ ɔ debaŋ,

te duwuluŋ na ɔdeo na patepere,

na gyene ba debaŋ keŋ bɛɛ mo tu.

Mɔna me balaŋ ba gyeŋ,

keŋ Degbeŋgyoo ne gyae ya.

8Sena yaa ɛ ke yako nyi, <<De sia te kare,

nawolo nyi de dana Degbeŋgyoo mmaraa keŋ,

mɔ gbagba na ɛ ta mo dekara pɛn,

kyɛɛkee ke.

9Desɛŋ gyae ke kyaŋ siakaralatena,

gyakoloŋ gyae ka gyoo wɔ na baa kyaŋ wɔ.

Ba te bɛɛ Degbeŋgyoo nombii keŋ,

na nyansa woŋti yaa be dana?

10Mena dɔɔ maa mo be wɛɛla fa baala wɔlɛɛ,

na maa mo be wɔɔse fa balaŋ wɔlɛɛ.

Lee ba kemaasa dɔɔ kelii be kegyia dɔɔ,

be popou na mo gbɛɛkum mo nyiŋ ba wose,

gbalara na saese pou,

be popou yɛɛ akɛrɛɛtenawɔ.

11Bɛɛ nyekee me balaŋ gyamɛɛ,

ŋgba ŋe bee hia wɔ ya nɛ.

Bɛɛ yako nyi, <Wosefɛɛreŋ, wosefɛɛreŋ,>

mɔna wosefɛɛreŋ be kyaa ya.

12Desɛŋ be dana wɔ lee abɔɔ anekɔlaŋ ŋan bɛɛ yɛɛ nɛ dɔɔ yee?

Koa, bɔɔ dana desɛŋ korakora ya,

bɔɔ gyeŋ siakayeŋ mɔ ya.

Mena dɔɔ baa dɔɔ kpuna baŋ bɔɔ dɔɔ yooman nɛ man.

Nyi me wɔŋ ba deŋele na, baa kɔna wɔ tɛɛle man.

Degbeŋgyoo yakola,

13< <<Me gyaewɔ nyi maa yilaa me balaŋ ŋgba mena keŋ wɔɔfarale ne yilaa ɔ weenɛɛ nɛ, mɔna be yɛɛ ŋgba gerepo woŋse ŋan ta see ya. ŋgba fiigi daase ŋan ta see ya nɛ, ŋe faareŋse gba ta boto. Mena dɔɔ ma te yele yenaasetena te kaa lɛo be tɛɛle lee be gyaŋ.>> >

14Weera te de kyaa kɛbo?

Ɛ yilaa ɛ wose.

Ɛ yela dee yeu gyu donɔɔse dinaana ŋan bɔɔ baŋ akyaŋ kilisi ŋa nɛ man,

na de kaa munu botɔɔ.

Nawolo nyi Degbeŋgyoo de Wurubuarɛ ta lese daa fa nyi dee munu,

te ɔ faa daa teekum loŋ nyi dɛɛ nyɔɔ,

nawolo nyi da te yɛɛ dukum tia e.

15De kɛɛ wosefɛɛreŋ gbɛɛ,

mɔna kolo kpaakpaa te kɔŋ ya,

de kɛɛ kawee kekyɔ gbɛɛ,

mɔna keŋeŋii gyoona daa.

16Bee nyii kɔlara dɛɛkyɔŋse

weesɛɛ foofoo lee Dane,

be dɛɛkyɔŋse baala kewii,

te yele tɛɛle keŋ pou ne seree.

Ba te kɔŋ be kaa wɔlɛɛ,

tɛɛle keŋ na kpene kamasɛ keŋ doo ke man,

donɔɔ dinaa keŋ na baŋ pou be kyaa ke man.

17<<Ɛ kɛɛ, maa mo doma kumɛɛ kaa do ɛ man,

dom keŋkeŋteŋse baŋ ɛ ŋmeeseŋ be tale wɔ ya,

na be kaa kyoŋii ŋon,>>

Degbeŋgyoo torola yako.

18Nyaŋ me kyɔlɛɛre me waraŋase kedi man,

nombia ne takaa maŋ me konɔɔ man.

19Nyii me balaŋ kewii,

lee tɛɛle lemlem daale man.

<<Degbeŋgyoo be kyaa Siyɔn yee?

Ɔ gyoo ŋon ba tekaa kyaa yee?>>

<<Weera te ba moo be bɛɛneŋ baŋ bɔɔ yae,

na be tɛɛlese wɔlɛɛ man bɛɛneŋ baŋ bɔɔ dana tɔnɔɔ ya do maŋ baŋ?>>

20<<Weenɛɛ kekɛrɛɛ debaŋ te lam,

dugbutu mɔ te lam,

mɔna n te lɛɛ da nyee ya.>>

21Me balaŋ kenyiŋ gyamɛɛ dɔɔ, mɔɔ te nyiŋ gyam,

mee di waraŋsa te ma wose te tekerii maŋ.

22Nuŋ tee be kyaa Gileade yee?

Kawee kyɔɔre be kyaa botɔɔ yee?

Woŋ dɔɔ te bɔɔ ne nyiŋ ŋolo

kekyɔ me balaŋ gyamɛɛ ya?