Yeremiya 7

Akɛrɛɛ ɔsom keŋ taŋ tɔnɔɔ ya

1Nombii keŋ Degbeŋgyoo be yako Yeremiya yɛna nyi, 2<<Gyu ka seŋ Degbeŋgyoo dekpaŋalaŋ keŋ denaanɔɔ man na n ke gyɔ nombii kei dekpeŋkpeŋ nyiaa,

< <<Ɛmɛɛ Yudatena baŋ pou ɛ na mo denaanɔɔ kei man gyoo nyi ɛ ka som Degbeŋgyoo nɛ ɛ nyii Degbeŋgyoo nombii kei. 3Nnɛ yaa Degbeŋgyoo Dekpataakpere, Iseraetena Wurubuarɛ ŋon ne yako, ɛ desina ɛ gbɛɛneŋ na ya ayɛɛsa na maa yela ɛ ke kyaa kɛbo kei. 4Ɛ naa mo ɛ wose lɔ akɛrɛɛ nombia ŋan ne yako nyi, <<Degbeŋgyoo ɔsom deni dinaa yaa, Degbeŋgyoo ɔsom deni dinaa, Degbeŋgyoo ɔsom deni dinaa yaa kei,> ya 5Akpaa ɛ kyɛɛkee ɛ gbɛɛneŋ na ya ayɛɛsa ampaŋ ampaŋ, te ɛ kyaana dɔŋa kegbɛɛ dɔɔ, 6akpaa ɛ ta ŋere ŋɔɔle yaa yoyolobia yaa lialo do ya, te ɛ ta ko ŋon ɔ nombia dei kɛbo kei ya, te ɛ te sila wurubuarɛse baale mo do ɛ wose kayeyɛɛ ya nɛ, 7kenaŋ na maa yela ɛ ke kyaa kɛbo, tɛɛle keŋ mɔɔ mo fa ɛ naanaɔ kekpaakekpaa nɛ man. 8Mɔna kɛɛ, ɛ na mo ɛ wose lɔ akɛrɛɛ nombia ŋan taŋ tɔnɔɔ ya nɛ dɔɔ.

9< <<Ɛ ke ŋmɛɛle na ɛ ka ko balaŋ na ɛ ke lɛo ɛ tebia wɛɛla, na ɛ ke dii akɛrɛɛ 1 na ɛ ka too oliifi fa Baale na ɛ ke sila bɛɛneŋ baŋ ɛ ta gyeŋ wɔ ya, 10na ɛ ka bese kaa seŋ me siaman dekpaŋalaŋ kei keŋ ma yele gyakaa ke dɔɔ nɛ man na ɛ ke yako nyi, <<De te nyiŋ da wose,>> de te nyiŋ da wose na de kaa yɛɛ abɔɔ anekɔlaŋ kɛŋa pou? 11Dekpaŋalaŋ kei keŋ ma yele gyakaa ke dɔɔ nɛ ta bese ŋmɛɛlatena dedoi fa ŋon? Mɔna maŋ ne kɛɛ ŋon bo! Degbeŋgyoo torola yako.

12< <<Nɛnɛɛ ɛ gyu Silo, yenaŋ keŋ mɔɔ taŋgbɛɛ mo ma yele gyakaa nɛ na ɛ ke kɛɛ mena keŋ mɔɔ yɛɛ ke lee me balaŋ Iseraetena akpanyanyaŋ nombia dɔɔ. 13Degbeŋgyoo kpa, debaŋ keŋ ɛ ne yɛɛ abɔɔ kɛŋa pou nɛ, me kolosiwɔ fa ŋon agbaatee agbaatee, mɔna ɛ te nyii maŋ ya, me baake ŋon mɔna ɛ te kpaa ya. 14Mena dɔɔ keŋ mɔɔ yɛɛ Silo nɛ, mena te maa yɛɛ dekpaŋalaŋ keŋ ma yele gyakaa ke dɔɔ, na ɔsom deni dinaa keŋ ɛ na mo ɛ wose lɔ ke dɔɔ, na botɔɔ keŋ mɔɔ mo fa ɛmɛɛna ɛ naanaɔ nɛ nɛnɛɛ. 15Maa gegi ŋon lee me siaman ŋgba mena keŋ mɔɔ yɛɛ ɛ tebia Ɛferayimtena baŋ bɔɔ lee Iserae nɛ.>

16<<Mena dɔɔ naa fane fa balaŋ kɛwɔ yaa n ka sola fa wɔ yaa n ke doo teree fa wɔ ya. Naa seŋ be nawɔɔ man ya, nawolo nyi mɔɔ gyae maa nyii neŋ ya. 17N bɛɛ naa ŋan bɛɛ yɛɛ Yuda donɔɔse na Yerusalɛm abɔnterese man yee? 18Bia ne yilaa daase na kyaɔ ta do boalaŋ, na ala te buu biliŋ mo yɛɛ kyakpɛlɛse fa adido alagyoo ŋon. Bee toosi soloŋ woli wurubuarɛse baale mo do maŋ baŋ beiŋ. 19Mɔna Degbeŋgyoo kpa, maŋ yaa bɛɛ do baŋ? Na bɛɛ naase ba wose diyem baa mo do baŋ gbagba wose desɛŋ bo yee?

20< <<Mena dɔɔ nnɛ yaa Degbeŋgyoo Doŋ Pou Nyee ne yako, maa lese me baŋ na me baŋkum wola kɛbo, balaŋ na wonembia na ŋale man daase na tɛɛle keŋ dɔɔ weenɛɛ pou. Ke gyae ke kpa keŋ kɔɔ yem ya.

21Nnɛ yaa Degbeŋgyoo Dekpataakpere, Iserae Wurubuarɛ ŋon ne yako, <<Ɛ gyu ɛ siaman, na ɛ ka mo ɛ katoo kedeesase kpuna ɛ kedeesase akaŋ ŋan na ɛmɛɛ gbagba ke tao ɛ naane. 22Nawolo nyi me ka mo ɛ naanaɔ lee Igyipite na me kekolosi fa wɔ, ma te fa wɔ mmaraase lee katoo kedeesase na kedeesase wose man kaageŋ ya, 23mɔna me faa wɔ mmaraa kei nyi, <Ɛ nyii me dei, na maa yɛɛ ɛ Wurubuarɛ, na ɛmɛɛ mɔ ke yɛɛ me balaŋ. Ɛ di mmaraase ŋan pou mɔɔ fa ŋon nɛ dɔɔ, na ke de fa ŋon. 24Mɔna ba te tei yaa baa nyii me dei ya, te be sila baŋ gbagba konɔɔyuŋ na abɔɔ kumɛɛ ŋan be konɔɔse ne gyae nɛ. Ba leewɔ wɔlewɔle keŋ be te gyu siaman ya. 25Lee debaŋ keŋ ɛ naanaɔ ba lee Igyipite kaalii gyɛŋ nɛ, mee kpila me tewulɛɛ gbalara ɛ gyaŋ wee na wee, agbaatee agbaatee. 26Mɔna ba te tei maŋ yaa baa nyii me dei ya. Be dana konɔɔyuŋ te be yɛɛ nombiakumɛɛ kela be naanaɔ.>

27<Akpaa n yako kɛŋa pou fa wɔ nɛ, bɔɔ gyae baa nyii neŋ ya. Akpaa n baake wɔ na, bɔɔ gyae baa kpa neŋ ya. 28Mena dɔɔ yako wɔ nyiaa, <Balaŋ kɛwɔ yɛna tɛɛle keŋ kɔɔ ne nyii Degbeŋgyoo ke Wurubuarɛ dei ya, te kɔɔ ne lɛɛ kedesina do ya. Anokoare te taŋ te ke ta yoo lee be nɔɔsebia man.

29< <<Ɛ tisi ɛ nyeeya na ɛ ka mo ŋa leki, ɛ gyu bulase ŋan doo yakaa nɛ nyeeya dɔɔ na ɛ kaa di waraŋsa, nawolo nyi Degbeŋgyoo te bɛɛ ɛmɛɛ kalola kegyakaare kei te ɔ lese ɔ sia lee be dɔɔ lee baŋ keŋ bɔɔ do e nɛ dɔɔ.

Kako detaŋgya

30Degbeŋgyoo kpa, < <<Yudatena te yɛɛ nombiakumɛɛ me siaman. Be ta mo be bɛɛneŋ anekɔlaŋ baŋ ka see dekpaŋalaŋ keŋ ma yele gyakaa ke dɔɔ nɛ man te be waalaa ke. 31Ba te baŋee Tofɛte kedeesaboya Bɛne Hinom detaŋgya keŋ man na baa too be bia alebia na bia tewulɛɛ. Kpene keŋ ma te fa wɔ mmaraa ya, te ka te kɔŋ ma nyeempɔ man ya. 32Mena dɔɔ Degbeŋgyoo kpa, ɛ kɛɛ nideli, weeya ŋaale ne kɔŋ keŋ bɔɔ gyae baa baake ke nyi Tofɛte yaa Bɛne Hinom detaŋgya bela ya, mɔna baa baake ke nyi kako detaŋgya. Nawolo nyi baa wuu woya Tofɛte menɛɛ, kelii debaŋ keŋ bɔɔ gyae baa nyiŋ dewue bela ya. 33Balaŋ kɛwɔ woya baa bese gyebuse na ŋale man wonembia weenɛɛ, keŋ nyi bɔɔ gyae baa nyiŋ ŋolo ke gegi wɔ ya. 34Maa yela kenyaŋee yeesa na siakagye nɔɔneŋ na alowɔle na alowɔle baale yeesa kekɔŋ ɔto Yuda donɔɔse na Yerusalɛm abɔnterese man. Nawolo nyi tɛɛle keŋ gyae ke doo yakaa.