Yeremiya 6

Ba te tɔ Yerusalɛm do

1Bɛneyameŋtena, ɛ yeu lɛɛ ɛ wose!

Ɛ yeu lee Yerusalɛm!

Ɛ wola kaberɛ keŋ Tekoa!

Ɛ gyina felage adido Bɛte Hakerɛm!

Nawolo nyi nombiikum ta lee adoyenaŋ ne kɔŋ,

ke yɛɛ kewɔlɛɛ keŋ ke dana gyakoloŋ.

2Maa wɔlɛɛ Siyɔn alebu,

ŋon ɔ dana kyeo te ɔ ne booli ɔ sia nɛ.

3Namensekɛɛlera na be namense baa kaa wuu ɔ dɔɔ,

baa baŋ ba kefɛɛse kilisi e,

na be man kamasɛ ke dii ɔ dekyae man.>>

4<<Ɛ desina ɛ wose de kaa yoo e!

Ɛ koro, ɛ yela dee yoo e weeseteŋteŋ!

Dɛɛ laako, nawolo nyi tɛɛ ne yuu,

te nelim wɔŋtaase man ne wɔm.

5Mena dɔɔ ɛ koro, ɛ yela dee yoo wɔ nelim,

na dɛɛ wɔlɛɛ wa akyaŋse ŋan be kilisi e nɛ!>>

6Nnɛ yaa Degbeŋgyoo Dekpataakpere ne yako,

<<Ɛ kɛrɛɛ daase ŋan lɔ,

na ɛ ke tɔ Yerusalɛm do,

Kaboena nyi baa wɔŋ donɔɔ dinaa kei deŋele,

balaŋ kaŋeredo te wulu ke man.

7Mena keŋ detiribuŋ ne puu loŋ nɛ,

mena te ɔ puu wa akpanyanyaŋ lee debɔɔ.

Akarankaraŋ na kewɔlɛɛ doo ɔ man,

ɔ kawee na ɔ gyamɛɛ doo me siaman kekpaakekpaa.

8Yerusalɛm, kɛɛ nideli,

na mena ya maa bɛɛ neŋ,,

na n tɛɛle ke doo yakaa,

keŋ ŋolo be kyaa ke man ya.>>

9Nnɛ yaa Degbeŋgyoo Dekpataakpere ne yako,

<<Baa gyalase Iseraetena akaŋ baŋ

kerekere ŋgba be kɛɛ gyalase gerepo nɛ,

mo n nyiŋmaa tɔɔsee tombia ŋan dɔɔ bela,

ŋgba ŋon ɔ ne kɔ gerepose nɛ.>>

10Amɔte yaa maa tale kolosina na maa faaree e?

Amɔte ne gyaela waa tei maŋ?

Ba deŋela te tɔɔ1,

na bɔɔ tale nyii ya,

Degbeŋgyoo nombii keŋ na do wɔ baŋ,

ke bɛɛ gyoo be sia ya.

11Mena dɔɔ Degbeŋgyoo baŋ keŋ doo me maŋ beiŋ,

keŋ mɔɔ tale tina ke yela ya,

Maa lese ke wola bia abɔnterese man,

na tewulɛɛ baŋ bɔɔ yilaa debodokoloŋ nɛ,

baala na be wɛɛla baa kpu ke man,

kegyiise na baŋ bɔɔ ŋmɛɛ nideli nɛ baa kpu ke man.

12Nyi akpaa ma tenee me nyiŋmaa,

tee balaŋ baŋ be kyaa tɛɛle keŋ dɔɔ nɛ,

ba akpaŋalaŋ gyae ka bese baale wui,

mo kpuna be wɔɔse na be wɛɛla,>>

Degbeŋgyoo torola yako.

13Lee be man kemaasabii kelii be kegyiise dɔɔ nɛ,

be man kamasɛ sia ne yɛɛ abɔɔ baa mo nyiŋ ba wose,

gbalara na saese pou,

ne dii akɛrɛɛ.

14Bɛɛ nyekee me balaŋ gyamɛɛ,

ŋgba ŋe bee hia wɔ ya nɛ.

Bɛɛ yako nyiaa, <Wosefɛɛreŋ, wosefɛɛreŋ,>

mɔna wosefɛɛreŋ be kyaa ya.

15Desɛŋ be dana wɔ lee abɔɔ anekɔlaŋ ŋan bɛɛ yɛɛ nɛ dɔɔ yee?

Koa, bɔɔ dana desɛŋ korakora ya,

te bɔɔ gyeŋ desɛŋ mɔ ya.

Mena dɔɔ baa dɔɔ kpuna baŋ bɔɔ dɔɔ yooman nɛ.

Nyi me wɔŋ ba deŋele na, baa kɔna wɔ tɛɛle man.

Degbeŋgyoo yakola,>>

16Nnɛ yaa Degbeŋgyoo ne yako,

<<Ɛ seŋ gbaŋgbasese man na ɛ ke kɛɛ,

ɛ bɔɔse gyaŋgba detɛese ŋan,

ɛ bɔɔse botɔɔ keŋ gbɛɛ kpaakpaa keŋ doo na ɛ ke ta ke dɔɔ,

na ɛ ke kyaa wosefɛɛreŋ man.

Mɔna ɛ yakowɔ nyi, <Dɔɔ tɛɛ ke dɔɔ ya.>

17Ma lese gyeera fa ŋon te me yakowɔ nyi,

<Ɛ tei kaberɛ keŋ kewii!>

Mɔna ɛ yakowɔ nyi, <Dɔɔ gyae dee tei ya.>

18Mena dɔɔ ɛmɛɛ tɛɛlese, ɛ nyii,

ɛmɛɛ adansɛɛtena,

ɛ gyene keŋ gyae ke kɔŋ be dɔɔ.

19Nyaŋ tɛɛle nyii,

maa mo nombiikum kaalɔ balaŋ kɛwɔ dɔɔ,

lee ba Nyeempɔkum dɔɔ,

nawolo nyi be te nyii me nombia ya,

te be bɛɛ maŋ mmaraa.

20Woŋ te oliifi keŋ ba lee Seba,

yaa kɔŋtaase ŋan ba lee tɛɛle lemlem gyae ke yɛɛ maŋ?

Ma te bɛɛ n katoo kedeesase,

n kedeesase bɛɛ gyoo me sia ya.>>

21Mena dɔɔ nnɛ yaa Degbeŋgyoo ne yako,

<Maa mo abɔɔ ŋan ne tɔ gbɛɛ see balaŋ kɛwɔ siaman.

Lolala na bia baa gyoona ŋa gyɔ be nawɔɔ,

dɔɔna na gyoona baa munu.>

22Nnɛ yaa Degbeŋgyoo ne yako,

<<Kɛɛ, yoonɔɔtena ne kɔŋ,

lee adoyenaŋ tɛɛle man,

Tɛɛle doŋte daale te wosi ka wose,

lee tɛɛle ɔto,

23Be dana baŋdaŋse na apiase,

be dana nyeeman doŋ keŋ bɔɔ ne wii walaŋ waraŋase ya.

Be yeesa yɛɛ ŋgba ɛpo kemuusu nɛ,

be kyaa dɛɛkyɔŋse dɔɔ na,

bɛɛ kɔŋ ŋgba baala baŋ bɔɔ bake gbegya nɛ,

be kaa yoo nyaŋ Siyɔn alebu.>

24De te nyii ba wose man nombia,

te de baameŋ yɔkɔse daa,

da wose ta yeŋ daa,

dee nyii weeleŋ ŋgba alo ŋon ɔ na doŋee nɛ.

25Naa gyu n wɔɔse,

yaa n keta gbɛɛneŋ man ya,

nawolo nyi kɔlare ŋon dana yoosila,

te keŋeŋii te kilisi neŋ.

26Me balaŋ, ɛ wuu titere,

na ɛ ke biliŋi tɔŋ man,

ɛ mo kewii keŋkeŋ di waraŋsa,

ŋgba ŋon ɔ ne wii ɔ bu tobaale dokoloŋ kooŋ nɛ,

nawolo nyi karatetee dokoloŋ te,

wɔlɛɛre ŋon waa kɔŋ de dɔɔ.

27<<Me ta mo neŋ yɛɛ nyeela kɛɛsere,

te me balaŋ yɛna boe kpaakpaa,

na n ka gyene wɔ,

na n ke kɛɛse be gbɛɛneŋ kɛɛ.

28Be popou dana deŋele doŋ beiŋ,

be dɔŋ bɛɛ wɔlɛɛ balaŋ.

Be yɛɛ ŋgba kɔbere na nyeele bibiini nɛ,

be popou ne wɔlɛɛ balaŋ.

29Bee feefu boalaŋ keŋ keŋkeŋ,

na boalaŋ kekpa nyeete keŋ,

mɔna bɛɛ yalakee ke bo yakaa,

nawolo nyi akpanyanyaŋtena baŋ bɛɛ lee ya.

30Bɛɛ baake wɔ nyi kɔba wolom keŋ bɔɔ bɛɛ ke,

nawolo nyi Degbeŋgyoo te bɛɛ wɔ.>