Yeremiya 5

Ŋolo gbɛɛneŋ ba tenɛɛ ya

1Ɛ gyeŋ tisi Yerusalɛm abɔnterese man,

ɛ kɛɛ gyaŋee na ɛ ka gyoo ŋe man,

ɛ kɛo be dɛɛgyaŋeese man.

Nyi ɛ naa walaŋ dokoloŋ kooŋ,

ŋon ɔ ne yɛɛ abɔɔ ke gbɛɛ dɔɔ, te ɔ ne di anokoare nɛ,

kenaŋ na maa mo kyɛɛ donɔɔ dinaa kei.

2Doo nyi bɛɛ yako nyi, <Degbeŋgyoo nyiŋaa ɔ kyaa na,

mɔna bɛɛ kaŋ akɛrɛɛ ntam bo.>>

3Ao Degbeŋgyoo, na anokoare na gyoona n sia yee?

N ŋmera wɔ, mɔna be te nyii weeleŋ ya,

n yɛlɛɛ wɔ, mɔna be bɛɛ kedesina bo.

Ba te yɛɛ be sia te yɛɛ doŋ kela boe,

te be bɛɛwɔ ba te kyɛɛkee ya.

4Keŋte me yakowɔ nyiaa, <<Balaŋ kɛwɔ yɛɛ ayematenawɔ,

be yɛɛ ayiŋtenawɔ,

nawolo nyi bɔɔ gyeŋ Degbeŋgyoo gbɛɛneŋ,

na be Wurubuarɛ mmaraase ya.

5Mena dɔɔ maa gyu be siamantena gyaŋ,

ke kolosi fa wɔ,

nawolo nyi baŋ gyeŋ Degbeŋgyoo gbɛɛ,

na be Wurubuarɛ mmaraase.>>

Mɔna baŋ mɔ ta lee Degbeŋgyoo wɔle,

te be bɛɛwɔ bɔɔ nyii ɔ dei ya.

6Mena dɔɔ dinaate waa lee laaman kaa koe wɔ,

gbougbou waa lee depampaa man kaa wɔlɛɛ wɔ,

laamante waa deke wɔ be donɔɔse nɔɔman,

na waa kyekpetee ŋon waa lee debɔɔ,

nawolo nyi be nombiakumɛɛ boe,

te ba lee Wurubuarɛ wɔle agbaatee agbaatee.

7<<Woŋ dɔɔ te maa mo kyɛɛ ŋon?

Ɛ bia te bɛɛ maŋ,

te bɛɛ kaŋ wurubuarɛse baŋ ba te yɛɛ wurubuarɛse ya nɛ ntam.

Me faa wɔ ŋan pou ne hia wɔ,

mɔna ba leewɔ me wɔle,

te be kuuwɔ gyu kafoŋtena dɛɛse.

8Be yɛɛ ŋgba dɛɛkyɔŋ baala baŋ bɔɔ nyiŋ ba wose nɛ,

be man ɔkamasɛ silana ɔ dɔɔ wɛɛle,

9Degbeŋgyoo kpa,

<Tekaboena nyi maa wɔŋ ba deŋele lee kei dɔɔ yee?>>

Tekaboena nyi maa tɔ tɛɛle kei

kom fa ma wose yee?

10<<Ɛ gyu ka mo be gerepo wɔɔse man na ɛ ke wɔlɛɛ ŋa,

mɔna ɛ naa wɔlɛɛ ŋa kerekere ya,

ɛ kɛrɛɛ ŋe tombia ŋan,

nawolo nyi balaŋ kɛwɔ te yɛɛ Degbeŋgyoo wui ya.

11Iseraetena na Yudatena

te di anokoare fa maŋ korakora ya.>>

Degbeŋgyoo torola yako.

12Be te di dekara lee Degbeŋgyoo wose man,

be kpa, <Ɔ be gyae waa yɛɛ kolo ya!

Nombiikum be gyae ke kɔŋ de dɔɔ ya,

yoosila yaa tanam be gyae ke yala daa ya.

13Gbalara baŋ nɔɔwoya yɛɛ feliŋ ke,

nombii keŋ be doo be man ya,

mena dɔɔ keŋ bɛɛ yako nɛ dɛɛ kɔŋ be dɔɔ.>

14Mena dɔɔ nnɛ yaa Degbeŋgyoo Wurubuarɛ Dekpataakpere ŋon ne yako,

<<Lee keŋ balaŋ kɛwɔ be kolosi nombia kɛŋa dɔɔ,

maa yela me nombia ka bese boalaŋ n nɔɔman,

na balaŋ kɛwɔ ke yɛɛ daase ŋan boalaŋ keŋ gyae ke kpa.

15Degbeŋgyoo kpa, <<Iseraetena,

mɛɛ mo tɛɛle daale lee lemlem mɛɛ kɔŋ na ɔ kaa yoo ŋon,

gyaŋgba tɛɛle keŋ be dana doŋ nideli,

balaŋ baŋ ɛ ba gyeŋ be dei ya,

te ɛ bee nyii be dei ya.

16Ba gbegyase yɛɛ ŋgba yebɔɔ keŋ be te wuu ke dɔɔ ya,

be popou yɛɛ yoonɔɔtena akpataakperesewɔ.

17Baa di n wɔɔman abɔɔ ŋan n be kɛrɛɛ nɛ na ɛ weenɛɛ,

baa koe n bia tewulɛɛ na alebia,

baa koe n namense na n nunkyuese,

baa wɔlɛɛ n gerepo woŋse na n fiigi daase.

Baa mo yoosila wɔlɛɛ,

donɔɔse dinaana ŋan bɔɔ baŋ akyaŋse kilisi ŋa, te n na mo n wose lɔ ŋe dɔɔ nɛ.

18Degbeŋgyoo kpa, <<Mɔna weeya ŋenaŋ man nɛ, mɔɔ gyae maa wɔlɛɛ ŋon kerekere ya. 19Akpaa balaŋ baŋ de bɔɔse nyi, <Weera te Degbeŋgyoo, de Wurubuarɛ yɛɛ daa mena abɔɔ kɛŋa pou? nɛ, ɛ yako wɔ nyi, <Keŋ ɛ be bɛɛ maŋ ka som ŋɔɔla wurubuarɛse ɛmɛɛ gbagba tɛɛle man dɔɔ, mena dɔɔ nɛnɛɛ ɛ ka som ŋɔɔla tɛɛle keŋ te yɛɛ ɛ wui ya nɛ man.>

20<<Ɛ yako kei fa Yakɔbe duuluŋmantena,

na ɛ ke gyɔ ka dekpeŋkpeŋ Yuda.

21Ɛ nyii nombii kei, ɛmɛɛ ayiŋtena baŋ ɛ ba gyeŋ daale ya,

ɛ dana sia mɔna ɛ bɛɛ naa ya,

ɛ dana deŋela mɔna ɛ bee nyii ya.

22Degbeŋgyoo kpa, tekaboena nyi yaa yee maŋ yee?

Tekaboena nyi yaa seree me siaman yee?

Me ta mo aŋasa do wulu fa ɛpo,

wulu kekpaakekpaa keŋ ka be tale gbaa ya.

Ɛpo kegyɔ gyae ka koro mɔna be tale gbaa ke ya,

ke gyae ke muusu mɔna be tale gbaa ke ya.

23Mɔna balaŋ kɛwɔ dana konɔɔyuŋ na deŋele doŋ,

ba te kpase mo be gbɛɛ.

24Bɔɔ ne yako dɔŋa nyi,

<Ɛ yela dee yee Degbeŋgyoo de Wurubuarɛ,

ŋon ɔ ne yele dekpao ɔga na dugbutu ɔga ne ŋɛɛ ŋa debaŋ man,

te ɔ ne yele dɛɛ kɛrɛɛ weenɛɛ debaŋ kamasɛ nɛ.> ya

25Ɛ nombiakumɛɛ keyɛɛ tɔɔna abɔɔ kɛŋa gbɛɛ,

te ɛ dukum bɛɛsena ŋon abɔɔ kpaakpaa.

26Akpanyanyaŋtena kyaa me balaŋ man,

bɛɛ deke ŋgba baala baŋ bɛɛ deke gyebuse nɛ,

ŋgba baŋ bɛɛ nyɔɔ kɔtase baa kyaŋ balaŋ nɛ.

27Mena keŋ gyebuse ne wulu deŋkeli man nɛ,

mena te akɛrɛɛ wulu ba akpaŋalaŋse man,

mena dɔɔ bee nyiŋ ba wose na doŋ,

28be ta keree doo nuŋ.

Be nombiakumɛɛ keyɛɛ taŋ ɔto ya,

bɔɔ ne kɛo nombiakedi kegbɛɛ dɔɔ ya,

bɔɔ ne dii lɛɛ yoyolobia ya,

bɔɔ ne di nombia ŋan doona ke gbɛɛ fa ayematena ya.

29Degbeŋgyoo kpa,

<<Me naa wɔŋ ba deŋele kei dɔɔ yee?>>

<Me naa tɔ mena tɛɛle kei kom,

fa ma wose yee?

30Wose kegbirisi na nɔɔ kedoo nombii,

te yala tɛɛle kei dɔɔ.

31gbalara baŋ ne gbala akɛrɛɛ nombia,

saese baŋ na mo baŋ gbagba doŋ di balaŋ dɔɔ,

te me balaŋ ne gyae ke mena.

Mɔna woŋ te ɛ ke yɛɛ kɛŋa ɔto?