Yeremiya 4

1Degbeŋgyoo kpa,

<Akpaa nyaŋ Iserae n ka bese kɔŋ na,

ɛ bese kɔŋ me gyaŋ,

Akpaa n lese bɛɛneŋ baŋ mɛɛ kɔle nɛ lee me siaman,

te n ta yo gbɛɛ bela ya,

2te n mo anokoare na keŋ doona ke gbɛɛ na katenee gbɛɛ,

kaŋ ntam nyi, <Degbeŋgyoo nyiŋaa ɔ kyaa na,>

kenaŋ na tɛɛlese baa hiraa ba wose ɔ man,

na baa gyɔ konɔɔ ɔ man.>>

3Nnɛ yaa Degbeŋgyoo ne yako Yudatena na Yerusalɛm,

<<Ɛ fara tɛɛle wɔle,

ɛ naa duu abɔɔ do sɔɔse man ya.

4Ɛmɛɛ Yudatena na baŋ be kyaa Yerusalɛm,

ɛ desina ɛ wose fa Degbeŋgyoo,

ɛ desina ɛ konɔɔse,

na mena ya na me baŋ gyae ka koro ɛ dɔɔ ŋgba boalaŋ kekpa nɛ,

ke gyae ke kpa keŋ ŋolo be tale ko ke ya

lee nombiakumɛɛ ŋan ɛ be yɛɛ nɛ dɔɔ.

Nombiikum lee adoyenaŋ

5Ɛ yako ke Yuda na ɛ ke gyɔ ka dekpeŋkpeŋ Yerusalɛm nyiaa,

<Ɛ wola kaberɛ kila tɛɛle keŋ>

Ɛ lɔ nɔɔ keŋkeŋ na ɛ ke yako nyiaa,

<Ɛ kaa yilaa,

ɛ yela dee yeu gyu donɔɔse dinaana ŋan bɔɔ baŋ akyaŋse kilisi ŋan nɛ man>

6Ɛ gyina felage tee Siyɔn!

Ɛ yeu lɛɛ ɛ nyee, ɛ naa dɔɔ wɔle ya!

Nawolo nyi me ta mo nombiikum lee adoyenaŋ mɛɛ kɔŋ,

ke yɛɛ kewɔlɛɛ kum ke.>>

7Dinaate ta lee ɔ dedoi man,

tɛɛlese wɔlɛɛre ŋon te bɛɛ lee.

Ɔ ta lee ɔ dekyae man,

nyi waa yela n tɛɛle ke doo yakaa.

Waa yela n donɔɔse ka bese donɔɔ benɛɛ,

keŋ ŋolo be kyaa ŋe man ya.

8Mena dɔɔ ɛ mo titire wuu,

ɛ toroŋ na ɛ ke lɔ nɔɔ,

nawolo nyi Degbeŋgyoo baŋkum keŋ,

ta leeta de dɔɔ ya.

9Degbeŋgyoo kpa,

<<Mena wee kenaŋ nɛ, gyoo na kyaarabia wɔe gyae kelɔ wɔ,

Wurubuarɛ saese wose gyae ke gbirisi wɔ,

na Wurubuarɛ gbalara nɔɔ kedoo wɔ.>>

10Keŋte me yakowɔ nyiaa, <<Ao Degbeŋgyoo Doŋ Pou Nyee! N ta beo balaŋ kɛwɔ na Yerusalɛm nyi, <Ɛ ke kyaa wosefɛɛreŋ man,> mɔna yoosila doo de lokotɛɛse man.>>

11Mena debaŋ kenaŋ baa yako balaŋ kɛwɔ na Yerusalɛm nyiaa, <<Feliŋ keŋ laŋɛɛ nɛ te gyɔɔ lee bulase ŋan doo yakaa na depampaa man ne kɔŋ me balaŋ gyaŋ. Ka te yɛɛ feliŋ keŋ gyae ke feefu yaa ka lese ayimɛɛ ya, 12feliŋ keŋ ke nɔɔ dana doŋ kela kei gyae ka lee maŋ Degbeŋgyoo gyaŋ. Nɛnɛɛ maŋ gbagba maa di be nombia tia wɔ.>>

13Kɛɛ, Ɔ ne kɔŋ ŋgba debuŋta nɛ,

wa anebiliŋiŋse ne kɔŋ ŋgba koloŋoloŋ nɛ,

ɔ dɛɛkyɔŋse dana ɔsaa kela otolokuse.

Dɛɛ laako! Ba te wɔlɛɛ daa!

14Yerusalɛm, lese nombiakumɛɛ pou lee n konɔɔ man, na n ke nyiŋ nyeekelɛɛ.

kelii woromɔ yaa n ke tina akpanyanyaŋ kagyueŋ yela?

15Woya ŋaale ne kolosi lee Dane,

kɛɛ gyɔ nombiikum dekpeŋkpeŋ lee Ɛferayim bulasebia dɔɔ.

16Ɛ yako kei fa tɛɛlese ŋan,

ɛ gyɔ dekpeŋkpeŋ fa Yerusalɛm nyi,

<Yoonɔɔtena ta lee tɛɛle lemlem bɛɛ kɔŋ be kaa tɔ wɔ do,

bɛɛ fae yoo yeesa bɛɛ kɔŋ Yuda donɔɔse dinaana gyaŋ.

17Be te kilisi e ŋgba baala kee gyee wɔɔ nɛ,

nawolo nyi ɔ ta koro seŋ tia maŋ.>> > Degbeŋgyoo torola yako.

18Nyaŋ gbagba n dinɔɔ na nya ayɛɛsa,

moona kɛŋa kɔŋ n dɔɔ.

Kei yɛna n deŋele kewɔŋ.

Ke dana ŋaŋ

Kɛɛ sɔɔ gyoo n konɔɔ man!>>

19Ao, me tɔɔ lobia ne kyoŋii maŋ, me tɔɔ lobia ne kyoŋii maŋ,

te mɛɛ keŋee weeleŋ man.

Ao mɛɛ keketee me konɔɔ man!

Me konɔɔ ne gyɔɔ kpikpikpi,

mɔɔ tale wuu me nɔɔ ya.

Nawolo nyi me te nyii kaberɛ keŋ kewii,

me te nyii yoo yeesa keŋ.

20Nombiikum silana nombiikum,

tɛɛle keŋ pou te wɔlɛɛ.

Ba te wɔlɛɛ me kanyaŋ denɛɛ karatetee dokoloŋ,

na ma kefɛɛ deboman.

21Kelii woromɔ yaa kaboena nyi maa naa yoo felage keŋ,

na maa nyii kaberɛse ŋan kewii?

22<<Me balaŋ yɛɛ ayiŋtenawɔ,

bɔɔ gyeŋ maŋ ya.

Be yɛɛ bia baŋ bɔɔ gyeŋ daale ya,

bɔɔ dana nombiaman kenyii ya.

Ba gyeŋ adao lee nombiakumɛɛ keyɛɛ man,

bɔɔ gyeŋ deeli keyɛɛ ya.>>

23Me kɛɛ tɛɛle keŋ,

na ka be doo daale man ya, te ke doo bo yakaa,

te me kɛɛ adido,

na ka keŋmaŋee be doo ya.

24Me kɛɛ bulase ŋan,

na ŋee seree,

bulasebia ŋan pou ne bɛɛle.

25Me kɛɛwɔ na, balaŋ be kyaa ya,

adido gyebu kamasɛ te furufu laŋ.

26Me kɛɛwɔ na, tɛɛle kpaakpaa keŋ ta bese depampaa,

ke donɔɔse pou te yɛlɛɛ,

Degbeŋgyoo siaman, lee ɔ baŋkum keŋ dɔɔ.

27Nnɛ yaa Degbeŋgyoo ne yako,

<<Tɛɛle keŋ pou gyae ke yɛlɛɛ,

mɔna mɔɔ gyae maa wɔlɛɛ ke kerekere ya.

28Mena dɔɔ tɛɛle pou gyae kedi waraŋsa,

na adido ke biri tuum,

nawolo nyi ma te kolosi, te mɔɔ gyae maa kyɛɛkee ma nyeempɔ ya,

ma te bake ma nyeeman, te mɔɔ gyae maa lee ke wɔle ya.>>

29Dɛɛkyɔŋ kyaara na baŋdaŋ tɔɔra yeesa dɔɔ,

balaŋ pou te yekii donɔɔ man.

Baale yekiiwɔ gyu laaneŋ tuum man,

baale gyeŋawɔ gyoo kpanaŋse man.

Donɔɔse ŋan pou doo yakaa,

ŋolo be kyaa ŋe man ya.

30Nyaŋ ŋon bɔɔ wɔlɛɛ neŋ, woŋ yaa n ne yɛɛ?

Weera n kaa kanyaŋ kpaakpaa,

te n moo kɔba yayam agbaraagbaraase mia n wose?

Weera te n moo kegyikegyi fee n sia?

N ne mia n wose bo yakaa.

Baŋ bɛɛ gyae neŋ ta lese neŋ fa,

bɛɛ gyae neŋ baa ko.

31Mee nyii yeesa ŋgba alo ŋon ɔ na doŋee nɛ,

kakeŋee ŋgba alo ŋon ɔ na lola ɔ bu gyaŋgbate nɛ,

Siyɔn alebu kewii ŋgba ɔ weesɛɛ bɛɛ yee e ya nɛ,

te ɔ fɛlɛɛ ɔ nyiŋmaase na ɔ ne yako nyi,

<<Ao, mɛɛ yem,

be ta mo maŋ do awudiina nyiŋmaa man.>