Yeremiya 3

1Nyi baale de bɛɛ ɔ wɛɛle,

te alo ŋon da lee ɔ gyaŋ keyala baale wɔle nɛ,

baale ŋon waa tale bese ka mo e bela?

Na ŋgba be ta mo ayimɛɛ wuu tɛɛle keŋ baa?

Mɔna ɛmɛɛna ɛ diidɔɔna burum te kyaa yɛɛ kafoŋ,

nɛnɛɛ yaa nyaŋ ka bese kɔŋ me gyaŋ?>>

Degbeŋgyoo torola yako.

2<<Gyina n sia na n ke kɛɛ bulase ŋan doo yakaa nɛ nyeeman.

Yenaŋ daale doo keŋ n te yɛɛ kafoŋ yee?

N kyaawɔ gbɛɛnaa nɔɔman n ne daa n diidɔɔna,

n kyaawɔ ŋgba wonembia kɛɛlere kyaala depampaa man nɛ,

N ta mo n kafoŋ na akpanyanyaŋ,

waalaa tɛɛle keŋ.

3Keŋ dɔɔ te ɔga bɛɛ kewulii,

te ɔga gyaŋgbate bɛɛ keŋɛɛ.

Mɔna n siagbɛɛ yɛɛ ŋgba futooli alo nɛ,

te n ba gyeŋ desɛŋ ya.

4Na debokeiman te n baake maŋ nyi,

<Me kya, me gyoo leenaŋ ma alebiiritɛɛ,

5nyaŋ ka gyeŋ baŋ debaŋ kamasɛ?

N baŋ gyae ke doo kekpaakekpaa?

Mena te n ne kolosi,

mɔna n ne yɛɛ nombiakumɛɛ ŋan pou n ke tale.>>

Iserae bee di anokoare ya

6Gyoo Yosiya kee di gyoori nɛ, Degbeŋgyoo yako maŋ nyiaa, <<N naa keŋ Iserae ŋon ɔ bee di anokoare ya nɛ be yɛɛ? Ɔ gyeŋawɔ gyu bula kamasɛ dɔɔ na daŋ kamasɛ keŋ ke dana wuluŋ nɛ tɛɛ keyɛɛ kafoŋ botɔɔ. 7Na ma gyeŋ nyi ɔ keyɛɛ kɛŋa pou wɔle na waa bese kɔŋ me gyaŋ, mɔna ɔ te kɔŋ ya. Te ɔ naabu Yuda ŋon ɔ bee di anokoare ya nɛ mɔ naa ke. 8Me faa Iserae ŋon ɔ bɛɛ lɛɛ di ya nɛ yale kebɛɛ tɔne, te me bɛɛ e lee ɔ ka lee me wɔle dɔɔ. Mɔna me naawɔ nyi ɔ naabu Yuda ŋon ɔ bee di anokoare ya nɛ te yee ya, te ŋon mɔ gyuuwɔ ka lee ɔ baale wɔle. 9Keŋ kewɔlɛɛ nombia be dana e desɛŋ ya dɔɔ nɛ, ɔ waalaa tɛɛle keŋ te ŋon na boe na daŋ yɛɛ kafoŋ nombia. 10Kɛŋa pou wɔle nɛ ɔ naabu Yuda ta mo ɔ konɔɔ pou bese kɔŋ me gyaŋ ya, mɔna ɔ beo maŋ bo.>> Degbeŋgyoo torola yako.

11Degbeŋgyoo yako maŋ nyiaa, <<Iserae ŋon ɔ bɛɛ lɛɛ di ya nɛ tenɛɛ kela Yuda ŋon ɔ bee di anokoare ya nɛ. 12Gyu kegyɔ dekpeŋkpeŋ kei fa ado yenaŋtena nyiaa,

< <<Iserae ŋon n bɛɛ lɛɛ di ya, bese kɔŋ.> Degbeŋgyoo torola yako,

Mɔɔ tekaa nyaŋe me sia do neŋ bela ya,

nawolo nyi mee di me nombia dɔɔ,>Degbeŋgyoo torola yako,

<Mɔɔ gyae maa gyeŋ baŋ kekpaakekpaa ya.>

13Nyaŋ lɛɛ n nombiakumɛɛ do,

nyi n ta seŋ tia Degbeŋgyoo n Wurubuarɛ,

n ta mo n kegyae fa deise wɔlɛɛ wurubuarɛse,

daŋ wuluŋ kamasɛ tɛɛ,

te n te nyii me dei ya.> >>

Degbeŋgyoo torola yako.

14Degbeŋgyoo ta toro yako nyiaa, <<Ɛmɛɛ baŋ ɛ bɛɛ lɛɛ di ya nɛ ɛ bese kɔŋ, nawolo nyi maŋ yɛna ɛ baale. Maa lese ɛ man walaŋ dokoloŋ lee donɔɔ dokoloŋ man, na maa lese balaŋ bala lee loŋtoro dokoloŋ man na maa mo ŋon kɔŋ Siyɔn. 15Na maa fa ŋon namensekɛɛlera baŋ mɛɛ gyae lee me konɔɔ man, baŋ baa mo nombia kagyeŋ na nombia man kenyii ta ɛ siaman. 16Degbeŋgyoo kpa, <<Weeya ŋenaŋ man nɛ, akpaa ɛ yaanɔɔle da boo nideli tɛɛle keŋ dɔɔ nɛ, <<Balaŋ be gyae baa tekaa yako nyi, <Degbeŋgyoo nɔɔkebakesee adakaa keŋ> ya. Be gyae kekɔŋ ba nyeempɔ man yaa baa tɔɔse ke ya, bɔɔ gyae baa kɛo ke yaa baa yɛɛ wɔle ya. 17Mena debaŋ kenaŋ baa baake Yerusalɛm nyi Degbeŋgyoo Gyoorogbeli, te tɛɛlese pou baa kaa yilaa Yerusalɛm na baa mo obuo fa Degbeŋgyoo yele. Bɔɔ tekaa yɛɛ nombiakumɛɛ ŋan be konɔɔyuŋ ne yele bɛɛ yɛɛ nɛ ya. 18Weeya ŋenaŋ man Yudatena baa kaa kpuna Iseraetena, na baa debodokoloŋ lee adoyenaŋ tɛɛle man kɔŋ tɛɛle keŋ mɔɔ fa ɛ naanaɔ ŋgba be dedii nɛ man.

19<< <Maŋ gbagba kpa, maa mo kenyaŋee kɛɛ n dɔɔ ŋgba me bia nɛ,

na maa fa neŋ tɛɛle kpaakpaa,

keŋ ke yɛɛ dedii kpaakpaate ke tɛɛlese man.>

Ma gyueŋwɔ nyi n ke baake maŋ nyi, <Me kya>

keŋ n ba bese lee me wɔle bela ya.

20Mɔna mena keŋ alo na lee ɔ baale wɔle nɛ,

mena te nyaŋ Iserae leewɔ me wɔle.>>

Degbeŋgyoo torola yakola.

21Be nyii yeesa lee bulase ŋan doo yakaa nɛ nyeeya dɔɔ,

Iseraetena kewii na be kasola,

nawolo nyi be te tulii be gbɛɛneŋ,

te be wolee Degbeŋgyoo be Wurubuarɛ.

22<<Ɛmɛɛ balaŋ baŋ ɛ bɛɛ lɛɛ di ya nɛ, ɛ bese kɔŋ,

maa kyɔ ŋon ɛ wɔle kalee kawee.>>

<Ayi, dɛɛ kɔŋ n gyaŋ,

nawolo nyi nyaŋ yɛna Degbeŋgyoo de Wurubuarɛ.

23Ampaŋ bɛɛneŋ kasom bulasebia dɔɔ,

na bulase dɔɔ yɛɛ kabeo ke,

ampaŋ Degbeŋgyoo de Wurubuarɛ man,

te Iserae nyeekelɛɛ doo.

24Leenaŋ de biatɛɛ te desɛŋ bɛɛneŋ wɔlɛɛ,

tomse ŋan de naanaɔ be yɛɛ nyiŋ nɛ,

be wɔlɛɛ be namense na be nunkyuese,

na be bia tewulɛɛ na be bia alebia.

25Ɛ yela dee doo da desɛŋ man,

na da desɛŋ kenaŋ kewuu de dɔɔ.

Daa na de naanaɔ,

te yɛɛ dukum tia Degbeŋgyoo de Wurubuarɛ,

leenaŋ de biatɛɛ kaalii gyɛŋ kei,

de te nyii Degbeŋgyoo de Wurubuarɛ dei ya.>