Yeremiya 2

Iserae te bɛɛ Wurubuarɛ

1Degbeŋgyoo yako maŋ nyiaa, 2<<Gyu kegyɔ me nombia dekpeŋkpeŋ do Yerusalɛmtena deŋele man nyiaa,

<<Degbeŋgyoo kpa,

<<Mɛɛ tɔɔse mena keŋ n ba do kakyeŋ nya alebiiritɛɛ,

Mena keŋ n be gyae maŋ nya alowɔlere man

te n be sila maŋ depampaa keŋ man,

mo ta tɛɛle keŋ be te duuta kolo ke dɔɔ ya nɛ dɔɔ.

3Iserae yɛɛ fereŋkyeŋ fa Degbeŋgyoo,

ɔ weenɛɛ gyaŋgba nyiŋan,

ɔ naase baŋ pou bee yoo tia e nɛ diyem

te nombia be yala wɔ nɛ.>

Degbeŋgyoo torola yako.

4Yakɔbe duuluŋmantena, na ɛmɛɛ Iserae akpaŋalaŋse pou,

Ɛ nyii Degbeŋgyoo nombia,

5Nnɛ yaa Degbeŋgyoo ne yako,

<<Dukum woŋti yaa ɛ naanaɔ naawɔ me man,

te be tira ba wose lee me gyaŋ gyu lemlem mena?

Bee sila bɛɛneŋ behuhoona

te baŋ gbagba bese behuhoona.

6Ba te bɔɔse nyiaa, <Nde Degbeŋgyoo,

ŋon ɔ ba mo daa lee Igyipite

te ɔ ba mo daa ta depampaa man

mo tana depampaa tɛɛlese na detaŋgyase,

na dugbutu tɛɛle dɔɔ, na detiŋtɛɛ man

na tɛɛle keŋ ŋolo bɛɛ mo ke dɔɔ ya te ŋolo be kyaa ke dɔɔ ya nɛ de?>

7Ma moo ŋon kɔŋ tɛɛle keŋ kee de weenɛɛ nɛ dɔɔ,

nyi yaa di ke bia na ka abɔɔ kpaakpaa.

Mɔna ɛ kɔŋawɔ te ɛ kaa waalaa me tɛɛle

te ɛ yelaa ma dedii yɛɛ duwaare.

8Saese baŋ te bɔɔse nyi,

<Nde Degbeŋgyoo?> ya.

Baŋ bɛɛ yɛɛ mmaraa keŋ tom nɛ ta gyeŋ maŋ ya,

te siamantena korowɔ seŋ tia maŋ.

Gbalara baŋ ne gbale bo Baale yele man

te be silana bɛɛneŋ behuhoona.

9<<Mena dɔɔ daana ŋon dana nombia bela,>>

Degbeŋgyoo torola yako.

Te daana n duuluŋman balaŋ mɔ dana nombia.

10Toŋ gyu Kiporɔse tɛɛle keŋ loŋ be kilisi ke nɛ kekɛɛ,

kpila gyu Kedare1 na ɛ ke kɛɛ abɔɔ nideli.

Ɛ kɛɛ nyi kolo daale kyaawɔ nnɛ see.

11Tɛɛle daale kyɛɛkee ke wurubuarɛse?

(Mɔna ba te yɛɛ wurubuarɛse gbagba ya).

Mɔna me balaŋ te kyɛɛkee be gyooro Wurubuarɛ ŋon

na bɛɛneŋ behuhoona.

12Nyaŋ adido, kei dee doo neŋ n nɔɔ,

na n wose ke gbirisi neŋ na n ke seree nideli.>>

Degbeŋgyoo torola yako.

13<<Me balaŋ te yɛɛ nombiakumɛɛ ala.

Ba te bɛɛ maŋ,

nyeedoŋ loŋ nyee keŋ

te be wula baŋ gbagba atiribuŋse.

atiribuŋse ŋan be likii te loŋ bɛɛ tale seŋ ŋe maŋ ya nɛ.

14Ba lola Iserae na ɔ yɛɛ somre e yaa gbeŋi e?

Nɛnɛɛ weera dɔɔ te ɔ bese yooman abɔɔ?

15Dinaate ne muusu,

be wiiwɔ keŋkeŋ woli e.

Ba te wɔlɛɛ ɔ tɛɛle,

te ba too ɔ donɔɔse keŋ ŋolo be kyaa ŋe man ya.

16Memefisetena na Tahepanehɛsetena

mɔ te yɛlɛɛ n nyeepookoo.

17Na nyaŋ gyaena kei fa n wose

lee keŋ n be bɛɛ Degbeŋgyoo n Wurubuarɛ

debaŋ keŋ ɔ dɔŋ n siaman nɛ yee?

18Nɛnɛɛ woŋ dɔɔ te n ke gyu Igyipite na n kaa nyɔɔ loŋ boo Naele man? 2

Te woŋ dɔɔ te n ke gyu Asiriya

ke nyɔɔ loŋ boo Eferatese man?

19Nyi akpaa n bɛɛ maŋ Degbeŋgyoo n Wurubuarɛ,

te n te yee maŋ ya na,

n nombiakumɛɛ gyae ke wɔŋ n deŋele.

N keyala gyae ke kalana neŋ.

Gyoo ke man na n ke kɛɛ

mena keŋ gyae ka bese dukum na ŋaŋ fa neŋ.>>

Degbeŋgyoo, Degbeŋgyoo Dekpataakpere ŋon torola yako.

20<N wulaa lese n kasolɔ beneŋ beneŋ keŋ,

te n wɔlɛɛ n kebakeseese,

te n yakowɔ nyi, <Mɔɔ som neŋ ya,>

Ayi, n te tisi doo ŋgba futooli alo nɛ

bulabii kamasɛ dɔɔ

na daŋ kamasɛ wuluŋ tɛɛ.

21Maŋ duuna neŋ ŋgba gerepo woŋ kpaakpaate,

keŋ ba lee ŋmeleŋ keŋ ke dei nɛ man.

Kɔŋaa sena te n korowɔ seŋ tia maŋ

ŋgba woŋkum keŋ ke taŋ tɔnɔɔ ya nɛ?

22Doo nyi n moo kwayaa sɔ,

te n bɔɔ pawuda ofoŋte koraŋ nɛ,

n nombiakumɛɛ ayimɛɛ doo me siaman,>>

Degbeŋgyoo Doŋ Pou Nyee torola yako.

23<<Sena yaa nyaŋ ke yako nyi, <Me ta mo ayimɛɛ wuu ma wose ya,

me te sila Baalese> ya?

Kɛɛ mena keŋ n be yɛɛ detaŋgya keŋ man,

gyoo keŋ n be yɛɛ nɛ man kɛɛ.

N yɛɛ ŋgba kurumɔɔ alo,

ŋon ɔ ne yekii gyu kɔŋ nɛ.

24ŋgba afurum ŋon depampaa man be male e,

te ɔ ne wɔŋ feliŋ nyii kɛɛ nɛ,

ɔ ne gyae baale na, amɔte ne gyaela waa tale tɔ e gbɛɛ?

Baale kamasɛ ŋon ɔ ne gyae e, be gyae waa naase ɔ wose diyem ya,

ɔ ne gyae waa gyeŋ e na waa nyiŋ e.

25Naa yeu tirii nyaŋ nkyokotase, na n naawɔɔ ke doo yakaa,

na n lokotɛɛ mɔ ka wolo ya.

Mɔna n ne yako nyi, <Te yɛɛ kolo ya!

Mɛɛ gyae deise wɔlɛɛ bɛɛneŋ,

te kaboena nyi maa sila wɔ.>

26Mena keŋ be kyaŋ ŋmɛɛlate te desɛŋ ne kyaŋ e nɛ,

mena te desɛŋ kyaŋa Iseraetena

baŋ na be gyooneŋ na be kyaarabia,

na be saese na be gbalara.

27Bɛɛ yako daŋ nyi, <Nyaŋ yɛna me kya,>

te bɛɛ yako boe nyi, <Nyaŋ lolana maŋ.>

Be ta besena be wɔle tee maŋ

te na be sia ya,

mɔna nyi ba wose de kyaŋ wɔ na, be kpa,

<Kɔŋ kaa lɛɛ daa.>

28Bɛɛneŋ baŋ ɛ be yɛɛ fa ɛ wose nɛ kyaa aleŋ?

Nyi baa tale lɛɛ ŋon na, ɛ yela be kaa lɛɛ ŋon

ɛ wose kekyaŋ man!

Nawolo nyi, Yuda wurubuarɛse boe,

ŋgba mena keŋ n donɔɔse boe nɛ.

29Woŋ dɔɔ te ɛ ne kalena maŋ?

Ɛ popou ta koro seŋ tia maŋ.

Degbeŋgyoo torola yako.

30Me wɔŋa n balaŋ deŋele bo yakaa,

be te nyii ma kedesina ya.

N yoosila keretiina ɛ gbalara,

ŋgba dinaate ŋon tanam na ko e nɛ.

31Ɛmɛɛ kalola kegyakaare kei, ɛ gyoo Wurubuarɛ nombia ŋan man.

Me ta bese depampaa fa Iserae

yaa tɛɛle keŋ detiŋtɛɛ tuum ba gyoo ke nɛ?

Woŋ dɔɔ te me balaŋ ne yako nyi, <De te nyiŋ da wose dee kila,

dɔɔ tekaa kɔŋ n gyaŋ bela ya?

32Alebu waa wolee wa abɔɔ anemiaŋ,

alowɔle waa wolee ɔ yale kegba?

Mɔna me balaŋ te wolee maŋ,

weeya ŋan taŋ kekala ya.

33N gyeŋ gbɛɛ keŋ bɛɛ mo gyae diidɔɔ nideli.

Ala kumɛɛ koraŋ baa tale kasee lee n gbɛɛneŋ man.

34Ayematena baŋ dukum be doo be gbɛɛ dɔɔ ya nɛ

fatabo doo n kegbase man,

Doo nyi n te naa wɔ nyi bɛɛ yɛlɛɛ deni baa gyoo ya,

mɔna lee kɛŋa pou wɔle nɛ,

35n ne yako nyi, <Me nombia dei,

ɔ be dana maŋ baŋ ya.>

Mɔna maa di n nombia,

nawolo nyi n kpa, <Ma te yɛɛ dukum ya.>

36Woŋ dɔɔ te n dɔŋɛɛ,

n ne kyɛɛkee n gbɛɛneŋ mena?

Igyipite waa do neŋ desɛŋ,

ŋgba mena keŋ Asiriya ba do neŋ desɛŋ nɛ.

37Nyaŋ mɔ nyaŋ ka lee botɔɔ,

na n nyiŋmaase gyakaa n nyee dɔɔ,

nawolo nyi Degbeŋgyoo te bɛɛ baŋ n be lɛɛ wɔ di nɛ,

n be gyae n ke nyiŋ kekyɔ lee be gyaŋ ya.