Yeremiya 1

1Hilikiya ŋon ɔ ba lee Wurubuarɛ saese baŋ bɔɔ lee Anatote keŋ kyaa Bɛneyameŋ tɛɛle man nɛ bu Yeremiya nombia yaa. 2Degbeŋgyoo kolosiwɔna e debaŋ keŋ Yudatena gyoo Amon bu Yosiya ne di gyoori kulutooneŋ kufu atoorote keŋ man nɛ. 3Na debaŋ keŋ Yudatena gyoo Yosiya bu Yehoyakim ne di gyoori, mo kelii kulutooneŋ kufudaalete ŋon ɔ gyaalaŋna anoŋte keŋ man gyoo Yosiya bu Sedekiya ne di gyoori nɛ. Debaŋ kenaŋ na Yerusalɛmtena kyaa gbeŋiri man.

Ba kebaake Yeremiya

4Degbeŋgyoo yako maŋ nyiaa,

5<<Pɛ maa yɛɛ neŋ do n naa tɔɔman na ma gyeŋ neŋ, pɛ baa lola neŋ na me ta wulaa lese neŋ see. Me ta lese neŋ see gbalare fa tɛɛlese.>>

6Te me yakowɔ nyiaa, <Oo Degbeŋgyoo Doŋ Pou Nyee, mɔɔ gyeŋ kekolosi ya, te me yɛɛ bu e.>

7Mɔna Degbeŋgyoo yako maŋ nyiaa <<Na yako nyi <Me yɛɛ bu e ya.> Walaŋ kamasɛ ŋon gyaŋ maa kpila neŋ na gyu, te yako nombii kamasɛ keŋ maa yako neŋ. 8Na yee wɔ ya, nawolo nyi me kpuɛna neŋ te maa lɛɛ neŋ.>> Degbeŋgyoo torola yako.

9Botɔɔ te Degbeŋgyoo tenee ɔ nyiŋmaa tina me nɔɔ te ɔ yako maŋ nyiaa <<Me ta moo me nombia do n nɔɔman. 10Kɛɛ, gyɛŋ me ta see neŋ gbalare fa tɛɛlese na gyooridediise nyi nyaa kulu na n ke tekeri lɔ na n ke wɔlɛɛ na n ke yaasee na n ke baŋ na n ke duu.>>

11Te Degbeŋgyoo bɔɔse maŋ nyiaa, <<Yeremiya, woŋ yaa n ne naa?>>

te me tiranɔɔ nyiaa, << Mɛɛ naa oboroni akotaa daŋ tombii.>>

12Te Degbeŋgyoo yako maŋ nyiaa, <<N naa ke nideli. Maa kɛɛ nyi maa di me nombia dɔɔ.>>

13Degbeŋgyoo besewɔ bɔɔse maŋ nyiaa <<Woŋ yaa n ne naa?>>

Te me tiranɔɔ nyiaa, <<Mɛɛ naa kolo ne fiu saabu man, na ka te gɛɛse lee ado yenaŋ tee daa.>>

14Degbeŋgyoo yako maŋ nyiaa, <<Nombiikum gyae ka lee ado yenaŋ kaa yala baŋ pou be kyaa tɛɛle kei dɔɔ nɛ. 15Mɛɛ gyae maa yilaa balaŋ baŋ pou be kyaa ado yenaŋ gyooridediise nɛ.>> Degbeŋgyoo torola yako.

Be gyooneŋ baa kɔŋ na be kaa baŋee be gyooro gbelɛɛ

Yerusalɛm anaanɔɔse man.

Baa koro seŋ tia wa akyaŋse ŋan be kilisi e,

na Yuda donɔɔse ŋan pou.

16Me balaŋ nombiakumɛɛ dɔɔ maa bu wɔ fɔɔ,

nawolo nyi ba te bɛɛ maŋ,

bɛɛ too oliifi fa wurubuarɛse wɔlɛɛ,

te bɛɛ som abɔɔ ŋan bɔɔ mo be nyiŋmaase yɛɛ nɛ.

17<<Desina n wose! Koro na n ke yako wɔ kpene kamasɛ keŋ mɔɔ yako neŋ. Na yee wɔ ya, na mena ya na maa yela n ke yee wɔ. 18Kɛɛ, gyɛŋ ma te yele n te yɛɛ neŋ ŋgba donɔɔ keŋ bɔɔ baŋ dekyaŋ kilisi ke na nyeele piila na kɔbere dekyaŋ, na n ka seŋ tia Yudatena gyooneŋ na be kyaarabia na be saese na balaŋ baŋ be kyaa tɛɛle keŋ dɔɔ nɛ. 19Baa yoona neŋ mɔna bɔɔ gyae baa di n dɔɔ ya, nawolo nyi me kpuɛna neŋ te maa lɛɛ neŋ.>Degbeŋgyoo torola yako.