Yeremiya 10

Wurubuarɛ na bɛɛneŋ

1Iseraetena, ɛ nyii keŋ Degbeŋgyoo ne yako ŋon, 2Nnɛ yaa Degbeŋgyoo ne yako,

<<Ɛ naa kasee tɛɛlese abɔɔ aneyɛŋ ya,

Doo nyi adido gyakoloŋ nombia ne ŋmaase tɛɛlese nɛ,

ɛ naa yele ŋa ke ŋmaase ŋon ya.

3Nawolo nyi balaŋ baŋ ɔsomse yɛɛ yakaa,

bɛɛ kara daŋ lee laaman,

na nyiŋmaa man tom yɛɛre ta mo ɔ debeŋabii yae ke.

4Bɛɛ mo kɔba wolom na kɔba yayam gyilaa ke,

bɛɛ mo hama na nyeelabia gyɔ kyaŋ ke,

na ke ka seŋ keŋkeŋ.

5Be bɛɛneŋ yɛɛ ŋgba kpene keŋ bɛɛ mo ŋmaase gyebuse kukumba wɔɔman nɛ,

bɔɔ ne tale kolosi ya,

bɛɛ gate wɔ bo,

nawolo nyi bɔɔ ne tale ta ya.

Ɛ naa yee wɔ ya,

bɔɔ tale yɛɛ kolokum,

yaa kolo kpaakpaa ya.>>

6Degbeŋgyoo, ŋolo be kyaa ŋgba nyaŋ ya,

n boe,

te n doŋ te lɛɛ yele.

7Nyaŋ yɛna tɛɛlese pou gyoo,

amɔte be yeena neŋ ya?

Nawolo nyi ke kaboena neŋ.

Tɛɛlese siakaralatena pou man,

na be gyooridediise pou man nɛ,

ŋolo be kyaa ŋgba nyaŋ ya.

8Be popou yɛɛ ayiŋtenawɔ te bɔɔ gyeŋ daale ya,

bɛɛ kasee lee behuhoona daase bɛɛneŋ gyaŋ.

9Bɛɛ mo kɔba wolom ŋan bɔɔ tuku nɛ lee Taresisi,

na kɔba yayam lee Ufase.

nyiŋmaa tomyɛɛre na kɔba yayam luure yɛɛna ŋa,

na be ta mo kanyaŋ buluu na kanyaŋ amɔlaloŋ desina ŋa,

nyiŋmaa man tomyɛɛre yɛɛna ŋe popou.

10Mɔna Degbeŋgyoo yɛna anokoare Wurubuarɛ ŋon,

Ŋon yɛna Wurubuarɛ ŋon ɔ bɛɛ yem ya, na gyoo ŋon ɔ kyaa kekpaakekpaa.

Akpaa ɔ gyeŋ baŋ na tɛɛle ne seree,

tɛɛlese be tale seŋ ɔ baŋ man ya.

11Yako wɔ nyi, <<Wurubuarɛse baŋ ba te yɛɛ adido na tɛɛle ya nɛ, baa munu lee tɛɛle na adido ateta.> >>

12Mɔna Wurubuarɛ moona ɔ doŋ yɛɛ tɛɛle,

ŋon moona ɔ nyansa yɛɛ tɛɛle kei,

te ɔ moo ɔ nombiaman kenyii fɛlɛɛ adido man.

13Nyi ɔ fae na adido loŋse ne muusu,

ɔ ne yele debuŋta na koro lee tɛɛle ɔto.

Ɔ ne kpila ɔga keŋmaale kpuna ɔga,

na ɔ ta lese feliŋ lee wa abɔɔ dɛɛseese man.

14Walaŋ kamasɛ yɛɛ diyiŋte e te ɔ ba gyeŋ daale ya,

kɔba yayam luure kamasɛ bane na doona e desɛŋ,

Abɔɔ ŋan ɔ ne yɛɛ nɛ yɛɛ akɛrɛɛ,

weesɛɛ be doo ŋe man ya.

15Be yɛɛ behuhoonawɔ, te bɔɔ doo daale man ya,

wee keŋ baa di be nombia na baa munu.

16Yakɔbe wui dedii be doo ŋgba kɛŋa ya,

nawolo nyi ŋon yɛɛna abɔɔ pou,

mo kpuna Iserae, ɔ balaŋ baŋ be yɛɛ ɔ dedii ke nɛ,

ɔ yele yɛna Degbeŋgyoo Doŋ Pou Nyee.

Kewɔlɛɛ keŋ ne kɔŋ

17Ɛmɛɛ baŋ bɔɔ tɔ ŋon do,

ɛ yilaa ya abɔɔ na ɛ ka lee tɛɛle keŋ man.

18Nawolo nyi nnɛ yaa Degbeŋgyoo ne yako,

<<Nɛnɛɛ maa kparaa

baŋ be kyaa tɛɛle kei dɔɔ,

maa mo kayeyɛɛ kaa lɔ be dɔɔ

na baa nyiŋ di be dɔɔ.>>

19Ma ke gooli dɔɔ maa laako,

me gyam taŋ kekyɔ ya,

mɔna me yako ma wose nyiaa,

<<Me kawee yaa, kaboena nyi maa do kakyeŋ,>>

20Ba te wɔlɛɛ me kanyaŋ deni,

ka ŋmeeseŋ pou te tirii,

me bia ta lee me gyaŋ laŋ, bɔɔ kyaa bela ya,

ŋolo be kyaa keŋ waa baŋ me kanyaŋ deni,

yaa waa mo yɛɛ dayoe fa maŋ ya.

21Namensekɛɛlera baŋ ba gyeŋ daale ya,

te bɔɔ ne bɔɔse Degbeŋgyoo dɔɔ ya,

mena dɔɔ bɔɔ ne nyiŋ ba wose ya,

te be namense pou te yaasee.

22Ɛ tei! Nombia ŋaale ne kɔŋ,

yeesa ta lee ado yenaŋ tɛɛle man ne kɔŋ!

Ŋe gyae ke yela Yuda donɔɔse ke doo yakaa,

na dekyae fa gbougbouse.

Yeremiya kefane

23Degbeŋgyoo, ma gyeŋ nyi denibalaŋ nyeedoŋ te yɛɛ baŋ gbagba wui ya,

na baŋ ne gyaela baa ta gbɛɛ keŋ bɛɛ gyae ya,

24Degbeŋgyoo, tenee maŋ, mɔna ke naa yɛɛ doŋ beiŋ ya,

naa yɛɛ ke baŋ man ya,

na mena ya na maa wɔlɛɛ.

25Lese n baŋ wola tɛɛlese baŋ,

bɔɔ ne lɛɛ neŋ do ya,

balaŋ baŋ bɔɔ ne baake n yele ya nɛ.

Nawolo nyi be ta kyekpetee Yakɔbe,

be ta kyekpetee e kerekere,

te be wɔlɛɛ ɔ dekyae keŋ.