Yeremiya 11

Ba kewɔlɛɛ nɔɔkebakesee keŋ

1Kei yɛna nombii keŋ Degbeŋgyoo be yako Yeremiya, 2Tei nɔɔkebakesee kei wose man nombia, na n ke yako ŋa fa Yudatena na baŋ be kyaa Yerusalɛm nɛ. 3Yako wɔ nyi Degbeŋgyoo, Iseraetena Wurubuarɛ kpa, <Ma te falaa ŋon ɔ te di nɔɔkebakesee kei wose man nombia dɔɔ ya, 4mmaraa keŋ mɔɔ fa ɛ naanaɔ debaŋ keŋ mɔɔ lese wɔ lee Igyipite, lee botɔɔ keŋ ba wose ne yoi wɔ nɛ.> Me yakowɔ nyi <Ɛ nyii me dei na ɛ ke di ŋan pou mɔɔ yako ŋon nɛ dɔɔ, na ɛ ke yɛɛ me balaŋ na maŋ ke yɛɛ ɛ Wurubuarɛ. 5Kenaŋ na maa di maŋ ntam keŋ mɔɔ kam fa ɛ naanaɔ nyi maa fa wɔ tɛɛle kpaakpaa keŋ kee de abɔɔ nideli nɛ dɔɔ, tɛɛle kenaŋ dɔɔ yaa ɛ kyaa gyɛŋ nɛ.>>

1 Keŋte me tiranɔɔ nyi, <<Amɛn Degbeŋgyoo.>>

6Te Degbeŋgyoo yako maŋ nyiaa, <<Gyɔ nombia kɛŋa pou dekpeŋkpeŋ Yuda donɔɔse na Yerusalɛm abɔnterese man nyiaa, <Ɛ tei nɔɔkebakesee kei wose man nombia na ɛ ke di ŋe dɔɔ. 7Nawolo nyi lee debaŋ keŋ mɔɔ mo ɛ naanaɔ lee Igyipite kaalii gyɛŋ nɛ, me faree wɔ agbaatee agbaatee nyiaa, <<Ɛ nyii me dei.>> 8Mɔna be te nyii maŋ yaa baa di ŋe dɔɔ ya. Be yɛɛ deŋeledoŋ yɛɛ ŋan be konɔɔyuŋ ne gyae. Mena dɔɔ ma moo nɔɔkebakesee mmaraase ŋan pou me kpa baa di ŋe dɔɔ te bɔɔ bɛɛ nɛ kefaalase pou kaa gyakaa be dɔɔ.>> >

9Keŋte Degbeŋgyoo yako maŋ nyiaa, <<Yudatena na baŋ be kyaa Yerusalɛm ta seŋ tia maŋ. 10Be ta bese gyu be naanaɔ baŋ bɔɔ bɛɛ nyi bɔɔ nyii me nombia ya nɛ dukum keyɛɛ man. Be silana wurubuarɛse baale bɛɛ som wɔ. Iserae na Yuda pou te wɔlɛɛ nɔɔkebakesee keŋ mɔɔ bake fa be naanaɔ nɛ. 11Mena dɔɔ maŋ Degbeŋgyoo ne faree wɔ nyiaa, <<Maa mo kewɔlɛɛ kaa lɔ be dɔɔ keŋ bɔɔ tale lee ke man ya. Nyi be wii baake maŋ koraŋ na mɔɔ gyae maa nyii wɔ ya. 12Yuda donɔɔse na Yerusalɛmtena baa gyu ke wii baake be wurubuarɛse baŋ bɛɛ too oliifi fa nɛ, mɔna nyi kewɔlɛɛ kei de kɔŋ be dɔɔ na bɔɔ gyae baa tale lɛɛ ba nyee ya. 13Nyaŋ Yuda dana wurubuarɛse burum ŋgba mena keŋ n donɔɔse boe nɛ, te kedeesaboya ŋan n be baŋee nyi n ka too oliifi fa desɛŋ wurubuarɛ Baale ŋon nɛ, mɔ boe ŋgba Yerusalɛm abɔnterese nɛ.>>

14<Ɛ naa fane fa balaŋ kɛwɔ yaa ɛ ka sola fa wɔ yaa ɛ ka seŋ be nawɔɔ man fa wɔ ya, nawolo nyi akpaa be wii baake maŋ ba wose kekyaŋ man nɛ, mɔɔ gyae maa nyii wɔ ya.>>

15Degbeŋgyoo kpa, <<Woŋ yaa ŋon mɛɛ gyae e nɛ ne yɛɛ mɔ ɔsom deni dinaa man,

lee keŋ ŋon na balaŋ burum ne yɛɛ ɔ nombiakumɛɛ ŋan nɛ?

Naane keŋ bɔɔ gberaa ke gyae ke tale tɔ ɛ deŋele kewɔŋ gbɛɛ?

Akpaa ɛ yɛɛ ya akpanyanyaŋ nombia nɛ,

na ɛ ne nyaŋee.

16Nafɔ Degbeŋgyoo ne baake ŋon bo nyi oliifi daŋ kpaakpaate

keŋ na se bia kpaakpaa.

Mɔna maa yela feliŋkum kegyɔ,

ke yela boalaŋ kaa kpa ke,

na ke tekerii ke tombia.

17Degbeŋgyoo Doŋ Pou Nyee ŋon ɔ ba see ŋon gbeli nɛ, te bake nombiikum fa ŋon, nawolo nyi Iseraetena na Yudatena pou te yɛɛ dukum mo do maŋ baŋ. Lee keŋ bɔɔ too oliifi fa Baale dɔɔ.

Ba kebake Yeremiya nyeeman

18Degbeŋgyoo lese ba nyeeman kebake wola maŋ, te ma gyeŋa ke. Nawolo nyi debaŋ kenaŋ ɔ lese keŋ bɛɛ bake nɛ wola maŋ. 19Na me yɛɛ ŋgba nambu ŋon ɔ woɛ ŋon bɔɔ mo e bee gyu be kaa ko nɛ. Me ta gyem nyi ba te bake ma nyeeman nyi,

<Ɛ yela dɛɛ wɔlɛɛ daŋ keŋ na ke bia,

ɛ yela dɛɛ lese e lee balaŋ baŋ be kyaana be sia nɛ tɛɛle dɔɔ,

na bɔɔ tekaa tɔɔse ɔ yele bela ya.>

20Mɔ nyaŋ Degbeŋgyoo Doŋ Pou Nyee ŋon ne di nombia katenee gbɛɛ man,

te n ne kɛɛse konɔɔ na nyeempɔ man kɛɛ nɛ,

tɔ wɔ kom na maa naa,

nawolo nyi me ta mo me nombia do n nyiŋmaa man.

21Mena dɔɔ Degbeŋgyoo yakowɔ lee Anatotetena baŋ bɛɛ gyae neŋ baa ko te bɛɛ yako nyi, <<Naa gbale lee Degbeŋgyoo yele man ya, na mena ya nyaŋ ka yeŋ de nyiŋmaa man.>> 22Mena dɔɔ nnɛ yaa Degbeŋgyoo Doŋ Pou Nyee ŋon ne yako, <<Maa wɔŋ ba deŋele. Be man tewulɛɛ baa yeŋ yoosila nɔɔman, na be bia alebia na tewulɛɛ ka yeŋ lee tanam dɔɔ. 23Be man dokoloŋ kooŋ be gyae waa ka ya, nawolo nyi maa mo nombiikum lɔ Anatotetena dɔɔ kulutoo keŋ maa wɔŋ ba deŋele nɛ man.>> >