Yeremiya 12

Yeremiya katoroŋ

1Degbeŋgyoo, nyi ma mo nombia kɔŋ n siaman nɛ,

n nombia tenɛɛ debaŋ kamasɛ.

Mɔna maa bɔɔse neŋ nombia lee n nombia kedi kegbɛɛ dɔɔ,

weera te akpanyanyaŋte gbɛɛneŋ ne dee fa e?

Weera te baŋ pou bɔɔ ne di anokoare ya nɛ wose ne fɛɛ wɔ?

2N see wɔ gbeli, te be baŋee lila,

bɛɛ bee na be ta se bia.

N doo be nɔɔse man debaŋ kamasɛ,

mɔna be konɔɔse dana lem lee n gyaŋ.

3Mɔna Degbeŋgyoo, n gyeŋ maŋ,

N ne naa maŋ, te n ne kɛɛse ma nyeempɔ lee n wose man nɛ kɛɛ.

Wɔŋee wɔ ta ŋgba namense baŋ bee gyu be kaa ko nɛ.

Gberaa wɔ fa be kako wee.

4Kelii woromɔ yaa tɛɛle keŋ gyae ke doo kpakparakpaa,

na wɔɔ man ŋalese ka wolo?

Keŋ baŋ be kyaa ke dɔɔ yɛɛ akpanyanyaŋtenawɔ dɔɔ,

wonembia na gyebuse te munu.

Kei wɔle na balaŋ baŋ ne yako nyiaa,

<Ɔ be gyae waa naa kpene keŋ ne yɛɛ daa ya.>

Wurubuarɛ nɔɔketira

5Nyi akpaa ɛmɛɛ na balaŋ te yeu,

te be dii n dɔɔ na,

sena te nyaŋ ke tale yeuna dɛɛkyɔŋse?

Nyi akpaa n ne kpaŋte yala tɛɛle kpaakpaa dɔɔ na,

sena te nyaŋ ke yɛɛ Yɔɔdan laaneŋ man?

6N loŋtona na nyaŋ gbagba n denimantena,

koraŋ ta lese neŋ fa,

be kpuuwɔna baale seŋ tia neŋ.

nyi be kolosi nombia kpaakpaa lee n wose man koraŋ nɛ,

naa mo n wose lɔ be dɔɔ ya.

7Maa bɛɛ ma dekpaŋalaŋ,

maa bɛɛ ma dedii,

maa mo ŋon mɛɛ gyae nɛ,

do ɔ kɔlara nyiŋmaa man.

8Me dedii ta besena fa maŋ ŋgba,

dinaate kyaala laaman nɛ.

Ɔ ne muusu me dɔɔ,

mena dɔɔ mɛɛ kɔla e.

9Ma dedii ta besenata fa maŋ ŋgba,

kekperekpere ŋon ɔ yɛɛ ŋmataŋmata,

te kekperekperese baale be kaa kilisi e baa kyaŋ e nɛ yee?

Gyu ke yilaa ŋale man wonembia pou,

mo wɔ kɔŋ na be kaa kyekpete.

10Namensekɛɛlera burum te wɔlɛɛ me gerepo wɔɔ,

ba te sakatee me wɔɔ,

be ta besena me tɛɛle kpaakpaa keŋ,

yɛɛ depampaa keŋ doo yakaa.

11Ba te wɔlɛɛ ke,

ke doo me siaman yakaa,

tɛɛle keŋ pou gyae ke doo yakaa,

nawolo nyi ŋolo be famenɛna ke ya.

12Wɔlɛɛra baa lee,

depampaa man bulase ŋan pou doo yakaa nɛ nyeeya man,

nawolo nyi Degbeŋgyoo yoosila ne wɔlɛɛ abɔɔ,

lee tɛɛle ɔto kelii tɛɛle ɔto,

ŋolo wose be gyae ke fɛɛ e ya.

13Baa duu aboŋ mɔna baa kɛrɛɛ sɔɔse,

baa ka leki, mɔna bɔɔ gyae baa nyiŋ kolo ya.

Weenɛɛ ŋan baa kɛrɛɛ nɛ gyae ke yɛɛ wɔ desɛŋ,

lee Degbeŋgyoo baŋkum keŋ dɔɔ.

14Degbeŋgyoo kpa nyiaa, <Me dɔɔna akpanyanyaŋtena baŋ pou bɔɔ lɛo dedii ŋan mɔɔ mo fa me balaŋ Iserae nɛ, maa lese wɔ lee be tɛɛlese man, na maa lese Yudatena lee be man. 15Mɔna nyi ma lese wɔ taŋ nɛ, maa bese wii wɔ na maa besena be man walaŋ kamasɛ kɔŋ baŋ gbagba dedii na ŋon gbagba ɔ donɔɔ man. 16Mɔ nyi akpaa be kasee me balaŋ gbɛɛneŋ nideli te ba mo ma yele kaŋ ntam nyiaa, <<Degbeŋgyoo nyiŋaa ɔ kyaa na,>> ŋgba mena keŋ bɔɔ kyaa wola me balaŋ nyi baa kaŋ Baale ntam nɛ, kenaŋ na maa yela baa kyaa gbeli me balaŋ man. 17Mɔna akpaa tɛɛle daale te nyii ya nɛ, maa tu e na maa wɔlɛɛ e kerekere,> Degbeŋgyoo torola yako.