Yeremiya 13

Kanyaŋ kpaakpaate abɔsɔɔ

1Nnɛ te Degbeŋgyoo yako maŋ, <Gyu kelɛɛ abɔsɔɔ kpaakpaate na n ka mo kpaŋ n teŋa man, mɔna na yele loŋ ke tina ke ya.> 2Mena dɔɔ me lɛɛ abɔsɔɔ ŋgba mena keŋ Degbeŋgyoo be yako nɛ, te ma moo ke kpaŋ ma teŋa.

3Te Degbeŋgyoo besewɔ yako maŋ bolate nyiaa, 4Mo abɔsɔɔ keŋ n be lɛɛ mo kpaŋ n teŋa man nɛ, gyu Eferatese boo man na n ka mo ke weese boe bɔɔ man. 5Mena dɔɔ ma moo ke ka weese Eferatese boo man ŋgba mena keŋ Degbeŋgyoo be yako maŋ nɛ.

6Weeya burum ŋaale wɔle nɛ, Degbeŋgyoo yako maŋ nyiaa, <Koro gyu Eferatese boo nɔɔman na n kaa mo abɔsɔɔ keŋ mɔɔ yako neŋ nyi nyaa mo ka weese botɔɔ nɛ.> 7Mena dɔɔ ma korowɔ gyu Eferatese boo nɔɔman ke wula botɔɔ keŋ mɔɔ mo abɔsɔɔ keŋ weese nɛ lese ke, mɔna nɛnɛɛ ka te lɔɔree te ka te wɔlɛɛ kerekere.

8Keŋte Degbeŋgyoo kolosiwɔ fa maŋ nyiaa, 9Nnɛ yaa Degbeŋgyoo ne yako, <<Mena ke te maa wɔlɛɛ Yuda wose kegate na Yerusalɛm wose kegate beiŋ keŋ. 10Akpanyanyaŋtena kɛwɔ baŋ bɔɔ bɛɛ be te nyii me dei ya, te bɔɔ yɛɛ konɔɔyuŋ te bɔɔ sila wurubuarɛse baale som wɔ nɛ, baa yɛɛ ŋgba mena abɔsɔɔ kei, baa wɔlɛɛ kerekere. 11Mena keŋ bɛɛ mo abɔsɔɔ kpaŋ teŋa man nɛ, mena te ma moo Iseraetena pou na Yudatena pou mataana ma wose. Nyi baa yɛɛ me balaŋ na yele kalese na gyoorobiiri. Mɔna be te nyii maŋ ya.>> Degbeŋgyoo torola yako.

Waen wonembu tɔna

12Yako wɔ nyiaa, <<Degbeŋgyoo, Iseraetena Wurubuarɛ kpa, mo waen do wonembu tɔne ogele kamasɛ man wulu belebelebele.>> Akpaa be bɔɔse neŋ nyi, <<Daa ba gyeŋ nyi kaboena dɛɛ mo waen do wonembu tɔne ogele kamasɛ man ke wulu yee? 13nɛ, kenaŋ na yako wɔ nyiaa, <<Degbeŋgyoo kpa, maa mo soloŋ kedɛɛse do baŋ pou be kyaa tɛɛle kei dɔɔ nɛ man, mo kpuna gyooneŋ baŋ pou be kyaa Dawide gyoorogbeli dɔɔ na saese na gbalara na baŋ pou be kyaa Yerusalɛm nɛ. 14Maa mo wɔ ŋmeree dɔŋa, kyaɔ na bia pou. Mɔɔ gyae maa wii wɔ yaa maa wii be waraŋase yaa me tɔɔman ke nyakee maŋ keŋ nyi mɔɔ wɔlɛɛ wɔ ya.>> > Degbeŋgyoo torola yako.

Keŋmaase lee gbeŋiri man kegyu

15Ɛ nyii na ɛ ke tei nideli,

ɛ naa yɛɛ agaŋtaŋ ya,

nawolo nyi Degbeŋgyoo kolosila.

16Ɛ mo gyoorobiiri fa Degbeŋgyoo ɛ Wurubuarɛ,

pɛna waa mo detiŋtɛɛ kɔŋ,

pɛna ɛ nawɔɔ ke kpaŋte

detiŋtɛɛ tuum bulase ŋan dɔɔ.

Ɛ ne gyakaa keŋmaŋee loo,

mɔna waa besena ke yɛɛ detiŋtɛɛ

na waa kyɛɛkee ke yɛɛ detiŋtɛɛ tuum.

17Akpaa ɛ te nyii ya nɛ,

maa yo wii,

lee ɛ wose kegate dɔɔ,

me sia gyae ke wii nideli,

na siasaraŋ ke laŋ maŋ ŋgba loŋ nɛ,

nawolo nyi baa kyaŋ Degbeŋgyoo namense baŋ yoogbeŋa.

18Yako gyoo na alagyoo nyiaa,

<Ɛ tisi lee ɛ gyoorogbelɛɛ dɔɔ,

nawolo nyi ɛ gyooro kotɔtɔɔse

gyae ka lee ɛ nyeeya dɔɔ yala.>

19Ba te tɔ donɔɔ dinaana ŋan kyaa ata yenaŋ depampaa man nɛ do,

te ŋolo be kyaa waa gyoo ya.

Baa kyaŋ Yudatena pou yoogbeŋa,

baa kuu be popou laŋ kerekere.

20Gyina n sia na n ke kɛɛ

baŋ bɔɔ lee adoyenaŋ bɛɛ kɔŋ.

Namense baŋ be kpa nyaa kɛɛ be dɔɔ,

namense baŋ dɔɔ n na wola n wose nɛ de?

21Nyi akpaa Degbeŋgyoo da mo,

baŋ n be kɛɛle nɛ nyi be kaa di n dɔɔ na sena te n ke yɛɛ?

N be gyae n ke nyii weeleŋ,

ŋgba alo ŋon ɔ na doŋee nɛ yee?

22Akpaa n bɔɔse n wose nyiaa,

<Weera te kei kɔŋawɔ me dɔɔ?>nɛ,

ka lee n nombiakumɛɛ burum ŋan dɔɔ,

te ba lese neŋ deteŋteli,

te be naase n wose diyem.

23Kusi walaŋ waa tale kyɛɛkee ɔ wosetɔne,

yaa laamante ke kyɛɛkee ɔ tɔne ŋmataŋmata keŋ?

Mena te ɛmɛɛ baŋ nombiakumɛɛ keyɛɛ be male ŋon nɛ,

be gyae ɛ ke tale yɛɛ nombia kpaakpaa ya.

24Maa yaasee ŋon ŋgba wura,

ŋan depampaa man feliŋ ne gyɔɔ nɛ.

25Kei yɛna n wui dedii,

n dedii keŋ mɔɔ maa see neŋ, Degbeŋgyoo torola yako,

nawolo nyi n te wolee maŋ,

te n moo n wose lɔ akɛrɛɛ wurubuarɛse dɔɔ.

26Maa wɔŋ n kegba atetate kaa wuu n sia,

na baa nyiŋ naa n desɛŋ,

27me naa n yale kewɔlɛɛ na lookum yeesa,

na n futooli desɛŋ nombia.

Ma te naa nya ayɛɛsa anekɔlaŋ ŋan

bulasebia na wɔɔse man.

Yerusalɛm, laako!

Woromɔ yaa n ka lee ayimɛɛ man?