Yeremiya 14

Dugbutu na tanam na yoosila

1Kei yɛna nombia ŋan Degbeŋgyoo be yako Yeremiya lee dugbutu keŋ wose man,

2Yuda ne di waraŋsa,

ɔ donɔɔse dinaana na toroŋ,

bee wii fa tɛɛle keŋ,

te Yerusalɛm kewii te gyu lem.

3Gyoorobia ne kpila ba somra nyi ba ke kyee loŋ kɔŋ,

be gyuu atiribuŋse man,

mɔna be te nyiŋ loŋ ya.

Ba besenaa bɔ ɔsuŋse wolo kɔŋ,

desɛŋ kyaŋa wɔ te ba wose gbirisi wɔ,

te ba moo kolo wuu ba nyeeya.

4Tɛɛle keŋ te bɛo,

nawolo nyi ɔga bɛɛ ŋɛɛ tɛɛle keŋ dɔɔ ya,

desɛŋ te kyaŋ wɔɔfarala,

te ba moo abɔɔ wuu ba nyeeya.

5Ŋaa alo ŋon ɔ kyaa kefula man koraŋ,

ne bɛɛ ɔ bu kyokyoo ŋon ɔ ba lolo nɛ,

nawolo nyi ŋalese be kyaa ya.

6Ŋale man afurumse seŋɛɛ bulase ŋan doo yakaa nɛ nyeeya man,

bɛɛ lee weesɛɛ ŋgba gbougbouse nɛ,

be sia te yɛɛ fulaa,

nawolo nyi weenɛɛ be kyaa ya.

7Doo nyi de nombiakumɛɛ ne tia daa koraŋ nɛ,

Degbeŋgyoo, lee n yele dɔɔ yɛɛ kolo.

Nawolo nyi de ta lee n wɔle agbaatee agbaatee,

da te yɛɛ dukum tia neŋ.

8Nyaŋ yɛna Iserae lookegyakaa,

ɔ lɛɛre lee wosekekyaŋ man,

weera n yɛɛ ŋgba ŋɔɔle nɛ tɛɛle keŋ man,

ŋgba gbɛɛtɛɛre ŋon ɔ be kaa doo nelim dokoloŋ nɛ?

9Weera te n yɛɛ ŋgba baale ŋon bɔɔ tuŋlaa e,

ŋgba yoonɔɔte ŋon ɔ be tale lɛɛ ŋolo ya nɛ?

Degbeŋgyoo, n kpuɛna daa,

te n yele gyakaa de dɔɔ,

naa bɛɛ daa ya.

10Nnɛ yaa Degbeŋgyoo yakowɔ lee balaŋ kɛwɔ wose man.

<Bɛɛ gyae keta yeyɛɛ nideli,

bɔɔ ne kyaŋ ba wose seŋ debodokoloŋ ya.

Mena dɔɔ Degbeŋgyoo bɛɛ lɛɛ wɔ do ya,

nɛnɛɛ waa tɔɔse ba akpanyanyaŋ nombia,

na waa wɔŋ ba deŋele lee be dukum dɔɔ.>

11Keŋte Degbeŋgyoo yako maŋ nyiaa, <Naa sola maŋ nyi maa yɛɛ deeli fa balaŋ kɛwɔ ya. 12Nyi be bake be nɔɔ koraŋ nɛ, mɔɔ gyae maa nyii be kewii baake ya, nyi be yɛɛ katoo kedeesa na weenɛɛ kedeesa na, mɔɔ gyae maa lɛɛ ŋa do ya. Maa mo yoosila na tanam na kaweekum wɔlɛɛ wɔ.>

13Keŋte me yakowɔ nyiaa, <Ao Degbeŋgyoo Doŋ Pou Nyee, gbalara baŋ gyakaa bɛɛ yako wɔ nyiaa, <<Yoosila yaa tanam be gyae ke wɔlɛɛ ŋon ya. Mɔna maa mo wosefɛɛreŋ kekpaakekpaa see ke nawɔɔ man fa ŋon.>> >

14Keŋte Degbeŋgyoo yako maŋ nyiaa, <Gbalara baŋ ne dii akɛrɛɛ bo lee ma yele man. Me te kpila wɔ yaa maa lese wɔ yaa ma kolosi fa wɔ ya. Ŋan be kpa bɛɛ naa na boe keŋ bɛɛ lɔɔ nɛ, yɛɛ akɛrɛɛ ŋan baŋ gbagba be bake ba nyeempɔse man. 15Mena dɔɔ nnɛ yaa Degbeŋgyoo ne yako lee gbalara baŋ bɛɛ yako nombia lee ma yele man nɛ wose man. Me te kpila wɔ ya, mɔna bɛɛ yako nyiaa, <<Yoosila yaa tanam be gyae ke kɔŋ tɛɛle kei dɔɔ ya.>> Mena gbalara benaŋ baa yekee yoosila na tanam nɔɔman. 16Baa fuŋii balaŋ baŋ gbalara benaŋ ne gbale fa nɛ lɔ Yerusalɛm abɔnterese man lee tanam na yoosila dɔɔ. Bɔɔ gyae baa nyiŋ ŋolo na ŋolo ke wuu baŋ na be wɛɛla na be bia tewulɛɛ na be bia alebia pou ya. Maa yela kayeyɛɛ keŋ kaboena wɔ nɛ ke yala wɔ.

17<Yako nombii kei fa wɔ nyiaa,

< <<Yela me sia kewii siasaraŋ

nelim na ka weese keŋ bee tina yela ya,

nawolo nyi ba te gooli me balaŋ, ma alebu keteŋ,

be ta do e gyam nideli,

ba te gooli e kpaaŋ.

18Nyi me gyu ŋale man na,

mɛɛ naa baŋ bɔɔ mo yoosila koe wɔ nɛ,

nyi me gyu donɔɔ dinaa keŋ man na,

mɛɛ naa baŋ tanam ba koe wɔ nɛ.

Gbalara na saese pou

te lam tɛɛle keŋ bɔɔ gyeŋ ke ya nɛ man.>> >

19N te bɛɛ Yuda korakora?

N ne kɔla Siyɔntena?

Weera te n doo daa gyamɛɛ,

keŋ ŋolo be tale kyɔ daa ya?

De gyakaa wosefɛɛreŋ loo,

mɔna kolo kpaakpaa te kɔŋ ya,

de kɛɛ kawee kekyɔ gbɛɛ,

mɔna wɔe kelɔ kyaa la.

20Degbeŋgyoo, da te naa da akpanyanyaŋ nombia,

na de naanaɔ nombiakumɛɛ keyɛɛ,

da te yɛɛ dukum tia neŋ ampaŋ.

21Lee n yele dɔɔ naa bɛɛ daa ya,

naa do n gyoorobiiri gbeli keŋ desɛŋ ya.

Tɔɔse n nɔɔkebakesee keŋ,

te naa wɔlɛɛ ke ya.

22Tɛɛlese bɛɛneŋ baŋ bɔɔ dana tɔnɔɔ ya nɛ, baa tale yela ɔga ke ŋɛɛ?

Ŋɔma ŋaageŋ ne yele ɔga ne wulii?

Koa, ke yɛɛ nyaŋ Degbeŋgyoo de Wurubuarɛ.

Mena dɔɔ de loo gyakaa n dɔɔ,

nawolo nyi nyaŋ yɛna ŋon n ne yɛɛ abɔɔ pou.