Yeremiya 15

1Keŋte Degbeŋgyoo yako maŋ nyiaa, <Nyi Mosesi na Samuɛle de kaa seŋ me siaman koraŋ nɛ, mɔɔ tekaa wii balaŋ kɛwɔ ya. Gegi wɔ lee me siaman kɛbo. Yela wɔ baa ta. 2Te akpaa be bɔɔse neŋ nyiaa, <<Aleŋ yaa dee gyu?>> nɛ yako wɔ nyiaa, <<Nnɛ yaa Degbeŋgyoo ne yako,

< <<Baŋ be kaboena yeŋ baa yeŋ,

baŋ be kaboena yoosila baa yeŋ yoosila nɔɔman,

baŋ be kaboena nyi tanam dɛɛ koe wɔ na tanam dɛɛ koe wɔ,

baŋ be kaboena nyi baa gyu yoogbeŋiri man baa gyu yoogbeŋiri man.>>

3Degbeŋgyoo kpa, <Maa yela kewɔlɛɛ anaara ke yala wɔ, yoosila dɛɛ koe wɔ, na babaase ke wɔŋee wɔ laŋ, na gyebuse na ŋaleman wonembia ka kyekpetee wɔ na baa wɔlɛɛ wɔ. 4Maa yela ba wose ke yɛɛ tɛɛle kei dɔɔ gyooridediise pou gyakoloŋ lee kpene keŋ Hesekiya bu Manase be yɛɛ Yerusalɛm debaŋ keŋ ɔ ne di gyoori nɛ dɔɔ.

5<Ao Yerusalɛm, amɔte ne gyaela waa wii n waraŋase?

Amɔte ne gyaela waa wii waraŋsa fa neŋ?

Amɔte ne gyaela waa seŋ bɔɔse neŋ nyi, n wose yɛɛ sena?

6Degbeŋgyoo kpa,

<Ɛ te bɛɛ maŋ,

Ɛ ta lee me wɔle agbaatee agbaatee,

Mena dɔɔ maa tenee me nyiŋmaa wɔlɛɛ ŋon,

Ma te kaana ŋon kewii.

7Maa mo pampaa feefu wɔ,

donɔɔ dinaa keŋ anaanɔɔse man.

Maa mo waraŋsa kedi kewɔlɛɛ kɔŋ me balaŋ dɔɔ,

nawolo nyi ba te kyɛɛkee lee be gbɛɛneŋ man ya.

8Maa yela be liala ka bo

kela ɛpo nɔɔman aŋasa.

Maa mo wɔlɛɛre ŋon kɔŋ be dɔɔ weese teŋteŋ,

na waa koe tewulɛɛ be naɔ,

maa mo gyakoloŋ na keŋeŋii kɔŋ be dɔɔ

karatetee dokoloŋ.

9Bia nyetooro be naa waa gbalase,

na waa lee ɔ weesɛɛ ɔtomante.

Ɔ weese waa gyoo debaŋ keŋ tɛɛ te yuuta ya,

baa do e desɛŋ na ɔ sia ka yeŋ.

Maa mo yoosila koe baŋ bɔɔ kaa nɛ,

be kɔlara siaman,>

Degbeŋgyoo torola yako.

10Ao me naa, n te di maŋ gyerebi ŋgba n ba lola maŋ,

tɛɛle kei balaŋ pou na seŋ tia maŋ te bɛɛ kalena maŋ.

Ma te paata kolo lee ŋolo gyaŋ ya, te ŋolo te paata kolo lee me gyaŋ ya,

mɔna walaŋ kamasɛ ne falaa maŋ.

11Degbeŋgyoo kpa,

<Ampaŋ maa lɛɛ neŋ na ke de fa neŋ,

ampaŋ maa yela n kɔlara kaa doo neŋ teree,

lee nombiikum yaa dukum debaŋ man.

12Ŋolo waa tale tekeri nyeele bibiini,

nyeele bibiini keŋ ba lee adoyenaŋ yaa kɔbere?

13Maa mo n wosekenyiŋ na nya abɔɔ dɛɛsee,

fa ŋgba yooman abɔɔ nɛ keŋ bɔɔ tɔ kom ya,

lee n dukum pou,

keŋ n be yɛɛ n tɛɛle man dɔɔ.

14Maa yela ɛ ka som ɛ kɔlara ŋgba gbeŋa nɛ

tɛɛle keŋ ɛ ba gyeŋ ke ya nɛ man,

nawolo nyi me baŋ gyae ka koro ŋgba boalaŋ nɛ,

keŋ gyae ke kpa kekpaakekpaa.>>

15Nyaŋ Degbeŋgyoo, n gyeŋ,

tɔɔse maŋ na n ke kɛɛ me dɔɔ.

Tɔ baŋ bɛɛ naase maŋ diyem nɛ kom.

N bɛɛ gyeŋ baŋ bileŋbileŋ ya, naa yele baa ko maŋ ya,

gyeŋ nyi nyaŋ dɔɔ te bɛɛ naase maŋ diyem.

16N nombia de kɔŋ na mɛɛ lɛɛ ŋa di ŋgba weenɛɛ nɛ,

ŋan yɛna ma kenyaŋee te ŋɛɛ gyoo me sia,

nawolo nyi n yele gyakaa me dɔɔ,

Degbeŋgyoo Wurubuarɛ Doŋ Pou Nyee.

17Ma te kyaa bomna baŋ bee di gyoŋ,

yaa maa di me nɔɔ kpuna wɔ see ya.

Maageŋ ne kyaala, nawolo nyi n nyiŋmaa gyakaa me dɔɔ,

te n moo baŋ do me man nideli.

18Weera te ma weeleŋ bɛɛ taŋ ya,

te me gyam bɛɛ yem ya te ke taŋ kekyɔ ya?

N yɛɛ ŋgba boŋobii keŋ na beo balaŋ nɛ fa maŋ,

ŋgba depaa keŋ na yoo nɛ.

19Mena dɔɔ nnɛ yaa Degbeŋgyoo ne yako,

Akpaa n kyɛɛkee na, maa besena neŋ see n dekyae man,

na n ka som maŋ,

akpaa n kolosi nombia kpaakpaa, ŋan te yɛɛ nombia yakaa ya nɛ,

n ke yɛɛ me kolosire.

Yela balaŋ kɛwɔ ka bese kɔŋ n gyaŋ,

mɔna nyaŋ naa bese gyu be gyaŋ ya.

20Maa mo neŋ yɛɛ dekyaŋ fa balaŋ kɛwɔ,

kɔbere dekyaŋ keŋ bɔɔ bam kilisi wɔ,

baa yoo neŋ,

mɔna bɔɔ gyae baa di n dɔɔ ya,

nawolo nyi me kpuɛna neŋ,

nyi maa lese neŋ na maa lɛɛ neŋ,>

Degbeŋgyoo torola yako.

21<Maa lɛɛ neŋ lee akpanyanyaŋtena nyiŋmaa man,

na maa lese neŋ lee nyeeman doŋtena nyiŋmaa man.>