Yeremiya 16

Nombiikum wee

1Degbeŋgyoo yako maŋ nyiaa, 2<Naa yala alo na n ka lola bia ala na bia baala kɛbo kei ya.> 3Nawolo nyi keŋ Degbeŋgyoo be yako lee bia ala na bia baala baŋ bɔɔ lola wɔ tɛɛle kei man, na be kyaɔ na be naɔ wose man yɛna nyi, 4<Kaweekum gyae ka koe wɔ. Bɔɔ gyae baa wii wɔ yaa baa wuu wɔ ya, mɔna baa yɛɛ ŋgba wonembia pena nɛ tɛɛle dɔɔ. Yoosila na tanam gyae ke wɔlɛɛ wɔ, na ba woya ka bese gyebuse na ŋale man wonembia weenɛɛ.>

5Nawolo nyi nnɛ yaa Degbeŋgyoo ne yako, <Naa gyoo dekpaŋalaŋ keŋ man lia kyaa ya. Naa gyu ke wii fa wɔ yaa n kaa fa wɔ laako ya, nawolo nyi me ta lese me kehiraa na ma kegyae na me waraŋase kewii lee balaŋ kɛwɔ dɔɔ.> Degbeŋgyoo torola yako. 6Baŋ be dana yele na balaŋ yakaa nyibaŋ baa yekee tɛɛle kei dɔɔ. Bɔɔ gyae baa wuu wɔ yaa baa wii waraŋsa fa wɔ ya, te ŋolo be gyae waa kɛrɛɛ ɔ wose yaa waa gbee ɔ nyee fa wɔ ya. 7Ŋolo be gyae waa mo weenɛɛ kewii lia fa baŋ bee di waraŋsa yaa bee wii be kya yaa be naa nɛ ya. Te ŋolo be gyae waa mo soloŋ gyu kewii lia fa wɔ ya.

8Naa gyu kekyaa dekpaŋalaŋ keŋ man bee di be nɔɔ, na ɛmɛɛna wɔ ke di na ɛ ke nyɔɔ ya. 9Nawolo nyi Degbeŋgyoo Doŋ Pou Nyee, Iserae Wurubuarɛ ŋon kpa, <Maa yela kenyaŋee yeesa na gyoŋkedi na alowɔle na alowɔle baale yeesa kekɔŋ ɔto ɛ siaman tɛɛle kei dɔɔ.

10Akpaa n yako balaŋ kɛwɔ kɛŋa pou te be bɔɔse neŋ nyi, <<Weera te Degbeŋgyoo bake nombiikum dinaa kei tia daa? Woŋ nombiikum te de yɛɛwɔ? Woŋ dukum te de yɛɛwɔ tia Degbeŋgyoo de Wurubuarɛ?>> 11Kenaŋ na yako wɔ nyiaa, <<Nawolo nyi ɛ naanaɔ bɛɛ maŋ te be sila wurubuarɛse baale te be buŋawɔ som wɔ. Be bɛɛ maŋ keŋ be te di maŋ mmaraa dɔɔ ya. Degbeŋgyoo torola yako, 12Mɔna ɛmɛɛ yɛɛ akpanyanyaŋ nombia kela ɛ naanaɔ. Ɛ popou ne sila nombiakumɛɛ ŋan ɛ konɔɔ ne gyae te ɛ bɛɛwɔ ɛ be nyii me dei ya. 13Mena dɔɔ maa gegi ŋon lee tɛɛle kei dɔɔ gyu tɛɛle keŋ ɛmɛɛ yaa ɛ naanaɔ ba gyeŋ ya nɛ man, na ɛ kaa som wurubuarɛse baale botɔɔ nelim na ka weese. Nawolo nyi mɔɔ gyae maa wii ŋon ya.>>

14Degbeŋgyoo kpa, <Mena dɔɔ ɛ kɛɛ, weeya ŋaale ne kɔŋ keŋ bɔɔ tekaa yako nyi, <<Degbeŋgyoo ŋon ɔ ba lese Iseraetena lee Igyipite nyiŋaa ɔ kyaa nɛ,>> ya 15mɔna baa yako bo nyi, <<Degbeŋgyoo ŋon ɔ ba mo Iseraetena lee ado yenaŋ tɛɛle man, na lee tɛɛlese ŋan pou ɔ be yaasee wɔ gyu man nɛ nyiŋaa ɔ kyaa nɛ.>> Nawolo nyi maa besena wɔ see tɛɛle keŋ mɔɔ mo fa be naanaɔ nɛ man.

16Degbeŋgyoo kpa, <Kɛɛ, maa kpila kpɛɛ kyaŋara burum kɔŋ na be kaa kyaŋ wɔ. Kenaŋ wɔle maa kpila bakpaŋna burum na be kaa ko wɔ bula kamasɛ na bulasebia na kpanaŋse bɔɔneŋ man. 17Me sia gyakaa be gbɛɛneŋ pou dɔɔ, ŋɔɔ weesɛɛ lee me gyaŋ ya te kolo be wuɛ be dukum dɔɔ me siaman ya. 18Maa tɔ wɔ ba akpanyanyaŋ na be dukum kom akpeŋ ala, nawolo nyi be ta mo bɛɛneŋ waalaa me tɛɛle keŋ te ba moo be bɛɛneŋ anekɔlaŋ baŋ wulu me dedii.>

19Degbeŋgyoo, me doŋ na ma dekagya,

ma keyeu kagyoo lee wosekekyaŋ man,

tɛɛlese baa kɔŋ n gyaŋ,

lee tɛɛle ɔto na baa yako nyiaa,

<De naanaɔ te nyiŋ dedii kpuna akɛrɛɛ bɛɛneŋ ya,

bɛɛneŋ baŋ bɔɔ dana tɔnɔɔ ya, te ba te yɛɛ kolo kpaakpaa fa wɔ ya.

20Balaŋ ne yɛɛ baŋ gbagba be wurubuarɛse?

Ayi, mɔna ba te yɛɛ wurubuarɛsewɔ ya.>

21<Mena dɔɔ maa wola wɔ,

nɛnɛɛ maa wola wɔ

me doŋ na me wɔɔle.

Na baa gyeŋ nyi,

ma yele yɛna Degbeŋgyoo.