Yeremiya 17

1<<Be ta mo nyeele pɛn ŋmarase Yuda dukum,

na boe kyɔŋkyɔŋ keŋ kɛɛ bee nɛ ŋmarase

gyakaa be konɔɔse dɔɔ

na kedeesaboe keŋ woose dɔɔ.

2Be bia koraŋ ne tɔɔse,

be kedeesase boya na Asera daase,

ŋan doo daase wuluŋ tɛɛ,

na bulasebia ŋan korɛɛ nɛ dɔɔ.

3Me bulase ŋan doo tɛɛle keŋ man ne nyeeman,

maa mo n wosekenyiŋ na nya abɔɔ dɛɛsee,

mo kpuna botɔɔse ŋan korɛɛ nɛ,

fa ŋgba yooman abɔɔ nɛ,

lee dukum keŋ ɛ be yɛɛ tɛɛle keŋ pou dɔɔ nɛ dɔɔ.

4Lee nyaŋ gbagba n dukum dɔɔ,

dedii keŋ mɔɔ fa neŋ nɛ gyae ka lee n nyiŋmaa man.

Maa yela nyaŋ ka bese gbeŋi fa n kɔlara,

tɛɛle keŋ n ba gyeŋ ya nɛ dɔɔ,

nawolo nyi n ta do maŋ baŋ,

te ke gyae ke doo kekpaakekpaa.>>

5Nnɛ yaa Degbeŋgyoo ne yako,

<<Ma te falaa ŋon ɔ na mo ɔ wose lɔ walaŋ dɔɔ,

ŋon ɔ ne nyiŋ ɔ doŋ lee wose naane man bo,

te ɔ na lese ɔ konɔɔ lee Degbeŋgyoo dɔɔ nɛ.

6Mena walaŋ ŋonaŋ waa yɛɛ ŋgba ŋaale depampaa man nɛ,

abɔɔ kpaakpaa de kɔŋ na bɔɔ gyae baa naa ya.

Baa kyaa depampaa dowolo man,

na yabia tɛɛle keŋ ŋolo be kyaa ke dɔɔ ya nɛ man.

7<<Mɔna ŋon ɔ na mo ɔ wose lɔ Degbeŋgyoo dɔɔ,

ŋon ɔ loo gyakaa Degbeŋgyoo dɔɔ nɛ, ŋonna nyeebam.

8Baa yɛɛ ŋgba daŋ keŋ bɔɔ duu boo nɔɔman,

te kɔɔ lese lila keli boŋobii man nɛ.

Weese ne gyɔɔ na ke bee yee ya,

ke faareŋ yɛɛ nalaŋ debaŋ kamasɛ.

Ke bɛɛ yeyɛɛ dugbutu tɛɛ ya,

te kɛɛ se bia debaŋ kamasɛ.>>

9Deniwalaŋ konɔɔ dana dekara kela kpene kamasɛ

te ka be taŋ kekyɔ ya.

Amɔte ne gyaela waa tale nyii ke man?

10<<Maŋ Degbeŋgyoo ne kɛona konɔɔ man,

te mɛɛ gyoo nyeempɔ man kɛɛ,

na maa tɔ ɔkamasɛ kom lee mena keŋ ɔ dinɔɔ doo,

ŋgba mena keŋ ba ayɛɛsa kaboena nɛ.

11Baŋ bɛɛ nyiŋ ba wose lee gbɛɛkum man nɛ,

yɛɛ ŋgba kolia ŋon ɔ ne kpala wɔɔ ŋan ɔ ta doo ya nɛ.

Akpaa be kyaa kelii be kulutooneŋ yaale nɛ, ba wosekenyiŋ ŋan gyae ke taŋ,

te kɔ ɔto man na be ta bese ayiŋtena.

12Gyoorobiiri gyoorogbeli keŋ bɔɔ gyina adido lee kewalaŋ keŋ nɛ,

yɛna dɔ ɔsom deni fereŋkyeŋ keŋ.

13Degbeŋgyoo, nyaŋ yɛna Iserae loo kegyakaa,

desɛŋ gyae ke kyaŋ baŋ pou baa bɛɛ neŋ nɛ.

Baa ŋmarase baŋ baa lee n wɔle nɛ yela do aŋasa man

nawolo nyi ba te bɛɛ Degbeŋgyoo,

ŋon ɔ yɛɛ nyeedoŋ loŋ nyee nɛ.

14Degbeŋgyoo, kyɔ maŋ na maa nyiŋ doŋ,

lɛɛ maŋ na maa nyiŋ kelɛɛ,

nawolo nyi nyaŋ te mɛɛ lese n yele.

15Be gyakaa bɛɛ yako maŋ nyiaa,

<<Nde Degbeŋgyoo nombii keŋ?

Yela ka ke kɔŋ mena.>>

16Ma te bɛɛ nyi ma te yɛɛ n namensekɛɛlere e ya,

n gyeŋ nyi ma te kɛɛ weekum gbɛɛ ya.

Keŋ mɔɔ mo me nɔɔ yako doo n siaman teŋteŋeleŋ.

17Na bese gyakoloŋ kolo fa maŋ ya,

nyaŋ yɛna ma keyeu kagyoo nombiikum wee.

18Yela desɛŋ kekyaŋ baŋ bɛɛ naase maŋ diyem nɛ,

mɔna lese maŋ lee desɛŋ man,

yela gyakoloŋ ka gyoo wɔ,

mɔna lese maŋ lee gyakoloŋ man.

Yela nombiikum wee ke yala wɔ,

wɔlɛɛ wɔ na n ka bese wɔlɛɛ wɔ.

Kefɛɛfo wee fereŋkeŋ keŋ dɔɔ kedi

19Nnɛ yaa Degbeŋgyoo yako maŋ, <<Gyu ka seŋ balaŋ baŋ denaanɔɔ keŋ man1 Yuda gyooneŋ na gyoo lee nɛ man, na n ka seŋ Yerusalɛm anaanɔɔse ŋan pou nɔɔman. 20Yako wɔ nyiaa, <<Ɛmɛɛ Yuda gyooneŋ na Yudatena pou na ɔkamasɛ ŋon ɔ kyaa Yerusalɛm keŋ ɔ na mo anaanɔɔse kɛŋa man gyoo nɛ, ɛ nyii Degbeŋgyoo nombia, 21Nnɛ yaa Degbeŋgyoo ne yako, <Ɛ kɛɛ nideli nyi ɛ ba seele kasolɔ kefɛɛfowee yaa ɛ ka mo ke ta Yerusalɛm anaanɔɔse man gyoo ya. 22Ɛ naa seele kasolɔ daale lee ya akpaŋalaŋse man yaa ɛ ke yɛɛ tom kamasɛ kefɛɛfowee ya. Mɔna ɛ yɛɛ kefɛɛfowee keŋ fereŋkyeŋ ŋgba mena keŋ mɔɔ fa ɛ naanaɔ mmaraa nɛ. 23Mɔna ba te tei yaa baa see deŋele fa maŋ ya. Be yɛɛ konɔɔyuŋ keŋ be te nyii ya te be te nyii kekalana mɔ ya. 24Degbeŋgyoo kpa, <Mɔna akpaa ɛ kɛɛ nideli mo obuo fa maŋ, keŋ ɛ ta mo kasolɔse gyoo donɔɔ dinaa keŋ anaanɔɔse man kefɛɛfowee ya, te ɛ yɛɛ kefɛɛfowee keŋ fereŋkyeŋ keŋ ɛ te yɛɛ tom kamasɛ wee kenaŋ ya nɛ, 25kenaŋ na gyooneŋ baŋ baa kyaa Dawide gyoorogbeli dɔɔ na be kyaarabia baa gyoo donɔɔ dinaa keŋ anaanɔɔse man. Baŋ na be kyaarabia baa kyaa anebiliŋiŋse na dɛɛkyɔŋse dɔɔ kɔŋ, mo kpuna Yuda baala na baŋ be kyaa Yerusalɛm. Na baa kyaa donɔɔ dinaa kei man kekpaakekpaa. 26Balaŋ baa lee Yuda donɔɔse man na akuraase ŋan be kilisi Yerusalɛm, na Bɛneyameŋ tɛɛlese man na weese dɛɛyalae bulasebia na bula dɔɔ tɛɛlese na ata yenaŋ depampaa man kɔŋ. Baa mo katoo kedeesase na kedeesase na weenɛɛ kedeesa na oliifi na karaŋ kefa kedeesase kɔŋ Degbeŋgyoo dɛɛ. 27Mɔna akpaa ɛ te nyii maŋ na ɛ ke yɛɛ kefɛɛfowee keŋ fereŋkyeŋ keŋ ɛ ba seele kasolɔse gyoo Yerusalɛm anaanɔɔse man kefɛɛfowee ya nɛ, kenaŋ na maa do boalaŋ Yerusalɛm anaanɔɔse man na ke kpa botɔɔse ŋan ne gyee wɔ nɛ keŋ ŋolo be tale ko ke ya.>> >